قاتىسۋشىلاردىڭ نازارىنا بيزنەستى كۇن سايىن تولعاندىراتىن ماسەلەلەر شىعارىلدى: سالىقتىق اكىمشىلەندىرۋدى جەتىلدىرۋ, مەملەكەتتىك ساتىپ الۋعا قول جەتكىزۋ, كولىك لوگيستيكاسىن دامىتۋ, اوك جانە قۇرىلىس سەكتورىن قولداۋ.
«شاعىن جانە ورتا بيزنەس قاراعاندى وبلىسىنىڭ ەكونوميكاسىندا شەشۋشى ءرول اتقارادى. تۇراقتى جۇمىسپەن قامتىپ, ءوڭىر تابىسىنىڭ ەداۋىر بولىگىن قالىپتاستىرادى. مينيسترلىك رەتىندەگى ءبىزدىڭ مىندەتىمىز – ءىس جۇرگىزۋگە بارىنشا قولايلى جاعداي جاساۋ, مەملەكەتتىك قولداۋ شارالارىنىڭ تيىمدىلىگىن ارتتىرۋ جانە ولارعا ءجۇز پايىز قول جەتكىزۋدى قامتاماسىز ەتۋ», - دەدى ساعىناەۆ.
قاراعاندى ءوڭىرى كاسىپكەرلىكتى دامىتۋدا سەنىمدى سەرپىن تانىتىپ وتىر. بۇگىنگى تاڭدا مۇندا 246,4 مىڭ ادامدى جۇمىسپەن قامتاماسىز ەتەتىن 94,4 مىڭعا جۋىق شوك سۋبەكتىسى جۇمىس ىستەيدى (ەكونوميكالىق بەلسەندى حالىقتىڭ جارتىسىنا جۋىعى).
2025 جىلعى قورىتىندى بويىنشا جالپى وڭىرلىك ونىمدەگى شوك ۇلەسى 23,2% - عا وسكەن. ال وندىرىلگەن ءونىم كولەمى 4,9 ترلن تەڭگەگە جەتتى (2024 جىلعى 3,6 ترلن تەڭگەمەن سالىستىرعاندا). شوب سەكتورىنان تۇسەتىن سالىق ءتۇسىمى 11,3%-عا, 409,5 ملرد تەڭگەگە جەتتى.
2026 جىلى قاراعاندى وبلىسىندا كاسىپكەرلىكتى قارجىلىق جانە قارجىسىز قولداۋعا 14,2 ملرد تەڭگە ءبولىندى (11,6 ملرد - رەسپۋبليكالىق جانە 2,6 ملرد - جەرگىلىكتى بيۋدجەتتەن). بولىنگەن قاراجات قازىردىڭ وزىندە بەلسەندى جۇمىس ىستەۋدە: ونداعان ءىرى جوبالار قارجىلاندىرىلىپ, «ورلەۋ», «كاسىپكەر» جانە «اۋىل اماناتى» باعدارلامالارى بويىنشا قارىز بەرۋ ماقۇلدانعان.
