ءبىزدىڭ نازارىمىزدى اۋدارعان كاۋسار 2012 جىلعى 2 شىلدەدە قىزىلوردا قالاسى تاسبوگەت كەنتىندە دۇنيەگە كەلىپتى. ونىڭ اتا-اناسى – جۋرناليستەر عالىمجان قارامان ۇلى مەن مارينا بەكەنوۆا. قازىر ولار وتباسىمەن ۇلىبريتانيانىڭ لوندون قالاسىندا تۇرادى. قاعىلەز كاۋسار اعىلشىندار استاناسىندا مەكتەپ تابالدىرىعىن اتتاسا دا, قازاقىلىقتان جازباي, انا ءتىلىن مايىن تامىزا سويلەيدى.
كاۋسار اعىلشىن ءتىلىن ەرتە جاستان مەڭگەرىپتى. ونىڭ اكەسى قازاق بالالارى دا حالىقارالىق تىلدە سويلەپ ۇيرەنسىن دەگەن ويمەن وسى باعدارلامانى جوبا رەتىندە ۇسىنعانىن بىلدىك. قارشاداي قىز 7 جاسىنان باستاپ, بالالارعا جاڭا سوزدەردى, تىركەستەردى قىزىقتى فورماتتا جەتكىزە ءبىلدى. «Miss Kaussar» جوباسىنىڭ ەڭ ماڭىزدى جەتىستىگى – كىشكەنتاي بالالارعا ءوز ويىن اعىلشىن تىلىندە ەركىن جەتكىزۋگە, وزىنە دەگەن سەنىمدىلىگىن ارتتىرۋعا, وزگەلەرگە ۇلگى بولۋعا مۇمكىندىك بەرۋى. بۇل جوبا بالالارعا ۇلى شەكسپير ءتىلىن قىزىقتى ءارى جەڭىل فورماتتا ۇيرەنۋگە كومەكتەسىپ قانا قويماي, ولاردى اشىق سويلەۋگە, ءوز ويىن قورىقپاي ايتۋعا, جاڭا نارسەنى ۇيرەنۋگە ىنتالاندىرادى», دەيدى ول.
ونىڭ ايتۋىنشا, ول بالالاردىڭ اعىلشىن ءتىلىن ۇيرەنىپ قانا قويماي, انا ءتىلىن دە ماقتان تۇتقانىن قالايدى. الەمگە اشىق بولۋ وتە ماڭىزدى, بىراق سول جولدا ءوز بولمىسىڭدى, ءتىلىڭدى جانە ۇلتتىق قۇندىلىقتارىڭدى جوعالتپاۋ ودان دا ماڭىزدى.
«بولاشاقتا مەنىڭ جوبام بالالارعا بىلىمگە قىزىعۋشىلىق تانىتىپ, ءوز ارمانىنا باتىل قادام جاساۋعا كومەكتەسسە, بۇل ماعان ۇلكەن جەتىستىك بولار ەدى. جوبانىڭ باستى قۇندىلىعى − بالالارعا ءبىلىمنىڭ قىزىقتى بولا الاتىنىن كورسەتۋ. ەگەر بالا ەكراننان وزىنە جاقىن, تۇسىنىكتى ءارى شابىت بەرەتىن بەينەنى كورسە, ونىڭ وقۋعا دەگەن قىزىعۋشىلىعى ارتادى دەپ ويلايمىن. مۇنداي جوبالار جاس ۇرپاقتى ۇلكەن ارماندارعا جەتەلەيدى, ءوز قابىلەتىنە سەنۋگە, بولاشاققا باتىل قاراۋعا ۇيرەتەدى», دەيدى كاۋسار.
كاۋسار بولاشاقتا اعىلشىن ءتىلىنىڭ مۇعالىمى بولعىسى كەلەدى. ول ءوزىنىڭ شەتەلدە جيناعان تاجىريبەسىن قازاق بالالارىمەن ءبولىسۋدى ارماندايدى. سونىمەن قاتار ول ءسان سالاسىنا دا نازار اۋدارىپ ءجۇر. ونىڭ ءسان الەمىنە دەگەن قىزىعۋشىلىعىنا بىرىككەن كورولدىك پاتشايىمى ءىى ەليزاۆەتا وتباسىنىڭ تالعامپاز ءستيلى اسەر ەتىپتى. ولاردىڭ ۇنەمى ادەمى, جيناقى ءارى جاراسىمدى كيىنۋ ۇلگىسىنە قاتتى قىزىعۋشىلىق تانىتىپتى. «ماعان كيىم ارقىلى ادامنىڭ مىنەزى, تالعامى جانە ءوزىن ۇستاۋ مادەنيەتىن تانۋعا بولاتىنداي اسەر قالدىراتىن. سول كەزدەن باستاپ سانگە جاي عانا ادەمى كيىنۋ ەمەس, ءوزىن-ءوزى تانىتۋدىڭ ەرەكشە ءبىر جولى رەتىندە قاراي باستادىم» , دەيدى ول.
كاۋسار كەيدە لوندوندا وتكەن مادەني ءىس-شارالارعا قاتىسىپ, جۇرتشىلىعىنا ۇلتىمىزدىڭ كيىم مادەنيەتىن تانىستىرادى. ولاردىڭ وتىنىشىمەن قازاق تىلىنە قىزىعاتىن شەتەلدىكتەرگە ءتىل ۇيرەتەدى. وسىنداي جان-جاقتى دامىپ كەلە جاتقان جەتكىنشەككە «ارمانىڭا جەت» دەگەن اقجارما تىلەك ايتقىمىز كەلەدى.
