سۋرەتتى تۇسىرگەن – ەرلان ومار, «EQ»
تسيفرلاندىرۋ جىلى اياسىندا جاساندى ينتەللەكت ەلەمەنتتەرىن قولدانۋ ارقىلى جۇزەگە اسىرىلعان ءىس-شارانى ايدار ەسىمدى جاساندى ينتەللەكت جۇرگىزدى. جەكپە-جەك سارايىنىڭ الاڭىندا وتكەن مادەني-سپورتتىق باعدارلاماعا ءبىر مەزەتتە 3000 بالا قاتىسىپ, ساقا ءيىرىپ, اسىق وينادى. قاتىسۋشىلار الدىمەن ارنايى قويىلىم ارقىلى ساپ تۇزەپ, اسىقتىڭ «الشى» ءپىشىنى مەن «التىن ساقا» ءسوزىن بەينەلەدى. مۋزىكالىق سۇيەمەلدەۋمەن بالالار ءتۇرلى بي ەلەمەنتتەرىن ورىنداپ, فلەشموبتىڭ كوركەمدىك مازمۇنىن اشا ءتۇستى.
فلەشموبتان كەيىن جاساندى ينتەللەكت بارلىق ءبىلىم ۇيىمدارى – بالاباقشالار مەن مەكتەپتەردە اسىق ويىنىن رەسمي اشىق دەپ جاريالادى. وسى ساتتە جاساندى ينتەللەكتىنىڭ بەلگىسىمەن ەلوردانىڭ مەكتەپتەرى مەن بالاباقشالارىندا ءبىر مەزەتتە 15 000-نان استام بالا اسىق ويىنىن باستادى.
وسىلايشا, ءىس-شارا اياسىندا جالپى سانى 18 000-نان استام بالا ۇلتتىق اسىق ويىنىنا قاتىستى. يگى ءىس-شارانىڭ نەگىزگى ماقساتى – اسىق ويىنىن ناسيحاتتاۋ, تاربيەلىك ءمانىن ءتۇسىندىرىپ, جاس ۇرپاقتىڭ ۇلتتىق سپورتقا دەگەن قىزىعۋشىلىعىن ارتتىرۋ.
