فوتو: اقوردا
«ەكى ەل اراسىنداعى ساياسي ديالوگ جىل وتكەن سايىن كۇشەيە تۇسۋدە. قادىرلى حريستودۋليديس مىرزا وسىدان 7 جىل بۇرىن كيپردىڭ سىرتقى ىستەر ءمينيسترى رەتىندە استاناعا ارنايى كەلگەن بولاتىن. سول كەزدە ول كيپر قازاقستاننىڭ ەۋروپا وداعىنداعى مۇددەسىن ىلگەرىلەتۋگە ءاردايىم دايىن ەكەنىن ايتقان ەدى. سودان بەرى كوپ جۇمىس اتقارىلدى. ەكى مەملەكەتتىڭ ەلشىلىكتەرى اشىلدى. وسىلايشا, ءوزارا قارىم-قاتىناسىمىز جولعا قويىلدى. قادىرلى پرەزيدەنت مىرزانىڭ استاناعا تۇڭعىش ساپارى ەكى ەل اراسىنداعى العاشقى تىكەلەي اۋە رەيسىنىڭ اشىلۋىمەن تۇسپا-تۇس كەلىپ وتىر. مۇنىڭ دا سيمۆولدىق ءمانى زور», دەدى قاسىم-جومارت توقاەۆ.
پرەزيدەنتتىڭ ايتۋىنشا, مەملەكەتتەرىمىز ىقپالداستىقتى ودان ءارى بەكەمدەي تۇسۋگە نيەتتى. بۇل – تاراپتار مۇددەسىنە ساي.
«كيپر رەسپۋبليكاسىنىڭ باسشىسى وسى وڭ ۇردىسكە زور ۇلەس قوسىپ كەلەدى. مەن مۇنى جوعارى باعالايمىن. سول سەبەپتى بۇگىن جوعارى مارتەبەلى پرەزيدەنت نيكوس حريستودۋليديس مىرزاعا ءى دارەجەلى «دوستىق» وردەنىن تاپسىردىم. بۇل ناگرادا – قازاق ەلىنىڭ سىزگە جانە بۇكىل كيپر رەسپۋبليكاسىنىڭ حالقىنا دەگەن ەرەكشە قۇرمەتىنىڭ, شىنايى ءىلتيپاتىنىڭ بەلگىسى. قۇتتى بولسىن! ەلدەرىمىزدىڭ ءوزارا سەرىكتەستىگى نىعايا بەرەدى دەپ سەنەمىن», دەدى مەملەكەت باسشىسى.
ەسكە سالا كەتەيىك, بۇگىن كيپر رەسپۋبليكاسىنىڭ پرەزيدەنتى نيكوس حريستودۋليديس ەلىمىزگە رەسمي جۇمىس ساپارىمەن كەلدى. پرەزيدەنت مارتەبەلى مەيماندى تاۋەلسىزدىك سارايىندا رەسمي قارسى الدى. ەكى ەل پرەزيدەنتتەرى شاعىن جانە كەڭەيتىلگەن قۇرامدا كەلىسسوز جۇرگىزدى. مەملەكەت باسشىسى كيپر پرەزيدەنتىن ءى دارەجەلى «دوستىق» وردەنىمەن ماراپاتتادى.
