ۇلتتىق بوياۋ مەن تابيعاتتىڭ تىلسىم ۇيلەسىمىن توعىستىرعان «جانىمنىڭ باقتارى» كورمەسى كورەرمەندى سۋرەتشىنىڭ ىشكى الەمىنە جەتەلەيدى. كەنەپ بەتىندە تۋعان جەردىڭ تۇمسا تابيعاتى, قازاقى بولمىس پەن ادام جانىنىڭ نازىك يىرىمدەرى كوركەم تىلمەن ورنەكتەلگەن. ءبىر ۇققانىمىز – قىلقالام شەبەرى ادام جانىنىڭ تازالىعىنا ۇڭىلۋگە شاقىرادى.
«كورمەنىڭ تۇتاس ەكسپوزيتسياسى سۋرەتشىنىڭ جان دۇنيەسىندەگى گۇلدەنگەن باقتاي اسەر قالدىرادى. مۇنداعى ءار كارتينا وزىنشە سىر شەرتىپ, ءار بوياۋ وزىنشە سويلەيدى. قازاقى دۇنيەتانىم, تابيعاتتىڭ كوركەم كەلبەتى مەن ۇلتتىق قۇندىلىقتار ءبىر ارناعا توعىسىپ, كورەرمەنگە ەستەتيكالىق ءلاززات سىيلايدى, سول ارقىلى تۋعان ەلدىڭ رۋحاني بايلىعىن تەرەڭىرەك سەزىنۋگە جەتەلەيدى», دەيدى ونەرتانۋشى بالجان زامانبەكوۆا.
كورمە زالىنا ەنگەن ساتتەن-اق كەلۋشىنى الۋان بوياۋعا كومكەرىلگەن وزگەشە الەم قارسى الادى. قابىرعاعا قاتار ىلىنگەن كارتينالاردا قازاق دالاسىنىڭ تىنىسى, اسقار الاتاۋدىڭ ايبىنى, ۇلتتىق سالت-ءداستۇردىڭ مايەگى مەن ادام جانىنداعى نازىك سەزىمدەر توعىسقان. ءار تۋىندى – سۋرەتشىنىڭ ومىردەن تۇيگەن ويى مەن جۇرەك سىرىن بوياۋ تىلىمەن سويلەتكەن وزىنشە ءبىر الەم ىسپەتتى.
كورمەنىڭ اشىلۋ سالتاناتىندا ۇلتتىق ورتالىق مۋزەيدىڭ قوعاممەن بايلانىس ءبولىمىنىڭ جەتەكشىسى اننا كۋششەنكو قۇتتىقتاۋ ءسوز سويلەپ, مۋزەيدىڭ تاريحي-مادەني مۇرانى جانە بەينەلەۋ ونەرىن ناسيحاتتاۋداعى, سونداي-اق جاستاردى ەلىمىزدىڭ زاماناۋي سۋرەتشىلەرىنىڭ شىعارماشىلىعىمەن تانىستىرۋداعى ءرولىن اتاپ ءوتتى.
كورمە بارىسىندا سۋرەتشىنىڭ ونەردەگى قاناتتاس-قالامداستارى ءسوز الىپ, ونىڭ تۋىندىلارىندا قازاق ەتنوگرافياسى مەن تابيعات كورىنىستەرى دارا مانگە يە ەكەنىن, رىسبەك ىسقاقوۆ ءوز ەڭبەكتەرىندە انا, وتباسى, ماحاببات تاقىرىپتارىن جىرلاي وتىرىپ, جالپىادامزاتتىق قۇندىلىقتاردى دارىپتەيتىن ليريكالىق وبرازدارعا باسىمدىق بەرەتىنى ايتىلدى.
ونەر جارمەڭكەسى 19 ماۋسىمعا دەيىن جالعاسادى.
الماتى
