استانا قالاسى پاراقورلىق ءىسى بويىنشا كوش باستاپ تۇر

Ranking.kz مالىمەتىنشە, 2026 جىلدىڭ العاشقى بەس ايىنىڭ قورىتىندىسى بويىنشا ەلىمىزدە پاراقورلىققا قاتىستى 427 قىلمىستىق ءىس تىركەلگەن. بۇل وتكەن جىلدىڭ سايكەس كەزەڭىمەن سالىستىرعاندا 1,7% كوپ. ايتا كەتەيىك, تالداۋ تەك ءۇش باپ بويىنشا جۇرگىزىلگەن: «پارا الۋ», «پارا بەرۋ» جانە «پاراقورلىققا دەلدال بولۋ».

قاڭتار-مامىر ايلارىندا تىركەلگەن قىلمىستىق ىستەر سانى بويىنشا استانا قالاسى كوش باستادى. استانادا اتالعان باپتار بويىنشا 56 ءىس تىركەلىپ, وتكەن جىلمەن سالىستىرعاندا كورسەتكىش 21,7%-عا وسكەن. ساراپشىلار مۇنى ورتالىق مەملەكەتتىك ورگانداردىڭ شوعىرلانۋىمەن بايلانىستىرادى. ەكىنشى ورىندا – قوستاناي وبلىسى تۇر. وڭىردە پاراقورلىققا قاتىستى ىستەر سانى 3,5 ەسە ءوسىپ, 38-گە جەتكەن. ءۇشىنشى ورىنعا الماتى قالاسى جايعاستى – مۇندا 32 ءىس تىركەلىپ, ءوسىم 14,3 پايىزدى قۇرادى. ال ەڭ تومەن كورسەتكىش اباي (1 ءىس), اقمولا (2 ءىس) جانە باتىس قازاقستان (7 ءىس) وبلىستارىندا بايقالدى.

پاراقورلىققا قاتىستى قىلمىستىق ىستەر سانىنىڭ ەڭ جوعارى ءوسىمى الماتى وبلىسىندا تىركەلدى – كورسەتكىش ءبىر جىلدا 4 ەسە ارتقان. سونداي-اق قىزىلوردا وبلىسىندا ءوسىم 66,7 پايىزدى, جامبىل وبلىسىندا 61,1 پايىزدى قۇرادى.

كەرىسىنشە, بىرقاتار وڭىرلەردە مۇنداي قىلمىستىق ىستەر سانى ايتارلىقتاي ازايعان. اتاپ ايتقاندا, سولتۇستىك قازاقستان وبلىسىندا كورسەتكىش 2,1 ەسە, پاۆلودار وبلىسىندا 2,4 ەسە, باتىس قازاقستان وبلىسىندا 2,6 ەسە تومەندەگەن. ال اقمولا وبلىسىندا تىركەلگەن ىستەر سانى وتكەن جىلمەن سالىستىرعاندا 13 ەسە ازايعان.

ەسكە سالا كەتەيىك, سەناتورلار سىبايلاس جەمقورلىققا قارسى جاڭا زاڭداردى قابىلدادى. جاڭا نورمالارعا سايكەس, ەندى مەملەكەتتىك قىزمەتشىلەر مەن ولارعا تەڭەستىرىلگەن تۇلعالارعا قىزمەتتىك وكىلەتتىكتەرىن جەكە مۇددە ءۇشىن پايدالانۋعا قاتاڭ تىيىم سالىنادى. ەڭ ماڭىزدى وزگەرىستەردىڭ ءبىرى – ەندى پارا بەرۋگە ۋادە ەتۋ, ۇسىنۋ نەمەسە تالاپ ەتۋ دە قىلمىستىق جاۋاپكەرشىلىككە جاتقىزىلاتىن بولدى.

جانبوتا باحىتبەك,

ەۇۋ ستۋدەنتى