تاعدىردىڭ جازمىشىمەن ولگا اكەسى حۋديان-بين ۆيكتوردان, اناسى مارينا وسپيچۋكتان جاستايىنان ايىرىلادى. قوس قاناتى قىرقىلعانىمەن, ومىرگە دەگەن وزگەشە ماحابباتى قايراتىن مۇقالتۋعا مۇرشا بەرمەدى. ناعاشى اجەسى ليۋدميلانىڭ قولىندا ءوسىپ, جىلۋىن سەزىنەدى. جۇدىرىقتاي قىزدىڭ جانارىنداعى وتتى بايقاعان اجەسى جانىپ تۇرعان جۇرەگىنە جىگەر بەرەدى. «قالايدا وسى قىزدى وقىتىپ, توقىتامىن», دەگەن ارمانى شىندىققا اينالادى.
ولگانىڭ قازاق ءتىلىن ەركىن مەڭگەرىپ كەتۋىنە ورتاسىنىڭ دا اسەرى مول. قايماعى بۇزىلماعان ورتا! قاسيەتتى توپىراق قوياندى قونىسى. ول وسىنداعى №35 ورتا مەكتەپتەن ءبىلىم الادى. ونداعى ۇستازدار مەن وقۋشىلار ولگانىڭ انا تىلىنە دەگەن قۇرمەتىن كورىپ, الاقانىنا سالادى. مەكتەپتە مەرەكەلىك كونتسەرتتەرگە, قوعامدىق ءىس-شارالارعا بەلسەنە قاتىسادى. وقۋدا دا وزات ونىڭ ەندىگى ويلاعانى – ۇلاعاتتى ۇستاز بولۋ.
وسى ارمانىنىڭ ىزىنە ءتۇسىپ, قاراعاندى گۋمانيتارلىق كوللەدجىن باستاۋىش سىنىپ مۇعالىمى جانە پراكتيكاداعى پسيحولوگ ماماندىعى بويىنشا ءتامامدايدى. ءارى قاراي جوعارى ءبىلىمىن تەرەڭدەتىپ, بولاشاق اكادەمياسىندا پەداگوگيكا جانە پسيحولوگيا ماماندىعى بويىنشا ديپلوم الادى.
ۋاقىت وتە كەلە ولگا ءوزىنىڭ ومىرلىك جارى ايدىن تۇرسىن ۇلىمەن وتاۋ قۇرادى. ءوزى ءوسىپ-ونگەن قاستەرلى قارقارالىعا كەلىن بولادى. بەرەكەلى اۋلەت وقانوۆتار شاڭىراعى اق كەلىنگە قۇرمەتپەن قاراپ, قولداۋ كورسەتەدى. ۇلتتىق سالت-داستۇرلەردى جەتىك بىلەتىن, كەلىن ادەبىنىڭ ءبارىن بويىنا سىيدىرعان ول, ارينە, قايىنجۇرتىندا سىيلى.
ولگا ولەڭ وقىعاندى جانىنداي سۇيەدى. جانە قالاي وقيدى؟ ول وسى ءبىر بويىنداعى اسىل ونەرى ارقىلى تەلەارناداعى باعدارلامالارعا قوناق بولىپ, كورەرمەن كوزايىمىنا اينالدى. اسىرەسە مۇقاعالي ماقاتاەۆ, مۇحتار شاحانوۆ, كۇلاش احمەتوۆا, اقبەرەن ەلگەزەك, قالقامان سارين, الماس تەمىرباي سىندى ليريكتەردىڭ ولەڭدەرىن جاتقا سوعادى. ەڭ قىزىعى, وسى ونەرى جولداسى ايدىنمەن تانىسۋىنا سەپ بولىپتى. ولگانىڭ «تيكتوك» جەلىسىندەگى پاراقشاسىندا كەشكىلىك پوەزيا ساعاتىن وتكىزىپ وتىرعانىن كەزىكتىرىپ قالعان ايدىن كىلت توقتاپ قالادى. تالانتىنا تاڭىرقاپ قالعان ول پاراقشاسىن ۇزاق ۋاقىت باقىلاپ ءجۇرىپ, سەزىمىن بىلدىرسە كەرەك.
جان-جاقتى ولگا – قوعام بەلسەندىسى. «وتان وردا» قاراعاندى قوعامدىق بىرلەستىگىنىڭ مۇشەسى. مەرەكەلىك كونتسەرت جۇرگىزەدى. تەاترلاردا ولەڭ وقيدى. كاسىبي شەبەرلىگى سونداي, استانادا وتەتىن اۋقىمدى ءىس-شارالارعا دا شاقىرتۋ الادى.
قازىر جولداسى ەكەۋى وتباسىلىق كاسىپتى دوڭگەلەنتىپ وتىر. وتاعاسى ايدىن – جۇك كولىگىنىڭ جۇرگىزۋشىسى. ۇنەمى الىس ساپارلارعا شىعادى. ال ولگا – لوگيستيكا سالاسىنىڭ مامانى. تاپسىرىس قابىلداپ, بارلىق قۇجاتىن زاڭداستىرىپ, تابىسىن ەسەپتەپ ءارى ەسەلەپ وتىرادى.
ەكەۋى اتا-انالارىنىڭ اق باتاسىمەن ەنشىسىن الىپ, قالاعا قونىس اۋدارادى. بىراق قولدارى قالت ەتسە قالادان قاشىپ, اۋىلعا قاراي جول تارتادى. اتا-انالارىنىڭ ماحابباتىنا شولدەيدى. اۋىلعا بارا سالىسىمەن قازان كوتەرىپ, ەت اسىپ, باۋىرساق, شەلپەگىن پىسىرەدى. اتا-ەنەسى جاقسى كورەتىن ءتاتتى بالىشتەرىن دايارلاپ, داستارقانىن تولتىرادى. اس ءۇيدىڭ شارۋاسىنا دا پىسىق ولگا «ەنەم ەكىنشى اناما اينالدى» دەيدى.
– انامنان ەرتە ايىرىلعاندىقتان, ۇلكەننىڭ جان جىلۋىن اڭسايمىن. ەنەم نازيرا از ۋاقىتتىڭ ىشىندە اقىلشىما, قامقورشىما, سىرلاسىما اينالدى. بىلمەگەنىن ۇيرەتەدى. جولداسىم ەكەۋمىز اۋىلعا اسىعامىز. اسا قاتتى الاڭدامايتىنىمىز, قولدارىندا ابىسىنىم بار. ءبىز قالادان بارعان سايىن ەمەن-جارقىن سويلەسىپ ءبىر قۋانىپ قالامىز. «اتاڭا نە قىلساڭ, الدىڭا سول كەلەدى» دەگەن ءسوز بار ەمەس پە؟ سول سەبەپتى اتا-انامىزدىڭ قادىرىن بىلۋدەن باسقا ءبىز ءۇشىن ۇلى مىندەت جوق, – دەيدى ولگا.
قاراعاندى وبلىسى
