جارىس بارىسىندا جاراقات العانىنا قاراماستان, ەلوردالىق سپورتشى تولىق مارافون قاشىقتىعىن - 42,2 شاقىرىمدى ءساتتى ەڭسەرىپ, قايسارلىقتىڭ, توزىمدىلىكتىڭ جانە سپورتقا دەگەن ادالدىقتىڭ جارقىن ۇلگىسىن كورسەتتى.
سالتانات تۇيتەباەۆ - بەلسەندى ءومىر سالتى مەن بۇقارالىق سپورتتى دامىتۋعا ۇلەس قوسىپ جۇرگەن جارقىن تۇلعا. 2025 جىلى وتانداسىمىز نيۋ-يورك مارافونىندا 80–89 جاس ساناتىندا چەمپيون اتانىپ, جارىستى 4 ساعات 45 مينۋتتا اياقتاعان. ال 2021 جىلى 75–79 جاس ساناتىندا كۇمىس جۇلدەگە يە بولدى.
سالتاناتتى قارسى الۋ راسىمىنە سپورت سالاسىنىڭ وكىلدەرى, سپورت ارداگەرلەرى, سپورتشىنىڭ تۋعان-تۋىستارى مەن جاقىندارى قاتىستى.
تۋريزم جانە سپورت ءمينيسترىنىڭ ورىنباسارى باۋىرجان راپيكوۆ بۇقارالىق سپورتتى دامىتۋ مەن سالاماتتى ءومىر سالتىن ناسيحاتتاۋدىڭ ماڭىزىنا توقتالدى.
«مەملەكەت باسشىسىنىڭ تاپسىرماسىنا سايكەس, ەلىمىزدە بۇقارالىق سپورتتى دامىتۋ كەزەڭ-كەزەڭىمەن جۇزەگە اسىرىلىپ كەلەدى. حالىقتىڭ بارلىق ساناتى ءۇشىن سپورتپەن شۇعىلدانۋعا قاجەتتى جاعداي جاسالۋدا. سالتانات تۇيتەباەۆتىڭ جەتىستىگى — قايسارلىقتىڭ, ءتارتىپتىڭ جانە سالاماتتى ءومىر سالتىنا ادالدىقتىڭ ايقىن ۇلگىسى. وسىنداي سپورتشىلار جاستارعا جىگەر بەرىپ, سپورتتىڭ جاس تالعامايتىنىن دالەلدەيدى», - دەدى باۋىرجان راپيكوۆ.
