تاسقىنعا ءتاستۇيىن دايىندىق

اۋدان اكىمىنىڭ مىندەتىن اتقارۋشى ايبەك نۇعىماروۆتىڭ ايتۋىنشا, قالاداعى الدىن الۋ شارالارى بىرنەشە باعىتتا قاتار ءجۇرىپ جاتىر.

«بۇگىنگە دەيىن قالا كوشە­لە­رىنەن 32 مىڭ تەكشە مەتر قار ارنايى بەلگىلەنگەن ورىندارعا شىعارىلدى. سونداي-اق 8,8 كم جابدىقتالعان سۋاعار ارىق­تار, 12 كم جابدىقتالماعان ارىق­تار, 85 سۋ وتكىزگىش قۇبىر تازارتىلعان. قاجەت بولعان جاع­دايدا قوسىمشا كۇشتەردى تار­تۋ قاراستىرىلعان. «اياگوز-سۋ» مەم­لەكەتتىك كوم­مۋنالدىق كا­سىپورنىنىڭ 6 سۋ سورۋ تەحني­كاسى, تەمىرجول مەكەمەسىنىڭ 3 تەحنيكاسى, №13 ءورت ءسوندىرۋ ءبولىمىنىڭ تەحنيكاسى دا­يىن. سونىمەن قاتار توتەنشە جاعدايلار بولىمىندە 5 توننا ديزەل وتىنى مەن 3 توننا اي-92 بەنزين قورى ازىرلەنگەن», دەدى ول.

اياگوزدەگى احۋالعا قاراعاندا, مۇندا ماسەلە كوبىنە-كوپ قالا ىشىندەگى وسال نۇكتەلەردى دەر كەزىندە باقىلاۋعا الىپ, ين­جە­نەرلىك جۇيەنى ۇزدىكسىز كۇتىپ ۇستاۋعا تىرەلىپ تۇر. ال اقسۋاتتاعى كورىنىس ءسال باس­قا. مۇندا دايىندىق ءبىر عانا ەلدى مەكەننىڭ نەمەسە ءبىر عانا كوشەنىڭ اينالاسىندا ەمەس, تۇتاس اۋدان اۋقىمىندا جۇيەلەنگەن. اۋدان اكىمدىگىنىڭ 2026 جىلعى 19 قاڭتارداعى قاۋلى­سىنا سايكەس «2026 جىلعى سۋ تاسقىنى كەزەڭىنە ارنالعان ءىس-شارالار» جوسپارى بەكىتىلىپ, ارنايى كوميسسيا جاساقتالعان. كوكتەمگى تاسقىن كەزىندە اۋدان كولەمىندە 45 بىرلىك تەحنيكا مەن قۇرال-جابدىق, 67 قىزمەتكەر جۇ­مىلدىرىلادى. توتەنشە جاع­دايلار بولىمىندە ارنايى تەحنيكا مەن سۋ سورۋ قۇرالدارى دايىندالعان. بۇعان قوسا اۋدان اكىمى اپپاراتى 15 موتوپومپا ازىرلەپ قويعان. ينجەنەرلىك, اۋىر تەحنيكا دا جەتكىلىكتى دەڭگەيدە توپتاستىرىلعان. «اقسۋات» كوممۋنالدىق كا­سىپور­نى بىرنەشە اۋىر جۇك كولى­گى, جۇك ارتۋشى, اۆتوگرەيدەر مەن ەكسكاۆاتوردى ساقاداي ساي ۇستاپ وتىر. «قازاۆتوجول» تاراپىنان قوسىمشا تەحنيكا جۇمىلدىرىلماقشى. بۇگىنگە دەيىن 7 285 تەكشە مەتر قار شى­عا­­رىلعان. سۋ باسۋ قاۋپى بار ەلدى مەكەندەردە الدىن الا بوگەتتەر دە جاسالعان.

«كوكتەمگى كەزەڭگە دا­يىندىق بىرنەشە اي بۇرىن باستالدى. قاۋىپتى اۋىلداردا قورعانىس بوگەتتەرى سالىندى, تەحنيكا مەن ماتەريالدىق قور دايىندالدى. قازىر جاعداي تۇراقتى, الدىن الۋ شارالارى باقىلاۋدا», دەي­دى اۋدان اكىمدىگىنىڭ ماماندارى.

اقسۋات اۋدانىندا جول مەن كوپىردىڭ احۋالىنا دا نازار اۋدارىلعان. رەسپۋبليكالىق ماڭىزى بار 148 كم جولداعى 3 كوپىر مەن 124 سۋ وتكىزگىش قۇبىردىڭ 78-ءى, سونداي-اق اۋداندىق ماڭىزى بار 460 كم جولداعى 9 كوپىر مەن 66 سۋ وتكىزگىش قۇبىر تولىق تازارتىلىپ, جۇمىس تولىق اياقتالعان.

سەمەي ماڭىنداعى ەرتىس, اياگوز توڭىرەگىندەگى وزەن ارنالارى, جارماداعى شار سۋقوي­ماسى, بورودۋليحا اۋدا­نىن­داعى كراسنىي-يار ەلدى مەكەنى – ءبارى-ءبارى باقىلاۋعا الىنعان. دايىندىق جۇمىستارى تياناق­تى ءجۇرىپ جاتىر. دەگەنمەن اۋا تەمپەراتۋراسى كۇرت كوتەرىلىپ, قار قارقىندى ەرىگەن جاعدايدا كەيبىر جەرلەردە جاعداي كۇر­دە­لەنۋى مۇمكىن. سوندىقتان وزەن ارنالارى مەن سۋ وتكىزۋ قۇ­رىلىستارىن ۋاقتىلى تازالاۋ, تەحنيكا مەن اپاتتىق بري­گا­دا­لار­دىڭ دايىن بولۋىنا ەرەكشە نازار اۋدارۋ قاجەت.

رەسمي دەرەككە سۇيەنسەك, وبلىستا سۋ تاسقىنى قاۋپى بار 64 ەلدى مەكەن انىقتالعان. ونىڭ ىشىن­دە 3 اۋىلدا قاۋىپ تولىق جو­­يىلعان, 22 ەلدى مەكەندە قاۋىپ دەڭ­گەيى تومەندەگەن, 39 ەلدى مەكەندە قاتەر ءالى ساقتالىپ تۇر. وڭىردە 42 شاقىرىمعا جۋىق قورعانىس دامبالارى سالىنىپ, نىعايتىلعان, وزەن ارنالارى تازارتىلىپ, درەناج جۇيەلەرى رەتكە كەلتىرىلگەن. قازىر ازا­مات­تىق قورعاۋ جۇيەسىنىڭ 1 436 قىزمەتكەرى مەن 543 تەحنيكاسى جوعارى دايىندىق رەجىمىنە كوشىرىلگەن. ەۆاكۋاتسيالىق پۋنكتتەردىڭ ازىرلىگى تەكسەرىلىپ, قاۋىپتى اۋماقتاردا تاۋلىك بويى باقىلاۋ جۇرگىزىلىپ وتىر.

اباي وبلىسى