جىلىنا 800 مىڭ توننا كۇكىرت قىشقىلىن وندىرۋگە قاۋقارلى جاڭا ءوندىرىس ورنى – «ەۆروحيم» كومپانياسىنىڭ زاماناۋي حيميا كەشەنىن سالۋعا باعىتتالعان اۋقىمدى ينۆەستيتسيالىق جوباسىنىڭ ءبىر بولىگى. جوبانىڭ جالپى ينۆەستيتسيالىق كولەمى 1 ميلليارد اقش دوللارىنا دەيىن جەتەدى.
– مەملەكەت باسشىسى قاسىم-جومارت توقاەۆ ءوز جولداۋىندا قازىرگى كەزەڭدەگى ەڭ ماڭىزدى مىندەتتەردىڭ ءبىرى – ەلدىڭ بەرىك ونەركاسىپتىك نەگىزىن قالىپتاستىرىپ, ەكونوميكالىق دەربەستىكتى نىعايتۋ ەكەنىن ايتقان بولاتىن. سوندىقتان وڭدەۋشى سەكتوردى جەدەل دامىتۋعا ايرىقشا ءمان بەرۋ قاجەت. بۇل كاسىپورىننىڭ ىسكە قوسىلۋى – ينۆەستيتسيانىڭ, زاماناۋي تەحنولوگيالاردىڭ جانە ءوڭىردىڭ وندىرىستىك الەۋەتىنىڭ ناقتى ناتيجەگە ۇلاسقانىن كورسەتەدى, – دەدى ەربول قاراشوكەەۆ.
2026 جىلدىڭ قاڭتار-ءساۋىر ايلارىنىڭ قورىتىندىسى بويىنشا جامبىل وبلىسىنا تارتىلعان نەگىزگى كاپيتالعا سالىنعان ينۆەستيتسيا كولەمى 277,2 ميلليارد تەڭگەنى قۇراپ, وتكەن جىلمەن سالىستىرعاندا 38,3 پايىزعا ارتقان. قازىر وڭىردە جالپى قۇنى 5,6 تريلليون تەڭگەنى قۇرايتىن 116 ينۆەستيتسيالىق جوبادان تۇراتىن پۋل قالىپتاسقان.
بيىل جالپى قۇنى 471 ميلليارد تەڭگە بولاتىن 47 جوبانى جۇزەگە اسىرىپ, مىڭنان استام جاڭا جۇمىس ورنىن اشۋ جوسپارلانۋدا. بۇگىندە جالپى قۇنى 144,3 ميلليارد تەڭگەنى قۇرايتىن 5 جوبا ىسكە قوسىلىپ, 485 ادام تۇراقتى جۇمىسپەن قامتىلعان.
وبلىس اكىمىنىڭ ايتۋىنشا, حيميا ونەركاسىبى جامبىل ءوڭىرى ءۇشىن ستراتەگيالىق ماڭىزعا يە. رەسپۋبليكاداعى فوسفوريت قورىنىڭ 72 پايىزى وبلىس اۋماعىندا ورنالاسقان.
قازىرگى تاڭدا ءوڭىردىڭ حيميا سالاسىندا 44 كاسىپورىن جۇمىس ىستەيدى. نەگىزگى باعىتتار قاتارىندا فوسفورلى شيكىزات ءوندىرۋ, مينەرالدى تىڭايتقىشتار شىعارۋ جانە وزگە دە حيميالىق ونىمدەر ءوندىرۋ بار. 2026 جىلدىڭ قاڭتار-ءساۋىر ايلارىندا وبلىستىڭ حيميا ونەركاسىبىندەگى ءوندىرىس كولەمى 150,6 ميلليارد تەڭگەنى قۇراپ, ءوسىم 16,5 پايىز بولعان.
«ەۆروحيم-قاراتاۋ» كومپانياسىنىڭ ءىرى جوباسى بىرنەشە كەزەڭ بويىنشا جۇزەگە اسۋدا. العاشقى كەزەڭ 2016 جىلى ىسكە اسىرىلىپ, فوسفوريت شيكىزاتىن ءوندىرۋ جانە وڭدەۋمەن اينالىساتىن تاۋ-كەن بايىتۋ كەشەنى پايدالانۋعا بەرىلگەن. بۇل كەزەڭدەگى ينۆەستيتسيا كولەمى 126 ميلليون اقش دوللارىن قۇرادى.
2026 جىلدىڭ قاڭتار-ءساۋىر ايلارىندا كاسىپورىن 8 ميلليارد تەڭگەنىڭ 344,9 مىڭ توننا ءونىمىن وندىرگەن.
قازىرگى تاڭدا جوبانىڭ ەكىنشى كەزەڭى بويىنشا قارقىندى جۇمىس جۇرگىزىلۋدە. اتاپ ايتقاندا, مينەرالدى تىڭايتقىشتار مەن يندۋستريالىق ونىمدەر شىعاراتىن ءوندىرىس كەشەنى سالىنۋدا. بيىل مامىر ايىندا ونىڭ العاشقى نىسانى – كۇكىرت قىشقىلىن وندىرەتىن زاۋىتتىڭ قۇرىلىسى اياقتالدى. ال نەگىزگى حيميا ءوندىرىسىن ىسكە قوسۋ 2027 جىلدىڭ ءبىرىنشى توقسانىنا جوسپارلانعان.
كاسىپورىننىڭ وندىرىستىك قۋاتى جىلىنا 1 ميلليون تونناعا دەيىن ءونىم شىعارۋعا مۇمكىندىك بەرەدى.
جوبانىڭ باستى ەرەكشەلىگىنىڭ ءبىرى – زاماناۋي ءارى ەكولوگيالىق قاۋىپسىز تەحنولوگيالاردىڭ قولدانىلۋى. جاڭا ءوندىرىستىڭ جاناما ءونىمى رەتىندە كالتسي ءحلوريدى مەن سينتەتيكالىق گيپس الىنباق. بۇل ونىمدەر ءتۇرلى ونەركاسىپ سالالارىندا كەڭىنەن قولدانىلادى.
قۇرىلىس كەزەڭىندە 2 مىڭعا دەيىن ادام جۇمىسپەن قامتىلسا, كاسىپورىن تولىق ىسكە قوسىلعاننان كەيىن كەمىندە 1200 تۇراقتى جۇمىس ورنى اشىلادى دەپ جوسپارلانۋدا. قازىردىڭ وزىندە «ەۆروحيم» كاسىپورىندارىندا مىڭنان استام ادام ەڭبەك ەتۋدە. بۇدان بولەك, سەرۆيستىك جانە اۋتسورسينگتىك ۇيىمداردا تاعى 300-گە جۋىق جۇمىس ورنى قۇرىلعان.
