دۇبىرگە بولەنگەن دۋماندا توقتار اۋىلىنان كەلگەن ازامات قوي ت ۇلىبىن 120 رەت, ىنتالى اۋىلىنان كەلگەن قاتىسۋشى 125 رەت كوتەرىپ, جوعارى ناتيجە كورسەتتى. ال جارىستىڭ ۇزدىك كورسەتكىشىن اقتوبە اۋىلىنىڭ تۇرعىنى تىركەپ, مۋلياجدى 200 رەت كوتەردى. دەسەك تە, ءالدى ازاماتتارمەن قاتار قاجىر-قايراتىن دالەلدەگەن جانەل قۇسايىنوۆانىڭ ونەرى «Baiqymyz» ەتنوفەستيۆالىنىڭ ەڭ ەستە قالارلىق ساتتەرىنىڭ ءبىرى بولدى.
سوڭعى رەت كوتەرىپ, مەجەنى 150-گە جەتكىزگەن سوڭ, حالىققا باسىن يگەن باتىر قىزعا ۇيىمداستىرۋشىلار ەستەلىك سىيلىقتار تابىس ەتتى. كوپشىلىك ىشىنەن اقتوعاي اۋدانىنىڭ داۋرەن ەسىمدى ءمارت ازاماتى ساحنا الاڭىنا سۋىرىلىپ شىعىپ, رۋحتى قىزعا 100 مىڭ تەڭگە تارتۋ ەتتى. ال قارااعاش اۋىلىنىڭ جىگىتتەرى قازاقى داستۇرمەن يىعىنا وقالى قامزول جاۋىپ, قۇرمەت كورسەتتى.
جانەل – ساران قالاسىنىڭ تۋماسى. ول بالا كەزىنەن سپورتپەن شۇعىلدانادى. بوزكىلەمدە قارسىلاس شاق كەلتىرمەي جۇرگەن گرەپپلينگ جانە دجيۋ-دجيتسۋ شەبەرى. كەيىپكەرىمىزدىڭ ايتۋىنشا, ول بۇعان دەيىن دە ءتۇرلى مەرەكەلەردە وسىنداي سايىستاردى كورىپ, قاتىسقىسى كەلگەنىمەن, ۇيالىپ ءجۇرىپتى.
«مۇنداي سايىسقا ءبىرىنشى رەت قاتىستىم. كورىپ ءجۇرىپ قاتتى قىزىعاتىنمىن, بىراق ۇيالاتىن ەدىم. وسى جولى تاۋەكەل ەتۋگە جۇرەكسىنىپ تۇرعانىمدا, جانىمداعى بولەم گۇلميرا ساحناعا شىعۋىما كۇش بەردى», – دەيدى ەل اۋزىندا جۇرگەن باتىر قىز.
جانەل ورتاعا شىققانعا دەيىن جىگىتتەر اراسىنداعى كورسەتكىش 120 رەت بولعان ەكەن. ەل الدىنا شىققاندا بويىن نامىس كەرنەگەن بويجەتكەن الدىنا ءبىر عانا ماقسات قويادى: ەرلەر ورناتقان مەجەنى جاڭارتىپ, قىزداردىڭ دا مىقتى بولا الاتىنىن دالەلدەۋ!
«كورسەتكىش 100-دەن اسىپ بارا جاتقاندا, رەكوردتى جاڭارتاتىنىمدى سەزدىم. ىشىمدە تەك قانا «وزۋ كەرەك» دەگەن وي بولدى. مەن ءۇشىن 35 كيلولىق سالماق قاتتى اۋىر بولعان جوق. سەبەبى اپتاسىنا 4–5 رەت جاتتىعۋ زالىندا زىلتەمىر كوتەرىپ, شىنىعامىن», دەيدى ول.
ەلىمىزدىڭ كوك تۋىن حالىقارالىق ارەنالاردا جەلبىرەتىپ جۇرگەن سپورتشى قىز قوي كوتەرۋدەن باق سىناپ, وسىنشاما حالىقتىڭ العىس-ماحابباتى مەن قولداۋىنا بولەنەمىن دەپ ويلاماعانىن جاسىرمايدى. «جۇلدىز بولامىن دەپ ويلاعان جوقپىن, ارينە. باعدارلامالارعا شاقىرىپ, سۇحباتتاسىپ جاتقانى – ەرەكشە سەزىم. سپورت – دەنساۋلىق كەپىلى, سوندىقتان بولاشاقتا بۇل جولىمدى ماقتانىشپەن جالعاستىرا بەرەمىن», دەيدى چەمپيون اعىنان جارىلىپ.
