كەيىپكەرىمىز الاش ارىستارىنىڭ اتامەكەنى – اقتوعايدا دۇنيەگە كەلگەن. قاراعاندى مەملەكەتتىك مەديتسينا ينستيتۋتىنىڭ ەمدەۋ فاكۋلتەتىنە وقۋعا ءتۇسىپ, ونى «ەمدەۋ ءىسى» ماماندىعىمەن ءساتتى اياقتاعان, جالىنداپ تۇرعان جاس مامان اۋداندىق اۋرۋحانادا شەبەرلىگىن شىڭدادى. كۇندىز-ءتۇنى تىنىم كورمەي, سوقىرىشەك اۋرۋىنان باستاپ, پىشاق جاراقاتى, جول-كولىك وقيعاسىنان تۇسكەن اۋىر ناۋقاستار مەن ءتۇرلى سىنىققا دەيىن وپەراتسيا جاساپ, حيرۋرگيانىڭ ۇلكەن مەكتەبىنەن ءوتتى. ءسويتىپ, قيىندىعى مەن قىزىعى قاتار وربىگەن جىلدار بولاشاق بىلىكتى ماماننىڭ كاسىبي تۇرعىدان وسۋىنە سەپتىگىن تيگىزدى.
كەيىن وتورينولارينگولوگيا (لور) باعىتىندا ماماندانۋدان ءوتىپ, بۇل تاڭداۋ ونىڭ كاسىبي ومىرىندەگى جاڭا بەلەسىنە اينالدى. بالقاش قالالىق ورتالىق اۋرۋحاناسىندا 10 جىلدان استام ۋاقىت لور دارىگەرى بولىپ قىزمەت ەتىپ, قالعان سانالى عۇمىرىن قاراعاندى ءوڭىرىنىڭ مەديتسيناسىن دامىتۋعا ارنادى. قاراعاندى قالاسىنداعى №1 وڭىرلىك مەديتسينالىق بىرلەستىكتە, كەيىننەن وبلىستىق كوپپروفيلدى امبۋلاتوريالىق حيرۋرگيا ورتالىعىندا ءبولىم مەڭگەرۋشىسى بولىپ قىزمەت ەتىپ, ۇيىمداستىرۋشىلىق قابىلەتىمەن تانىلدى. 2013 جىلدان بەرى ح.ماقاجانوۆ اتىنداعى كوپبەيىندى اۋرۋحانانىڭ (بۇرىنعى وبلىستىق مەديتسينالىق ورتالىق) وتورينولارينگولوگيا بولىمشەسىنىڭ مەڭگەرۋشىسى قىزمەتىن ابىرويمەن اتقارىپ كەلەدى.
نۇرلان قۇلماعامبەت ۇلى – وبلىستا لور-حيرۋرگيا سالاسىنا زاماناۋي تەحنولوگيالاردى العاش بولىپ ەنگىزگەن جاڭاشىل مامان. ول 2016 جىلى وبلىس كولەمىندە تۇڭعىش رەت تيمپانوپلاستيكا وپەراتسياسىن جاسادى. جەڭىل انەستەزيامەن جاسالاتىن بۇل وپەراتسيا مەملەكەتتىك كەپىلدەندىرىلگەن كومەك اياسىندا تولىعىمەن تەگىن جۇزەگە اسىرىلادى, ناتيجەسىندە, ناۋقاستاردىڭ 90%-ىندا ەستۋ قابىلەتى تولىعىمەن قالپىنا كەلەدى. بولىمشە بازاسىندا قاراعاندى مەديتسينا ۋنيۆەرسيتەتىنىڭ لور-كافەدراسىنىڭ ورنالاسۋى دا ەمدەۋ ساپاسىن عىلىمي دەڭگەيگە كوتەردى.
سونىمەن قاتار حيرۋرگ وڭىردە العاشقىلاردىڭ ءبىرى بولىپ ۆيدەوەندوسكوپيالىق قۇرىلعى (لور-ستويكا) ارقىلى وپەراتسيا جاساۋ ءادىسىن ەنگىزدى. بۇرىن قۇلاق ىشىنە كىرۋ باعىتىندا ۇلكەن تىلىك جاسالىپ, بالعامەن ۇرۋ سياقتى اۋىر ءارى جاراقاتتى ادىستەر قولدانىلسا, قازىر وپەراتسيا مۇلدەم تىلىكسىز, قانسىز ورىندالادى. بۇل جاڭالىق ناۋقاستاردىڭ تەز ساۋىعۋىنا سەپتىگىن تيگىزدى. بۇرىنىراقتا ناۋقاستار وپەراتسيادان سوڭ ايلاپ اۋرۋحانادا جاتسا, قازىر زاماناۋي اپپاراتتىڭ ارقاسىندا 3–4 كۇندە جازىلىپ شىعادى.
بۇگىندە تاجىريبەلى دارىگەر قىزمەت ەتەتىن بولىمشە – قاراعاندى وبلىسى كولەمىندە شۇعىل وپەراتسيا جاسايتىن جالعىز لور-بولىمشە. مۇندا قۇلاقتان نەمەسە گايمور پازۋحاسىنان ءىرىڭ ميعا شاۋىپ, مەنينگوەنتسەفاليت, باس ميىنىڭ ابستسەسى سياقتى اۋىر اسقىنۋمەن كەلەتىن ناۋقاستارعا دەر كەزىندە وپەراتسيا جاسالىپ, قاجەت جاعدايدا نەيروحيرۋرگتەرمەن, وفتالمولوگتەرمەن بىرلەسكەن كۇردەلى وپەراتسيالار دا ءساتتى جۇزەگە اسىرىلادى.
ىسكەر, ىزدەنگىش مامان كۇندەلىكتى ومىردە انتروماستويدوتوميا, مۇرىن پەردەسىن رەزەكتسيالاۋ, تونزيللەكتوميا سەكىلدى كوپتەگەن جوسپارلى, شۇعىل وپەراتسيانى جاساۋمەن قاتار, پلاستيكالىق حيرۋرگيا باعىتىن دا ءساتتى مەڭگەرىپ, مۇرىن اقاۋلارىن تۇزەتۋ ارقىلى پاتسيەنتتەرگە دەنساۋلىق قانا ەمەس, سەنىمدىلىك تە سىيلاپ كەلەدى.
جوعارى ساناتتى دارىگەر كاسىبي بىلىكتىلىگىن ارتتىرۋ ماقساتىندا گەرمانيادا, رەسەيدە (سانكت-پەتەربۋرگ, قازان), الماتى قالاسىندا بىرنەشە رەت ارنايى كۋرستاردان ءوتتى. سونداي-اق ول جيناعان تاجىريبەسىن شاكىرتتەرىنە باعىت-باعدار رەتىندە بەرىپ كەلەدى.
بۇگىندە نۇرلان قۇلماعامبەت ۇلى ارىپتەستەرىنىڭ اراسىندا زور قۇرمەتكە, مىڭداعان ەمدەلۋشىلەردىڭ شەكسىز العىسىنا بولەنگەن جان. ءوزىنىڭ نەگىزگى قىزمەتىمەن قاتار وبلىستىڭ شتاتتان تىس باس وتورينولارينگولوگى رەتىندە دە وڭىردەگى وسى سالانىڭ جۇمىسىن ۇيلەستىرىپ وتىر.
التىن قولدى حيرۋرگتىڭ مەديتسيناداعى 40 جىلدان اسا قاجىرلى ەڭبەگى ەلەنىپ, «دەنساۋلىق ساقتاۋ ءىسىنىڭ ۇزدىگى» توسبەلگىسىمەن, «التىن دارىگەر», «ەڭبەك ارداگەرى» مەدالدارىمەن, ەلىمىز كولەمىندە ساناۋلى مامانعا عانا بۇيىرعان ءال-فارابي اتىنداعى وتورينولارينگولوگيانىڭ جەكە مەدالىمەن ماراپاتتالعان. سونداي-اق قاراعاندى وبلىسى اكىمىنىڭ «ۇزدىك حيرۋرگ» سىيلىعىنىڭ يەگەرى. تاجىريبەلى دارىگەر وتكەن جولىنا قاراپ, كاسىبي تۇرعىدان قالىپتاسۋىنا باعىت-باعدار بەرگەن تالىمگەرلەرىن ەرەكشە ىلتيپاتپەن ەسكە الادى.
– مەنىڭ مۇنداي كاسىبي جەتىستىككە جەتۋىمە ەڭ الدىمەن ۇستازدارىم – جوعارى ساناتتى, بىلىكتى حيرۋرگتەر قۋات راقىمجان مەن جۇما شاياحمەتوۆتىڭ سەپتىگى ءتيدى. وسى ءبىر كۇردەلى دە جاۋاپتى سالانىڭ قىر-سىرىن ۇيرەتىپ, لور-حيرۋرگياعا باۋلىعان دا وسى كىسىلەر ەدى. سول الدىڭعى تولقىننان العان ءبىلىم مەن تاجىريبەنىڭ ارقاسىندا قازىر ءوزىمىز دە ۇستاز اتاندىق, – دەيدى نۇرلان قۇلماعامبەت ۇلى.
«ۇستازى جاقسىنىڭ – ۇستانىمى جاقسى» دەگەن, بۇگىندە كەيىپكەرىمىزدىڭ سوڭىنان ەرگەن 100-گە تارتا شاكىرتى بار. شاكىرتتەرى ەلىمىزدىڭ تۇكپىر-تۇكپىرىندەگى ءتۇرلى مەديتسينالىق مەكەمەلەردە حالىقتىڭ العىسىنا بولەنىپ ءجۇر. بۇل – دارىگەر ءۇشىن ماراپات اتاۋلىنىڭ بارىنەن دە بيىك, ەڭ ۇلكەن مارتەبە.
التىن قولدى دارىگەردىڭ سان سالالى, اۋىر قىزمەتىندەگى ەڭ ۇلكەن تىرەگى دە, شابىت كوزى دە – بەرەكەلى شاڭىراعى. اياۋلى جارى ماقپال – وتكەن جىلدارى ءىرى كورپوراتسيادا اۋديت سالاسىن باسقارعان بىلىكتى ەكونوميست, بۇگىندە بەينەتتىڭ زەينەتىن كورىپ وتىرعان اسىل انا, ارداقتى اجە. ەكەۋى ءوسىرىپ-جەتكىزگەن پەرزەنتتەرى دە قوعامنان ءوز ورىندارىن تاپقان بىلىكتى ماماندار. ۇلى باۋىرجان زاڭ سالاسىندا جاۋاپتى قىزمەت اتقارادى, قىزى بايان – بانك سالاسىنىڭ قىزمەتكەرى. بۇگىندە نۇرلان دارىگەردىڭ ءامىرلان, ءاليحان, ءادينا ەسىمدى سۇيكىمدى نەمەرەلەرىنىڭ قىزىعىنا تويماي, ولاردىڭ ءاربىر جەتىستىگىنە بالاشا قۋانىپ, باقىتقا كەنەلىپ وتىرعان جايى بار.
قاراعاندى وبلىسى
