اتالعان ارنايى ماقساتتاعى تاۋلى-ەگەرلى پولك قازىرگى تاڭدا تمد ەلدەرى بويىنشا بىرەگەي اسكەري قۇرىلىم سانالادى. مۇندا تاۋلى ايماقتاردا قىزمەت اتقارۋعا ارنايى ۇيرەتىلگەن اتتار قولدانىلادى. اسكەري تەحنيكا وتە المايتىن قيىن شاتقالدار مەن بيىك تاۋلى جەرلەردە ءدال وسى اتتار جەكە قۇرامدى تاسىمالداپ, تاپسىرمالاردىڭ ورىندالۋىنا مۇمكىندىك بەرەدى. سونىمەن قاتار ولار وق-ءدارى, قارۋ-جاراق جانە باسقا دا اۋىر جۇكتەردى جەتكىزۋدە ماڭىزدى ءرول اتقارادى.
ادامداردى اسكەري قىزمەتكە قالاي دايىنداسا, مۇندا جىلقىلار دا سونداي دايىندىقتان وتەدى. اسكەري مامانداردىڭ ايتۋىنشا, بولىمگە اكەلىنەتىن جىلقىلاردىڭ كوپشىلىگى باستاپقىدا مۇلدە ۇيرەتىلمەگەن, ياعني سالت مىنۋگە داعدىلانباعان ءارى كوماندالاردى ورىنداۋعا بەيىم ەمەس بولادى. سوندىقتان وقۋ ەڭ قاراپايىم نەگىزدەردەن باستالادى.
ء«بىزدىڭ بولىمدەگى دايىندىق جۇيەلى تۇردە جۇرگىزىلەدى. الدىمەن اسكەري قىزمەتشى مەن ات جەكە-جەكە دايىندىقتان وتەدى. كەيىن بولىمشە, ۆزۆود جانە روتا قۇرامىندا بىرلەسكەن ءىس-قيمىلدار پىسىقتالادى», دەيدى 91678 اسكەري ءبولىمىنىڭ تاۋلى-ەگەرلىك روتاسىنىڭ كومانديرى, كاپيتان ەلنۇر پەرنەبەك.
اسكەري ءبولىم شيرەك عاسىردان استام تاريحىندا ءتۇرلى كەزەڭدى باستان وتكەرگەن. ءبولىم 2000 جىلى قورعانىس ءمينيسترىنىڭ ديرەكتيۆاسىنىڭ نەگىزىندە الماتى وبلىسىنىڭ جاركەنت قالاسىنداعى 74261 اسكەري ءبولىمىنىڭ بازاسىندا تاۋلى-ەگەرلى باتالون بولىپ قۇرىلعان. ودان كەيىن وتار گارنيزونىندا تولىقتاي جاساقتالىپ, «وڭتۇستىك» وڭىرلىك اسكەرلەرى قولباسشىلىعىنا قاراستى 85395 اسكەري ءبولىمىنىڭ قۇرامىنا كىرىپ, جۋالى اۋدانىنا شوعىرلانادى.
ال 2007 جىلى باتالون 85395 اسكەري ءبولىمىنىڭ قۇرامىنان شىعىپ, «وڭتۇستىك» وڭىرلىك اسكەرلەرى قولباسشىلىعىنا وتەدى. 2013 جىلى قورعانىس ءمينيسترىنىڭ شەشىمىنە سايكەس باتالون جەكە تاۋلى-ەگەرلى پولك دارەجەسىنە يە بولادى. العاشقى جىلدارى اسكەري قىزمەتشىلەر شاتىرلاردا تۇرىپ, بارلىق كۇش-جىگەر ينفراقۇرىلىمدى قالىپتاستىرۋعا جۇمسالعان. بۇگىندە پولك زاماناۋي بازامەن جابدىقتالىپ, اسكەري قىزمەتشىلەر مەن ولاردىڭ وتباسىلارى ءۇشىن بارلىق جاعداي جاسالعان.
«جيىرما بەس جىلدان استام ۋاقىت تاۋلى-ەگەرلى پولك بىرەگەي اسكەري ءبولىم رەتىندە ءوز مارتەبەسىن ساقتاپ كەلەدى. ءارتۇرلى جارىستاردا بىرنەشە مارتە جۇلدەلى ورىن يەلەنۋى, سونداي-اق ارميالىق حالىقارالىق ويىنداردىڭ ات سپورتى مارافونىندا جەڭىسكە جەتۋى بولىمدەگى جاۋىنگەرلىك دايىندىقتىڭ جوعارى دەڭگەيدە ەكەنىن دالەلدەيدى. ءبىزدىڭ پولك – جاي عانا اسكەري قۇرىلىم ەمەس, بۇل – نامىس, ءتارتىپ پەن ءوزارا قولداۋ باعالاناتىن ناعىز وتباسى. ءبىز الدىڭعى كومانديرلەر مەن اسكەري قىزمەتشىلەر قالىپتاستىرعان جاۋىنگەرلىك داستۇرلەردى قۇرمەتتەپ, ساقتايمىز», دەيدى پولك كومانديرىنىڭ تاربيە جانە يدەولوگيا جونىندەگى ورىنباسارى قىدىرالى اشىرباەۆ.
اسكەري ءبولىم جىلدىڭ ەكى مەرزىمىندە وتان الدىنداعى بورىشىن وتەيتىن جاس بۋىندارمەن تولىقتىرىلىپ وتىرادى. وسىلايشا كەشەگى ەرلەردىڭ جولىن جالعاعان جاۋىنگەرلەر ەر ۇستىندە قىراعىلىقپەن بەيبىت ەلدىڭ تىنىشتىعىن كۇزەتىپ كەلەدى.
نۇربولات امانبەك
