بەيىمبەت ولەڭىندە ناۋرىز مەرەكەسى, كوكتەمنىڭ كەلۋىمەن, اۋىل ءومىرى مەن حالىقتىڭ تۇرمىس-تىرشىلىگىن قاتار سۋرەتتەيدى. مەرەكەمەن بىرگە حالىقتىڭ تۇرمىسىنداعى قيىندىقتاردى دا شىنايى بەينەلەيدى. سول سەبەپتى ولەڭدى وقىپ وتىرعاندا ەكى ءتۇرلى كوڭىل كۇي قاتار بەرىلگەنىن بايقايسىڭ.
ولەڭ ءۇش بولىمنەن تۇرادى. ءبىرىنشى بولىمدە كوكتەمنىڭ كەلۋى, ۇلجان انانىڭ بالاعا دەگەن مەيىرىمى ءسوز بولادى. تابيعاتتىڭ جاندانعانىن كورگەن ۇلجان انا:
«قالىڭ قار ەرىپ, سۋ بولىپ,
ساي سالالار كۇرىلدەر.
كوك ءشوبى شىعىپ جەلكىلدەپ,
ەرتەڭ دۇنيە ك ۇلىمدەر.
ك ۇلىمدەر دۇنيە... وينارسىڭ,
كۇرەڭ تايىڭ ات بولىپ,
بايگەگە قوسساڭ كەلەرسىڭ,
جۇرتتان جەكە تاق بولىپ»,
دەپ بالاسىنا ءۇمىت ارتادى. بۇل شۋماقتا جىلىلىق, مەيىرىم, ءۇمىت بار. ال ەكىنشى بولىمدە بەيىمبەت ەكى ايەلدىڭ ديالوگى ارقىلى ءبىرىنىڭ ناۋرىزعا بارىنشا دايىندالىپ جاتقانىن, ال ەكىنشىسىنىڭ جوقشىلىقتان كوز اشپاي وتىرعانىن قاز-قالپىندا جەتكىزەدى.
«كۇن شىرايى كەلىپ-اۋ,
جاز بوپ قالعان سەكىلدى.
ايتپاقشى, اجە, ناۋرىزعا
استىڭ با كوجە, ەتىڭدى؟»,
دەي كەلىپ, ءبىرىنىڭ ناۋرىز كۇنى ەت اسقانىن, ال ەكىنشىسىنىڭ «ناۋرىزدى تويلار نە كۇي بار, سويعان جوقپىز سوعىمدى» دەۋى ارقىلى اسار ەتى جوق ەكەنىن جەتكىزەدى. وسىلايشا, قوعامداعى الەۋمەتتىك تەڭسىزدىكتى اشىپ كورسەتەدى.
ولەڭنىڭ ءۇشىنشى بولىمىندە بەركىمباي دەگەن بايدىڭ ۇيىندەگى كورىنىس باياندالادى. بەركىمبايدىڭ داستارقانى جايىلعان, ادامدار ناۋرىزدى تويلاۋعا كىرىسكەن. مۇنى بەيىمبەت: «بەركىمبايدىڭ ۇيىندە, بيداي كوجە بۋلانىپ, ءبىر جايا پىسكەن كۇيىندە», دەپ سۋرەتتەيدى. ودان ءارى:
«شالدار كىردى كەڭەسكە,
باياعىدان باستالدى.
قىنىنان پىشاق سۋىرىپ,
شال قولىنا باستى الدى»,
دەپ ناۋرىز كۇنى اسقا قول سوزعان اۋقاتتى جانداردىڭ تىرشىلىگى كورىنىس بەرەدى.
بەيىمبەت «ناۋرىز كۇنى» ولەڭىندە ءۇش قازاق وتباسىن مىسالعا كەلتىرۋ ارقىلى كىمنىڭ ناۋرىزدى قالاي قارسى الاتىنىن جازادى. بەيىمبەتتىڭ ولەڭىندە ناۋرىز كۇنى تىرشىلىكتىڭ جاندانعانى, تابيعاتتىڭ جاڭارعانى, ءسويتىپ, ادامدارعا قۋانىش سىيلاعانى سۋرەتتەلەدى. الايدا مەرەكەنى تويلاۋعا جۇرتتىڭ ءبارىنىڭ جاعدايى جەتە بەرمەيتىنە كوز جەتكىزەسىڭ. وسىلايشا, بەيىمبەت ناۋرىزدى حالىقتىڭ تۇرمىسىمەن بايلانىستىرا سۋرەتتەپ, جاڭارۋ تەك تابيعاتتا ەمەس, ادام ومىرىندە دە بولۋى كەرەك دەگەن وي سالادى.
