تەكسەرۋ بارىسىندا شەتەل ازاماتتارىنىڭ تۇرعىلىقتى جەرلەرى, قۇرىلىس نىساندارى, بازارلار مەن شەتەلدىك جۇمىس كۇشىن پايدالاناتىن ۇيىمدار قامتىلدى.
ناتيجەسىندە كوشى-قون زاڭناماسىن بۇزۋعا قاتىستى 13 035 قۇقىقبۇزۋشىلىق انىقتالدى. ونىڭ ىشىندە 9 359 شەتەل ازاماتى ەلدە بولۋ ءتارتىبىن بۇزعانى ءۇشىن, ال 3 828 ادام ەڭبەك قىزمەتىن زاڭسىز جۇزەگە اسىرعانى ءۇشىن اكىمشىلىك جاۋاپكەرشىلىككە تارتىلدى. سونىمەن قاتار 882 جۇمىس بەرۋشى شەتەلدىك جۇمىس كۇشىن زاڭسىز پايدالانعانى ءۇشىن جاۋاپقا تارتىلسا, 2 794 جەكە جانە زاڭدى تۇلعا شەتەل ازاماتتارىنىڭ وزدەرىندە تۇراتىنى تۋرالى پوليتسياعا ۋاقىتىلى حابارلاماعان.
سوت شەشىمىنە سايكەس كوشى-قون زاڭناماسىن بۇزعان 1 559 ادام قازاقستان اۋماعىنان شىعارىلدى. سونداي-اق 1 836 شەتەل ازاماتىنىڭ ەلدە بولۋ مەرزىمى قىسقارتىلدى. ونىڭ ىشىندە 122 ادام ءماجبۇرلى تۇردە دەپورتاتسيالانىپ, ولارعا بەس جىلعا قازاقستانعا كىرۋگە تىيىم سالىندى.
ءىس-شارا بارىسىندا قازاقستانعا زاڭسىز كىرگەن 14 شەتەل ازاماتى انىقتالدى. قازىرگى ۋاقىتتا بۇل فاكتىلەر بويىنشا شەكارا قىزمەتىمەن بىرلەسكەن تەرگەۋ ءجۇرىپ جاتىر. بۇدان بولەك, حالىقارالىق ىزدەۋدە جۇرگەن جانە ءوز ەلدەرىنىڭ قۇقىق قورعاۋ ورگاندارىنان جاسىرىنعان 21 شەتەل ازاماتى ۇستالدى.
قۇقىق قورعاۋ ورگاندارىنىڭ مالىمەتىنشە, كوشى-قون زاڭناماسىنىڭ بۇزىلۋىنا كەي جاعدايدا زاڭسىز تابىس تابۋدى كوزدەگەن قازاقستان ازاماتتارىنىڭ وزدەرى سەبەپ بولىپ وتىر. ماسەلەن, اتىراۋ وبلىسىندا شەتەل ازاماتتارىن كورشى مەملەكەتكە زاڭسىز وتكىزۋدى ۇيىمداستىرعان وتانداسىمىز ۇستالدى. وسىنداي دەرەكتەر جامبىل جانە پاۆلودار وبلىستارىندا دا تىركەلگەن.
اقتوبە وبلىسىنداعى قۇرىلىس الاڭدارىنىڭ بىرىندە رۇقساتسىز جۇمىس ىستەگەن 60-قا جۋىق شەتەل ازاماتى انىقتالدى. ال استانادا جۇمىس بەرۋشى افريكا ەلدەرىنەن كەلگەن التى ازاماتتى زاڭسىز ەڭبەككە تارتقان. سونىمەن قاتار الماتى جانە شىمكەنت قالالارىندا, قاراعاندى, الماتى, اتىراۋ, ماڭعىستاۋ, شىعىس قازاقستان, قوستاناي جانە سولتۇستىك قازاقستان وبلىستارىندا شەتەلدىكتەردى زاڭسىز جۇمىسقا تارتۋ فاكتىلەرى انىقتالدى.
زاڭ بۇزعان بارلىق تۇلعالار مەن جۇمىس بەرۋشىلەرگە قاتىستى ءتيىستى شارالار قابىلداندى. سونداي-اق ءبىر جىل ىشىندە شەتەلدىك جۇمىس كۇشىن تارتۋ قاعيدالارىن بىرنەشە رەت بۇزعان بەس جۇمىس بەرۋشىگە قاتىستى قىلمىستىق تەرگەۋ باستالدى. مۇنداي فاكتىلەر جامبىل, قاراعاندى جانە اتىراۋ وبلىستارىندا, سونداي-اق شىمكەنت قالاسىندا تىركەلگەن.
قۇقىق قورعاۋ ورگاندارى كوشى-قون زاڭناماسىنىڭ ساقتالۋىن باقىلاۋ جانە قۇقىق بۇزۋشىلىقتاردىڭ الدىن الۋ باعىتىنداعى جۇمىستاردىڭ جالعاساتىنىن مالىمدەدى.
