كەيىن ءوزى دە ۇستاز رەتىندە شاكىرتتەرىن الەمدىك ءبىلىم جۇيەسىمەن, ءارتۇرلى مادەنيەتپەن تانىسۋعا ىنتالاندىرىپ, ولاردى ەۋروپانىڭ مادەني جانە تاريحي ورتالىقتارىنا باستاپ بارىپ ءجۇردى. ستۋدەنتتەرى العاش رەت شەتەلگە شىعىپ, اعىلشىن تىلىندە ەركىن سويلەسۋگە ىنتالانعانىن كورگەن ول سول اسەردەن ءالى ارىلا الماي ءجۇر.
ەڭبەك جولىن استاناداعى ەۋرازيا گۋمانيتارلىق ينستيتۋتىنىڭ جوعارى كوللەدجىندە اعىلشىن ءتىلى وقىتۋشىسى رەتىندە باستاعان قارلىعاش كەيىن جەكە ءبىلىم سالاسىنا بەت بۇردى. ول استانادا «Eager Beaver» ءتىل ورتالىعىن اشىپ, جۇزدەگەن وقۋشى مەن ستۋدەنتتىڭ اعىلشىن ءتىلىن مەڭگەرۋىنە كومەكتەستى. ونىڭ شاكىرتتەرى ءتۇرلى وليمپيادالار مەن ءبىلىم سايىستارىندا جوعارى ناتيجەلەر كورسەتىپ, جۇلدەلى ورىندارعا يە بولدى. ۇستاز ءۇشىن ەڭ ۇلكەن ماراپات, ارينە, شاكىرتتەرىنىڭ جەتىستىگى. قارلىعاشتىڭ كاسىبي قىزمەتىنىڭ باستى ەرەكشەلىگى دە وسى ۇستانىمنان ايقىن كورىنەدى.
ماگيستراتۋرادا وقىپ جۇرگەن كەزىندە قارلىعاش اقش-تاعى «JNCL-NCLIS Leadership & Advocacy Program» باعدارلاماسىنا قاتىسۋ مۇمكىندىگىنە يە بولدى. سان تەستتەن ءوتىپ, ىرىكتەلگەن ول ۆاشينگتوندا تاعىلىمدامادان ءوتتى. سول ساپار ونىڭ ومىرىندەگى ماڭىزدى كەزەڭدەردىڭ بىرىنە اينالدى. الەمنىڭ تۇكپىر-تۇكپىرىنەن بارعان ادامدار, ءتۇرلى مادەنيەتتەردىڭ توعىسى, جاڭا مۇمكىندىكتەرگە تولى ورتا ونىڭ بالا كۇنگى ارماندارىنىڭ ءبىرىن ورىنداعانداي بولدى. سول كەزدە ول كەيىن كەلە امەريكاعا قايتا بارىپ, حالىقارالىق دەڭگەيدە ءبىلىم الۋدى ماقسات ەتتى. ارادا بەس جىل وتكەندە بۇل ارمانى شىندىققا اينالدى. كوپ وتپەي قارلىعاش «بولاشاق» حالىقارالىق باعدارلاماسى ستيپەندياسىن جەڭىپ الدى.
«بوستون ۋنيۆەرسيتەتىندە ءبىلىم الا ءجۇرىپ, حالىقارالىق دەڭگەيدەگى اعىلشىن ءتىلى مۇعالىمدەرىن دايارلايتىن ەڭ بەدەلدى باعدارلامالاردىڭ ءبىرى – CELTA كۋرسىن Pass B ناتيجەسىمەن اياقتادىم. بۇل كورسەتكىش – الەم بويىنشا وسى باعدارلامانى تامامداعان مۇعالىمدەردىڭ شامامەن ۇزدىك 20-25 پايىزىنا عانا بەرىلەتىن جوعارى ناتيجە. اتالعان جەتىستىك مەنىڭ كاسىبي دايىندىعىمنىڭ ساپاسىن جانە ۇزدىكسىز دامۋعا دەگەن ۇمتىلىسىمدى ايقىن دالەلدەيدى. اقش-تا ءبىلىم الا ءجۇرىپ, مەن تەك ستۋدەنت رەتىندە عانا ەمەس, كاسىبي مامان رەتىندە دە بەلسەندى دامىدىم. سونىمەن بىرگە حالىقارالىق كونفەرەنتسيالارعا قاتىسىپ, الەمنىڭ تۇكپىر-تۇكپىرىنەن كەلگەن ءبىلىم سالاسىنىڭ ماماندارىمەن تاجىريبە الماستىم. ۋاقىت وتە كەلە ءوزىمنىڭ باستى ميسسيامنىڭ ءبىرى – حالىقارالىق ءبىلىم بەرۋ مۇمكىندىكتەرى تۋرالى اقپاراتتى ەلىمىزدىڭ مۇعالىمدەرىنە جەتكىزۋگە قۇلشىنىپ ءجۇرمىن», دەيدى ول.
وسى باعدارلاما اياسىندا ول وتباسىمەن بىرگە امەريكا قۇراما شتاتتارىنا قونىس اۋدارىپ, الەمنىڭ جەتەكشى جوعارى وقۋ ورىندارىنىڭ ءبىرى سانالاتىن بوستون ۋنيۆەرسيتەتىنە وقۋعا قابىلداندى. مۇندا ول TESOL & Applied Linguistics باعدارلاماسى بويىنشا ەكىنشى ماگيسترلىك دارەجەسىن الدى. بۇل كەزەڭ ونىڭ اكادەميالىق ءارى كاسىبي دامۋىنا جاڭا سەرپىن بەردى. الەمنىڭ ءتۇرلى ەلدەرىنەن كەلگەن ماماندارمەن بىرگە ءبىلىم الۋ قارلىعاشقا حالىقارالىق تاجىريبە جيناقتاپ, زاماناۋي ءبىلىم بەرۋ تاسىلدەرىن تەرەڭ زەرتتەۋگە مۇمكىندىك بەردى.
امەريكاداعى وقىعان جىلدارى قارلىعاشتىڭ تاعى ءبىر ماڭىزدى باستاماسىنا جول اشتى. ول حالىقارالىق باعدارلامالار مەن كاسىبي دامۋ مۇمكىندىكتەرى تۋرالى اقپاراتتىڭ ەلىمىزدەگى, اسىرەسە اۋىلداعى مۇعالىمدەرگە جەتكىلىكسىز ەكەنىن بايقادى. وسى ولقىلىقتىڭ ورنىن تولتىرۋ ماقساتىندا الەۋمەتتىك جەلىدە «Coffee, Tea & Chalk» قاۋىمداستىعىن قۇردى. وسى الاڭ ارقىلى ۇستازدار حالىقارالىق گرانتتار, كونفەرەنتسيالار, تاعىلىمدامالار مەن كاسىبي دامۋ باعدارلامالارى تۋرالى اقپارات الادى. قارلىعاش تۇراقتى تۇردە تەگىن ۆەبينارلار وتكىزىپ, ارىپتەستەرىنە حالىقارالىق مۇمكىندىككە جول اشۋعا كومەكتەسىپ كەلەدى.
قارلىعاش ءناديمنىڭ ءومىر جولى تورعايداعى قاراپايىم اۋىلدان باستالىپ, استانا, ەۋروپا, ءتىپتى سوناۋ امەريكاعا جالعاسقان ءبىلىم ساپارىنا ۇلاستى. زاڭعار جازۋشى مۇحتار اۋەزوۆتىڭ «حالىق پەن حالىقتى, ادام مەن ادامدى تەڭەستىرەتىن – ءبىلىم» دەگەن اسىل ءسوزى قارلىعاش سىندى تالاپتى جاستىڭ ومىرىنە قاراتا ايتىلعانداي. ونىڭ تورعايدان بوستونعا دەيىن ءبىلىم سوقپاعى – زامانداستارىنا ۇلگى.
