قازاقستان ۇكىمەتىنىڭ مالىمەتىنشە, يران بيلىگى ورمۇز بۇعازىنىڭ سولتۇستىك جاعالاۋىندا ورنالاسقان شاحيد رادجاي تەرەڭ سۋ پورتى اۋماعىنان جەر تەلىمىن بەرۋ راسىمدەرىن اياقتاعان. سوڭعى قۇقىقتىق ماسەلەلەر رەتتەلگەننەن كەيىن نىسان قازاقستان تاراپىنىڭ قاراۋىنا وتەدى.
سونىمەن قاتار يران قازاقستانعا ءۇندى مۇحيتىنا شىعاتىن ماڭىزدى تەڭىز قاقپالارىنىڭ ءبىرى سانالاتىن چاباحار پورتىن دامىتۋ جوباسىنا قاتىسۋ مۇمكىندىگىن ۇسىنىپ وتىر. بۇل باعىت وڭتۇستىك جانە وڭتۇستىك-شىعىس ازيا نارىقتارىنا شىعۋدىڭ ەڭ قىسقا جولدارىنىڭ ءبىرى رەتىندە قاراستىرىلادى.
ترامپ يرانمەن جاسالعان كەلىسىمنىڭ نەگىزگى شارتتارىن جاريالادى
كەزدەسۋ بارىسىندا تاراپتار حالىقارالىق «سولتۇستىك – وڭتۇستىك» كولىك ءدالىزىن دامىتۋ ماسەلەلەرىن دە تالقىلادى. رەسمي دەرەكتەرگە سايكەس, 2025 جىلدىڭ قورىتىندىسىندا وسى باعىت بويىنشا جۇك تاسىمالى 12 پايىزعا ءوسىپ, 3,5 ميلليون تونناعا جەتكەن. ال قازاقستان مەن يران اراسىنداعى تەمىرجول ارقىلى تاسىمال كولەمى 69 پايىزعا ارتقان.
ترانزيتتىك الەۋەتتى كۇشەيتۋ ماقساتىندا ەكى ەل كولىك ينفراقۇرىلىمىن جاڭعىرتۋ جونىندەگى بىرلەسكەن جول كارتاسىن ازىرلەۋگە ۋاعدالاستى. جوبا جۇزەگە اسقان جاعدايدا ءدالىزدىڭ وتكىزۋ قابىلەتى جىلىنا 20 ميلليون توننا جۇككە دەيىن ۇلعايۋى مۇمكىن.
سونداي-اق قازاقستان, رەسەي, تۇرىكمەنستان جانە يران اراسىندا تاريفتىك ىنتىماقتاستىقتى كەڭەيتۋ ماسەلەسى قاراستىرىلىپ جاتىر. بۇل وڭىرلىك ترانزيت باعىتتارىنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى.
