ورنالاستىرۋ كولەمى 3.4 ملرد يۋاندى قۇرادى (500 ملن اقش دولل) اينالىس مەرزىمى 3 جىل جانە جىلدىق كۋپوندىق مولشەرلەمەسى 1.9%.
وتىنىمدەر كىتابىن قالىپتاستىرۋ بارىسىندا وبليگاتسيالارعا سۇرانىس ۇسىنىستان 2 ەسە اسىپ ءتۇستى, بۇل قىتاي ينستيتۋتسيونالدىق ينۆەستورلارىنىڭ ەكونوميكانىڭ اعىمداعى تۇراقتى ءوسۋىن جانە مەملەكەتتىك قارىزدىڭ تومەن دەڭگەيىن قامتيتىن ەلدىڭ كۇشتى ماكروەكونوميكالىق كورسەتكىشتەرىنە دەگەن جوعارى سەنىمىن كورسەتەدى.
قازاقستان وبليگاتسيالاردى قىتاي قور نارىعىنا BBB رەيتينگى بار ەلدەر اراسىندا ەڭ تومەنگى جانە AA رەيتينگى بار ەلدەر دەڭگەيىندەگى ەڭ تومەنگى مولشەرلەمە بويىنشا ورنالاستىرۋ ارقىلى رەكورد ورناتتى.
رەكوردتىق تومەن كۋپوندىق مولشەرلەمە ىسكە اسىرىلىپ جاتقان فيسكالدىق جانە سالىقتىق رەفورمالاردىڭ, سونداي-اق مەملەكەت باسشىسىنىڭ باستاماسىمەن جۇرگىزىلىپ جاتقان ساياسي وزگەرىستەردىڭ ناتيجەسى بولىپ تابىلادى.
پاندا-وبليگاتسيالاردى ورنالاستىرۋ كۆازيمەملەكەتتىك جانە كورپوراتيۆتىك ەميتەنتتەردىڭ بولاشاق شىعارىلىمدارى ءۇشىن بەنچمارك (باعدار) بەلگىلەۋگە مۇمكىندىك بەردى.
بۇل مامىلە قازاقستان مەن قىتاي اراسىنداعى جان-جاقتى ستراتەگيالىق ارىپتەستىكتى دامىتۋداعى كەزەكتى ماڭىزدى كەزەڭ بولدى جانە ەكىجاقتى قارجىلىق جانە ينۆەستيتسيالىق ىنتىماقتاستىقتىڭ تەرەڭدەۋىن كورسەتەدى.
پاندا-وبليگاتسيالار پەكين قارجى اكتيۆتەرى بيرجاسىندا جانە «استانا» حالىقارالىق قارجى ورتالىعىنىڭ بيرجاسىندا ليستينگتەن وتەدى, بۇل قازاقستان مەن قىتاي اراسىنداعى قارجىلىق ءوزارا بايلانىستى ودان ءارى نىعايتۋعا ىقپال ەتەتىن بولادى.
قارجى مينيسترلىگى بورىشتىق پورتفەلدى ارتاراپتاندىرۋعا, بورىشقا قىزمەت كورسەتۋ قۇنىن تومەندەتۋگە جانە حالىقارالىق ينۆەستورلاردىڭ قازاقستاننىڭ ەگەمەندى كرەديتتىك بەيىنىنە سەنىمىن قولداۋعا باعىتتالعان مەملەكەتتىك قارىز الۋدىڭ سالماقتى ساياساتىن ىسكە اسىرۋدى جالعاستىرادى
بۇل ورنالاستىرۋ سىرتقى مەملەكەتتىك قارىز الۋدىڭ بەكىتىلگەن باعدارلاماسى شەڭبەرىندە جۇزەگە اسىرىلدى. بۇل رەتتە مەملەكەتتىك قارىز ءالى دە 32% ليميت كەزىندە ءجىو-ءنىڭ 20% قاۋىپسىز جانە باسقارىلاتىن دەڭگەيدە ساقتالادى, بۇل الەم ەلدەرى اراسىنداعى ەڭ تومەنگى كورسەتكىشتەردىڭ ءبىرى بولىپ تابىلادى.
