فوتو: bbc.com
تۇندە قالا مەن وبلىس اۋماعىنا ۋكراينالىق ۇشقىشسىز ۇشۋ اپپاراتتارى (دروندار) سوققى جاساعان. تاڭەرتەڭ لەنينگراد وبلىسىنىڭ گۋبەرناتورى الەكساندر دروزدەنكو ءوڭىر اۋماعىندا 59 درون اتىپ تۇسىرىلگەنىن حابارلادى. ەڭ ءىرى سوققىلاردىڭ ءبىرى پەتەربۋرگ مۇناي تەرمينالىنا تيگەن. بۇل شابۋىلدى ۋكراينا پرەزيدەنتى ۆلاديمير زەلەنسكي راستاعان. ءدال وسى كۇنى قالادا حالىقارالىق ەكونوميكالىق فورۋم باستالعان, وعان ءتۇرلى ەلدەردەن قوناقتار كەلگەن.
پەتەربۋرگتىڭ «بۋماگا» باسىلىمىنىڭ حابارلاۋىنشا ءتۇن ىشىندە قالا تۇرعىندارى اۋە قورعانىس جۇيەسىنىڭ (پۆو) جۇمىسىنا ۇقساس دىبىستاردى ەستىگەنىن. قالا ورتالىعى مەن تەڭىزگە جاقىن اۋدانداردان مۇناي تەرمينالى ماڭىندا ءتۇتىن كوتەرىلگەنى بايقالعان.
ۋكراينالىق دروندار ەكاتەرينبۋرگ پەن چەليابينسكىگە شابۋىل جاسادى
بۇل نىسان بالتىق وڭىرىندەگى ەڭ ءىرى مۇناي تاسىمالداۋ تەرمينالدارىنىڭ ءبىرى سانالادى. ونىڭ اۋماعى 37 گەكتاردى قۇرايدى, 32 رەزەرۆۋارى بار جانە جىلدىق وتكىزۋ قۋاتى 12,5 ملن تونناعا جەتەدى.
تاڭەرتەڭنەن بەرى پەتەربۋرگ تۇرعىندارى سىرتتا جاعىمسىز ءيىس سەزىلگەنىن ايتىپ شاعىمدانعان. رەسەيدىڭ توتەنشە جاعدايلار مينيسترلىگى شامامەن تاڭعى 5-تە درون قاۋپى جاريالانعانىن, ال 8-گە قاراي اۋە دابىلى الىنعانىن حابارلادى.
سانكت-پەتەربۋرگ گۋبەرناتورى الەكساندر بەگلوۆ كرونشتادت, كيروۆ جانە كراسنوسەلسكي اۋداندارىندا ينفراقۇرىلىم نىساندارىنا شابۋىل جاسالعانىن مالىمدەدى. ال لەنينگراد وبلىسى اكىمشىلىگى لۋجسكي اۋدانىندا درون قالدىقتارى قۇلاپ, ءتورت جەكە تۇرعىن ءۇيدىڭ ازداپ زاقىمدانعانىن حابارلادى. رەسمي مالىمەتكە سايكەس, بىرنەشە ادام جارالانعان, قازا تاپقاندار جوق.
پۋلكوۆو اۋەجايى شامامەن بەس ساعات جۇمىسىن توقتاتقان: كەيبىر رەيستەر كەشىكتىرىلىپ, كەيبىرى باسقا اۋەجايلارعا باعىتتالعان. قالا بويىنشا ءموبيلدى ينتەرنەتتىڭ جۇمىسى دا ءىشىنارا بۇزىلعان.
«فونتانكا» باسىلىمىنىڭ جازۋىنشا, كۋاگەرلەر تۇرعىن ءۇي كەشەندەرىنىڭ بىرىندە زاقىم كەلگەن عيماراتتىڭ ۆيدەوسىن كورسەتكەن, بىراق ناقتى قاي كەشەن ەكەنى ايتىلماعان. سونداي-اق ونىڭ قالا ىشىندە مە, الدە وبلىستا ما ەكەنى بەلگىسىز. باسىلىم مالىمەتىنشە, باسقارۋشى كومپانيا وكىلدەرى ءۇي قابىرعاسىنا درون بولشەگى تيگەنىن راستاعان جانە تۇرعىندارعا ەۆاكۋاتسيالىق پۋنكتكە, مەكتەپكە بارۋ ۇسىنىلعان.
باسقا تۇرعىندار درونداردىڭ ۇيلەردىڭ ۇستىمەن ۇشقانىن, ادامداردىڭ جەراستى پاركينگتەرىنە جاسىرىنعانىن ايتقان. كوپشىلىك ءتۇن بويى جارىلىستار ەستىلگەنىن, ۇيىقتاماعانىن جازعان. ء«ۇي دىرىلدەپ تۇردى, يت ۆانناعا تىعىلدى», – دەپ جازعان كۋاگەرلەردىڭ ءبىرى.
