بۇدان بىلاي جاڭادان اشىلعان بولىمدە ەمدەۋ ۇدەرىسىنە كلينيكالىق-فارماكولوگيالىق باعالاۋ جۇرگىزۋ, تەراپيانىڭ تيىمدىلىگى مەن قاۋىپسىزدىگىن باقىلاۋ, ەمدەۋ تاسىلدەرىن ۇتىمدى تاڭداۋ, دارىلىك زاتتاردى سۇيىلتۋ جۇمىستارى جۇزەگە اسىرىلادى. سونىمەن قاتار دارىلىك زاتتاردى ەسەپكە الۋ جانە ساقتاۋ قويماسى جۇمىس ىستەيدى.
اشىلۋ سالتاناتىنا كەلگەن قوناقتار تابلەتكا تۇرىندەگى دارىلەردى ءدال مولشەرلەۋدى قامتاماسىز ەتەتىن, ادام فاكتورىنىڭ اسەرىن ازايتىپ, دارىلەردى بەرۋ ۇدەرىسىن جەدەلدەتەتىن اۆتوماتتاندىرىلعان جۇيەسىمەن تانىستى. سونداي-اق دارىلىك زاتتاردى ساقتاۋ جاعدايلارىن قاتاڭ باقىلاۋعا, قالدىقتار مەن جارامدىلىق مەرزىمدەرىن ناقتى ۋاقىت رەجيمىندە ەسەپكە الۋعا, دارىلەردىڭ ساقتالۋى مەن قاۋىپسىزدىگىن ارتتىرۋعا مۇمكىندىك بەرەتىن اۆتوماتتاندىرىلعان ساقتاۋ كابينەتى جانە روبوتتاندىرىلعان جەتكىزۋ جۇيەسى كورسەتىلدى.
كىاعزي باسقارما توراعاسى رۇستەم تولەۋتاەۆ دارىلىك قامتاماسىز ەتۋدى تسيفرلاندىرۋ جوباسىن تانىستىرا وتىرىپ, اۆتوماتتاندىرىلعان شەشىمدەرگە كوشۋ دارىلىك زاتتاردى باسقارۋدى جاڭا دەڭگەيگە كوتەرەتىنىن, زاماناۋي ادىستەمە دارىلىك پرەپاراتتاردىڭ كلينيكاعا تۇسكەن ساتىنەن باستاپ پاتسيەنتكە بەرىلگەنگە دەيىنگى بۇكىل ومىرلىك تسيكلىن ۇزدىكسىز باقىلاۋعا نەگىزدەلگەنىمەن ادام فاكتورىن بارىنشا ازايتاتىنىن اتاپ ءوتتى.
«مەملەكەت باسشىسىنىڭ دەنساۋلىق ساقتاۋ ينفراقۇرىلىمىن كەزەڭ-كەزەڭىمەن تسيفرلاندىرۋ, زاماناۋي اۆتوماتتاندىرىلعان جۇيەلەردى ەنگىزۋ سىندى تاپسىرماسىن ورىنداۋ ماقساتىندا گوسپيتالدىق فارماتسيا بولىمىندە دارىلىك قامتاماسىز ەتۋدى تسيفرلاندىرۋ جۇمىستارى ەنگىزىلىپ جاتىر», دەدى ول.
كلينيكالىق فارماكولوگيا ءبولىمىنىڭ باسشىسى ايگۇل باقتىعاليەۆا جاڭا تەحنولوگيالاردى ەنگىزۋ ارقىلى 1س بۋحگالتەرياسى مەن DAMUMED اقپاراتتىق جۇيەلەرىن بىرىكتىرۋگە, بولىمشەلەردەگى مەديتسينا قىزمەتكەرلەرىنىڭ ۋاقىتىن وڭتايلاندىرۋعا, دارىلىك قامتاماسىز ەتۋدىڭ جىلدامدىعى مەن ساپاسىن ارتتىرۋعا جانە لوگيستيكالىق شىعىنداردى ازايتۋعا مۇمكىندىك تۋاتىنىنا توقتالدى.
الماتى وبلىسىندا 20 ءتۇرلى ءدارى شىعاراتىن جاڭا زاۋىت سالىنادى
اۆتوماتتاندىرۋ مەن تسيفرلاندىرۋدى ەنگىزۋدىڭ باسقا دا ارتىقشىلىقتارى بار. اتاپ ايتقاندا, دارىلىك زاتتاردىڭ قوزعالىسىنىڭ تولىق اشىقتىعى قامتاماسىز ەتىلەدى, ال ۇدەرىستەردى اۆتوماتتاندىرۋدىڭ بەس دەڭگەيلى باقىلاۋى تاۋەكەلدەر مەن قاتەلىكتەردى ازايتادى.
تسيفرلاندىرۋ مەديتسينالىق كومەكتىڭ ساپاسىن ۇزدىكسىز ءدارى-دارمەكپەن قامتاماسىز ەتۋ دەڭگەيىندە جاقسارتادى, پاتسيەنتتەردىڭ قاۋىپسىزدىگىن ارتتىرۋعا مۇمكىندىك بەرەدى. ال ەسەپكە الۋدى اۆتوماتتاندىرۋ رەسۋرستاردى ۇتىمدى ءبولۋ ەسەبىنەن 18%-عا دەيىن ۇنەمدەۋگە جول اشادى.
