بالانىڭ شات كۇلكىسى – ءومىردىڭ ءسانى, ەلدىڭ ەرتەڭىنە دەگەن سەنىمنىڭ بەلگىسى. سوندىقتان ولاردىڭ قۇقىقتارىن قورعاۋ, دەنى ساۋ, ءبىلىمدى ءارى باقىتتى بولىپ وسۋىنە جاعداي جاساۋ – اتا-انانىڭ عانا ەمەس, تۇتاس قوعامنىڭ ورتاق مىندەتى. ءاربىر بالا مەيىرىمگە, قامقورلىققا, جىلى ءسوز بەن جارقىن بولاشاققا لايىق.
قوعامنىڭ شىنايى كەلبەتى بالالارعا دەگەن قارىم-قاتىناسىنان تانىلادى. ەگەر ءبۇلدىرشىننىڭ كۇلكىسى كوپ ەستىلسە, دەمەك ەلدىڭ ەرتەڭىنە دەگەن سەنىم دە بەرىك. ال بالانىڭ مۇڭى كوبەيگەن جەردە بولاشاقتىڭ دا بۇلدىراي باستايتىنى انىق. سوندىقتان ءاربىر ءسابيدىڭ باقىتتى بالالىق شاعى – مەملەكەت دامۋىنىڭ ماڭىزدى ولشەمدەرىنىڭ ءبىرى. بالا ۇلتتىڭ ەرتەڭى دەيمىز. ال سول ەرتەڭنىڭ قانداي بولارى بۇگىنگى ءبىزدىڭ مەيىرىمىمىز بەن جاۋاپكەرشىلىگىمىزگە تىكەلەي بايلانىستى. ۇرپاعىنا قامقور ەلدىڭ عانا كەلەشەگى كەمەل, بولاشاعى باياندى بولماق.
