بالۋان شولاق اتىنداعى مادەنيەت جانە سپورت سارايىندا جالاۋى جەلبىرەيتىن جارىستا قازاقستاننان بارلىق وڭىرىنەن كەلگەن بالۋانداردان بولەك, اقش, رەسەي, موڭعوليا, يتاليا, قىتاي, گرۋزيا, قىرعىزستان, بەلارۋس جانە وزبەكستاننىڭ اپايتوستەرى دە كۇش سىناسادى.
الماتى قالاسىنىڭ گرەك-ريم, ەركىن جانە ايەلدەر كۇرەس فەدەراتسياسىنىڭ ۆيتسە-پرەزيدەنتى دانيار وحاپوۆ وسى كۇنگە دەيىن «ارداگەر الاڭى» اتاۋىمەن وتكەن جارىستا تەك ارداگەرلەر باق سىناپ كەلگەنىمەن, بيىل ونىڭ باعدارلاماسى ايتارلىقتاي كەڭەيتىلگەنىن جانە دە 35 پەن 70 جاس ارالىعىنداعى التى ارداگەرلىك ديۆيزيوننان بولەك, 18-34 جاس ارالىعىنداعى سپورتشىلار دا بەلدەسەتىنىن تىلگە تيەك ەتتى.
ء«تۇرلى سەبەپتەرمەن ۇلكەن سپورتتا ءوز مۇمكىندىكتەرىن تولىق پايدالانا الماعان جاندارعا وسى جولى جول اشۋدى ءجون كوردىك. ياعني, قازاقستان چەمپيوناتتارىندا ىرىكتەۋدەن وتپەگەن, كەش باستاعان نەمەسە مانسابىن ەرتە اياقتاعانىمەن, كۇرەسكە دەگەن قۇلشىنىسىن جوعالتپاعان سپورتشىلار ءۇشىن «ارداگەر الاڭى» – ءوزىن كورسەتۋ الاڭى. وسى ورايدا ءتۋرنيردىڭ يدەيالىق جەتەكشىسى ءارى مەتسەنات ەرلان مالاەۆقا كۇرەس ونەرىن دامىتۋعا جانە ارداگەرلەر قوزعالىسىن جانداندىرۋعا قوسقان ۇلەسى ءۇشىن زور العىس بىلدىرەمىن. وسى ازاماتتىڭ جاناشىرلىعى مەن كاسىبي بىلىكتىلىگى وليمپيادالىق كۇرەس تۇرلەرىن وركەندەتۋگە زور ىقپالىن تيگىزىپ جاتىر», دەيدى دانيار وحاپوۆ.
جارىس اياسىندا تاريحي مۇراعا دا ەرەكشە كوڭىل بولىنەدى. كورەرمەندەر ءۇشىن قاجىمۇقان مۇڭايتپاسوۆتىڭ ءومىرى مەن جەتىستىكتەرىنە ارنالعان ارنايى كورمە ۇيىمداستىرىلادى. وندا «كۇش اتاسىنىڭ» حح عاسىر باسىنداعى ءىرى حالىقارالىق جارىستاردا جەڭىپ العان وردەندەرى مەن مەدالدارى جانە باسقا دا قۇندى جادىگەرلەرى ۇسىنىلادى. ەكسپوناتتاردىڭ ءبىر بولىگى تۇركىستان وبلىسىنداعى بالۋاننىڭ تۋعان جەرىنەن اكەلىنەدى. 2001 جىلى اشىلعان بۇل مۋزەي قورىنداعى تۇرمىستىق بۇيىمدار, بەلبەۋلەر مەن ماراپاتتار كەلۋشىلەردىڭ نازارىنا ۇسىنىلادى.
«قاجىمۇقاننىڭ 155 جىلدىق مەرەيتويى – بۇل ءتۋرنيردى وتكىزۋدىڭ باستى سەبەپتەرىنىڭ ءبىرى. «ارداگەر الاڭى» جارىسى ءار بۋىن بالۋاندارىن بىرىكتىرىپ, قازاق سپورتىنداعى ۇلى تۇلعانىڭ مۇراسىن تاعى ءبىر مارتە دارىپتەۋگە مۇمكىندىك بەرەدى», دەپ تۇيىندەدى ءوز ءسوزىن الماتى قالاسى كۇرەس فەدەراتسياسىنىڭ ۆيتسە-پرەزيدەنتى.
ءيمانجۇسىپ, بالۋان شولاق, قاجىمۇقان ۇرپاقتارى جاستارمەن جۇزدەستى
