فوتو: Krisztian Bocsi/Bloomberg
SpaceX ءبىر اكتسيانى 135 دوللاردان باعالاپ, 555,6 ميلليون اكتسيانى باستاپقى جاريا ورنالاستىرۋ اياسىندا ساتقان. ناتيجەسىندە كومپانيا 75 ميلليارد دوللار ينۆەستيتسيا تارتقان. بۇل الەم تاريحىنداعى ەڭ ءىرى IPO رەتىندە تىركەلدى.
كومپانيا اكتسيالارىنىڭ ساۋداسى بۇگىن, 12 ماۋسىمدا Nasdaq بيرجاسىندا باستالادى. العاشقى باعالاۋ بويىنشا SpaceX-ءتىڭ نارىقتىق قۇنى 1,77 تريلليون دوللارعا جەتكەن.
ساراپشىلاردىڭ ەسەپتەۋىنشە, يلون ماسكتىڭ SpaceX-تەگى ۇلەسىنىڭ قۇنى شامامەن 866 ميلليارد دوللاردى قۇرايدى. ال Tesla مەن وزگە دە اكتيۆتەرىن قوسا ەسەپتەگەندە كاسىپكەردىڭ جالپى بايلىعى 1,1 تريلليون دوللاردان اسادى.
وسىلايشا, ماسك الەمدەگى بايلىعى 1 تريلليون دوللار مەجەسىنەن اسقان العاشقى ادام اتانىپ وتىر. سالىستىرۋ ءۇشىن ايتساق, الەمدەگى ەڭ باي ادامدار تىزىمىندە ەكىنشى ورىندا تۇرعان Alphabet كومپانياسىنىڭ نەگىزىن قالاۋشى لارري پەيدجدىڭ بايلىعى شامامەن 300 ميلليارد دوللاردى قۇرايدى.
سونىمەن قاتار SpaceX تابىس جولىندا ءىرى شىعىندارعا دا تاپ بولىپ وتىر. كومپانيا 2025 جىلى 18,67 ميلليارد دوللار تابىس تاپقانىمەن, 4,94 ميلليارد دوللار شىعىنعا ۇشىراعان. ال 2026 جىلدىڭ العاشقى توقسانىندا 4,7 ميلليارد دوللار كىرىس كورسەتكەنىمەن, 4,28 ميلليارد دوللار كولەمىندە شىعىن تىركەلگەن.
شىعىنداردىڭ باسىم بولىگى Starship اۋىر زىمىران جۇيەسىن سىناقتان وتكىزۋ جۇمىستارىنا جۇمسالعان.
ەسكە سالا كەتەيىك, بۇعان دەيىن يلون ماسك OpenAI مەن ونىڭ باسشىسى سەم التمانعا قارسى سوت ىسىندە جەڭىلىپ قالعان ەدى. OpenAI ىسىنەن كەيىن دە كاسىپكەر سوت شەشىمىن سىنعا الىپ, ۇكىمگە شاعىم تۇسىرەتىنىن مالىمدەدى.
