«Texol» كومپانيالار توبى ديرەكتورلار كەڭەسىنىڭ توراعاسى شوتا ابحازاۆانىڭ ايتۋىنشا, زاۋىتتا جوبالاۋدان سەريالىق شىعارۋعا دەيىنگى ءوندىرىستىڭ تولىق تسيكلى ىسكە قوسىلدى. مۇنىڭ بىرنەشە ماڭىزدى تۇسى بار. بىرىنشىدەن, جاڭا ونەركاسىپتىك ەكوجۇيەنىڭ يننوۆاتسيالىق وزەگىنە باسىمدىق بەرىلىپ وتىر. ەكىنشىدەن, ورتالىق ازياداعى جۇك تاسىمالداۋ الەۋەتىنىڭ وسكەنى ەسكەرىلدى. ۇشىنشىدەن, ىستەن شىعۋى مۇمكىن جىلجىمالى قۇرامدى ۋاقتىلى اۋىستىرۋ مەن جاڭا ۆاگوندارعا سۇرانىستىڭ ارتقانى اسەر ەتىپتى.
«جوباعا سالىنعان باستاپقى ينۆەستيتسيا كولەمى شامامەن 170 ملن دوللاردى قۇرايدى. ال جوبانى تولىق جۇزەگە اسىرۋ كەزىندەگى ينۆەستيتسيا 160 ملرد تەڭگەگە جەتۋى مۇمكىن. زاۋىتتىڭ قۋاتى – جىلىنا 6 مىڭ ۆاگون قۇراستىرۋ. ءبىزدىڭ زاۋىتتا جاڭا ءوندىرىس ورنىندا وستىك جۇكتەمەسى 23,5 مىڭ توننانى كوتەرەتىن جارتىلاي ۆاگوندار مەن فيتينگتىك پلاتفورمالار شىعارىلادى. قازىر ۆاگون-تسيستەرنالاردى شىعارۋ تولىق جولعا قويىلدى. ەندى الداعى ۋاقىتتا استىق جانە مينەرالدىق تىڭايتقىشتاردى تاسىمالدايتىن جابىق ۆاگونداردى, ۇزىن بازالىق ۆاگون-پلاتفورمالاردى, ەۋروپالىق جولتابان ءۇشىن جىلجىمالى قۇرامدى شىعارۋدى كوزدەپ وتىرمىز. زاۋىت تولىق قۋاتىنا 2027 جىلى كوشەدى», دەيدى ش.ابحازاۆا.
ونىڭ پىكىرىنشە, زاۋىت ماماندارى سۇيىتىلعان گاز بەن مۇناي ونىمدەرىن, قۇرعاق جۇكتەردى تاسىمالداۋعا ارنالعان تەمىرجول ۆاگونى مەن تسيستەرنالاردى قۇراستىرۋمەن شەكتەلمەيدى. ۆاگوندارداعى ءتۇرلى اقاۋدى جوندەيدى. ماقسات – ۆاگون قۇراستىرۋ كلاستەرىن قالىپتاستىرۋ.
زاۋىتتىڭ باس ديرەكتورى امانقوس قۇلماعامبەتوۆتىڭ دەرەگىنە قاراعاندا, كومپانيا سەريالىق ءوندىرىستى ىسكە قوسۋمەن قاتار سەرتيفيكاتتالعان ءونىم جەلىسىن ايتارلىقتاي كەڭەيتىپ وتىر. ويتكەنى بارلىق سىناق ءساتتى ءوتىپ, قاجەتتى سەرتيفيكاتتار الىنىپتى.
ء«بىز اشىق ۆاگونداردى, پلاتفورمالار مەن ەكى ءتيپتى تسيستەرنانى شىعارامىز. اشىق ۆاگونداردى جابۋعا ارنالعان قاقپاقتى شىعارۋ ءوندىرىسى يگەرىلدى. بۇل بولشەك ۆەدومستۆوارالىق سىناقتان ءوتتى. جىلجىمالى قۇرام مەن ونىڭ قوسالقى بولشەكتەرىن وندىرەتىن كاسىپورىنعا بەرىلەتىن بىرەگەي سايكەستەندىرۋ كودى مەن شارتتى تاڭبالاۋ ءنومىرى بار كۋالىك الىندى», دەيدى ا.قۇلماعامبەتوۆ.
زاۋىت ماماندارى 1520 مم جولتاباندا جۇرەتىن بارلىق ۇلگىدەگى جۇك ۆاگوندارىن شىعارۋدى ماقسات ەتىپ وتىر. بۇل ۇزىندىعى بويىنشا الەمدە ەكىنشى, ال تمد ەلدەرى اۋماعىندا ءبىرىنشى بىرەگەي ۆاگون بولماق.
«كومپانيادا جەكە كونسترۋكتورلىق بيۋرو بار. ءبىزدىڭ ماماندار ۆاگون تۇرلەرىنىڭ جوباسىن وزدەرى جاسايدى. سول جوباعا سايكەس ۆاگوندار ءوز زاۋىتىمىزدا قۇراستىرىلادى. ۆاگونداردىڭ سەرتيفيكاتىن دايىنداپ بەرەدى», دەيدى زاۋىت ديرەكتورى.
بيىلعى اقپاندا اتىراۋ ۆاگون قۇراستىرۋ زاۋىتى قازاقستان تاۋار وندىرۋشىلەرىنىڭ تىزىمىنە امبەباپ جارتىلاي ۆاگون ءوندىرۋشى رەتىندە تىركەلدى. بۇل كاسىپورىننىڭ وتاندىق ءوندىرۋشى مارتەبەسىن رەسمي تۇردە العانىن راستايدى. ەندى زاۋىتتىڭ دامۋىنا, ءونىم كولەمىن ارتتىرۋعا, ەلىمىزدەگى جۇك ۆاگوندارىن شىعاراتىن جەتەكشى كاسىپورىنعا اينال-ۋىنا جول اشىلدى.
ديرەكتوردىڭ دەرەگىنە قاراعاندا, زاۋىتتىڭ اۋقىمدى جوسپارى بار. ناقتىلاي ايتقاندا, ارقايسىسى 40 فۋتتىق ەكى كونتەينەردى, جابىق ۆاگونداردى تاسىمالداۋعا ارنالعان ۇزىن بازالىق پلاتفورمالار ءوندىرىسى مەن قىسىمعا شىدايتىن ىدىستار ساناتىنا جاتاتىن تسيستەرنالارعا قازاندار دايىنداۋ قولعا الىنادى.
«ەلىمىزدە ءدال وسىنداي ءوندىرىس ورنى جوق. ءتىپتى رەسەي مەن بەلارۋستەگى كاسىپورىنداردا مۇنداي تەحنولوگيالار ازىرگە قولجەتىمدى ەمەس. ءبىزدىڭ زاۋىت باستاپقىدا كەڭ اۋقىمدى ءونىم نومەنكلاتۋراسى بار ۆاگون جاساۋ كەشەنى رەتىندە جوبالانعان بولاتىن», دەدى ا.قۇلماعامبەتوۆ.
راس, ءوندىرىس ءورىسىن كەڭەيتۋگە ساپالى شيكىزات قاجەت. ماتەريالداردىڭ بiر بولiگi iشكi نارىقتان ساتىپ الىنادى. الايدا ەلىمىزدە جوعارى تالاپقا سايكەس قازانعا ارنالعان بولات ازiرگە قاجەتتi كولەمدە شىعارىلمايدى. سول سەبەپتەن زاۋىت باسشىلارى بۇل ماسەلەنى وتاندىق مەتاللۋرگيالىق كاسىپورىندارمەن بىرلەسە شەشۋگە ۇمتىلىپ وتىر.
«جەرگىلىكتى كادرلاردى دايارلاۋعا ەرەكشە نازار اۋداردىق. قازىر زاۋىتتا 500-گە جۋىق ادام جۇمىس ىستەيدى. شتات كەڭەيىپ كەلەدى. كاسىپورىن بازاسىندا ناقتى تەحنولوگيالار مەن بۇيىمدار شىعارۋعا مامانداردى دايارلايتىن جەكە وقۋ ورتالىعى قۇرىلدى. ويتكەنى ءبىز دالدىگى ميلليمەترمەن ولشەنەتىن حالىقارالىق ستاندارتتارعا سايكەس جۇمىس ىستەيمىز. بۇل ءتيىمدى تەحنولوگيالىق كلاستەردى قۇرۋعا مۇمكىندىك بەرەدى», دەيدى ا.قۇلماعامبەتوۆ.
بىلتىر اتالعان كومپانيالار توبى جۇك ۆاگوندارىنا ارنالعان دوڭعالاق جۇپتارىن شىعارىپ, تولىق تسيكلدە كۇردەلى جوندەۋدەن وتكىزەتىن شەبەرحانانى ىسكە قوستى. مۇنداعى جۇمىس تولىعىمەن اۆتوماتتاندىرىلعان.
«بۇل جوبانىڭ ماڭىزدىلىعى وندىرىستە عانا ەمەس, ونەركاسىپتى ءارتاراپتاندىرۋدىڭ ناقتى باعىتى سانالادى. وسىعان دەيىن سىرتتان اكەلىنەتىن بولشەكتەر عانا ەندى وزىمىزدە وندىرىلە باستادى. جالپى, «ماحامبەت» ونەركاسىپتىك-وندىرىستىك كەشەنى يندۋستريالىق ايماققا اينالدى. مۇندا ۆاگون جوندەۋ, كومپونەنتتەر شىعارۋ, گاز تەرمينالدارى مەن ارنايى تەحنيكالىق قىزمەت كورسەتەتىن نىساندار شوعىرلانعان. جاقىن ارادا قۇيما ءوندىرىسىن ىسكە قوسۋ جوسپارلانىپ وتىر. بۇل قادام جەرگىلىكتەندىرۋ دەڭگەيىن 96%-عا دەيىن جەتكىزىپ, يمپورتقا تاۋەلدىلىكتى ايتارلىقتاي ازايتادى», دەدى وبلىستىق ونەركاسىپ جانە كاسىپكەرلىك باسقارماسىنىڭ باسشىسى دانيار ورىنباساروۆ.
كاسىپورىن باسشىلارىنىڭ پىكىرىنە سۇيەنسەك, ۇزاقمەرزىمدى كەلەشەكتە جوبانى دامىتۋ وتاندىق قامتۋ مەن ونەركاسىپتىك كووپەراتسياعا قۋاتتى سەرپىن بەرەدى. ال زاۋىت ونىمدەرى ىشكى نارىقتا عانا ەمەس, ودان تىس ەلدەردە دە سۇرانىسقا يە بولادى. پايدالانۋ مەرزىمى 30 جىلدان اساتىن وتاندىق ۆاگوندار مەن قازاندارعا, سونداي-اق كونتەينەرلىك تاسىمالداۋعا ارنالعان جابىق ۆاگوندار مەن پلاتفورمالار سۇرانىسقا يە بولىپ وتىر.
اتىراۋ وبلىسى
