سۋرەت: kazakhexport.kz
قازىر جاڭا ينۆەستيتسيالىق كەزەڭگە اياق باساتىن ۋاقىت كەلدى. بايقاپ وتىرساق, ينفلياتسيا باياۋلاپ, بىلتىرعى جوعارعى دەڭگەيدەن 2,5 ەسە تومەندەپ وتىر. ەلىمىزدىڭ حالىقارالىق رەزەرۆى 100 ملرد دوللاردان استى. ەندىگى باستى مىندەت – ينۆەستيتسيا ءۇشىن وتاندىق بيزنەستىڭ تۇراقتى بولۋىن قامتاماسىز ەتىپ, ەكونوميكانىڭ يننوۆاتسيالىق, جوعارى تەحنولوگيالىق سەكتورلارىن دامىتۋ.
پرەزيدەنت جولداۋدا شاعىن جانە ورتا بيزنەسكە باسا نازار اۋداردى. 2029 جىلعا قاراي ورتا بيزنەستىڭ ەل ەكونوميكاسىنداعى ۇلەسى 15 پايىزعا جەتۋى كەرەك. بۇگىندە وتاندىق كاسىپكەرلەرگە جان-جاقتى قولداۋ كورسەتەتىن ءتۇرلى مەملەكەتتىك جانە جەكە سەكتورداعى كومپانيالار بار. الايدا جەكەلەگەن كەيستەردى قاراستىرساق, مەملەكەتتىك قولداۋ شارالارىن ءالى دە بىرىزدىلىككە سالىپ, تيىمدىلىگىن ارتتىرا ءتۇسىرۋ قاجەتتىلىگى بايقالادى. ءبىز «FinTech» جانە IT-جوبالارى ارقىلى كورسەتىلەتىن قىزمەتتەر مۇمكىندىگىن كۇشەيتۋىمىز قاجەت.
تاعى ءبىر ماڭىزدى ماسەلە – تەرەڭ وڭدەلگەن ءونىم ەكسپورتى. مەملەكەت باسشىسى وڭدەۋشى سەكتور وزگە بيزنەسكە قاراعاندا كوبىرەك قولداۋعا يە بولۋى كەرەگىن كەسىپ ايتتى. ءيا, ەكسپورتتىڭ ۇلتتىق ەكونوميكانى جاڭا دەڭگەيگە شىعاراتىن تەتىك ەكەنى بەلگىلى. ەكسپورتتىڭ ارتقانى – جاڭا جۇمىس ورنىنىڭ كوبەيگەنى, ءوندىرىس كولەمىنىڭ ارتقانى. وعان قوسىمشا سالىق پەن ەل ەكونوميكاسىنا قۇيىلاتىن ينۆەستيتسيانى قوسىڭىز.
«قازاقستاننىڭ ەكسپورتتىق-كرەديتتىك اگەنتتىگى» اق ەل ەكونوميكاسىن ءارتاراپتاندىرۋ ماڭىزىن جەتىك تۇسىنەدى. اگەنتتىك پرەزيدەنت تاپسىرماسى اياسىندا ەكسپورتتى بەتكە العان وتاندىق كاسىپورىندارعا جان-جاقتى قولداۋ كورسەتىپ, شيكىزات ەمەس ءونىم كولەمىن ارتتىرۋعا جاعداي جاساپ وتىر. بيىل قاسىم-جومارت توقاەۆتىڭ باستاماسىمەن «KazakhExport» نەگىزىندە ەلىمىزدە ەكسپورتتىق-كرەديتتىك اگەنتتىك قۇرىلدى. ونىڭ مىندەتى – ەكسپورتتاۋشىلاردى قولداۋعا ۇزدىك حالىقارالىق تاجىريبەلەردى جانە دامىعان مەملەكەتتەردىڭ تاجىريبەسىن پايدالانا وتىرىپ, ەكسپورتقا قارجىلىق قىزمەتتەر كورسەتۋ. اگەنتتىك ەكسپورتقا باعدارلانعان وندىرىستەردى قۇرۋعا ينۆەستيتسيالىق كەزەڭدى قوسا العاندا, ەكسپورتتىق تسيكلدىڭ بارلىق كەزەڭىندە قولداۋ كورسەتەدى. شەت مەملەكەتتەردىڭ قارجى ينستيتۋتتارىن دا تارتىپ, جوبالاردى قارجىلاندىرادى. ءتىپتى قارجىلاندىرۋ قۇنىنا سايكەس جەڭىلدىكتەر الۋعا مۇمكىندىك بەرەدى. مۇنداي اگەنتتىك ورتالىق ازيادا بۇرىن-سوڭدى بولماعانىن اتاپ وتكەن ءجون. ءبىز اگەنتتىك مارتەبەسىن الا وتىرىپ, قولداۋ شارالارىن كەڭەيتىپ ۇلگەردىك. الداعى ۋاقىتتا پرەزيدەنت قويعان مىندەتتەردى جۇزەگە اسىرىپ, مەملەكەتتىك قولداۋ شارالارى بويىنشا جۇمىستى جالعاستىرامىز.
ەلىمىز قازىرگى جاھاندىق وزگەرىستەر كەزەڭىندە مەملەكەت باسشىسى ۇسىنعان دامۋدىڭ جاڭا باعدارىن ۇستانىپ, ادىلەتتى, ادال جانە قاۋىپسىز قوعام قۇرۋ جولىندا ايانباي ەڭبەك ەتۋى كەرەك.
ايان بەكتىباەۆا,
«قازاقستاننىڭ ەكسپورتتىق-كرەديتتىك اگەنتتىگى» اق باسقارما توراعاسىنىڭ ورىنباسارى
