قاراعاندى وبلىستىق تاريحي-ولكەتانۋ مۋزەيى جوشى ۇلىسىنىڭ 800 جىلدىعىنا ارنالعان «تالاس- ۇلىتاۋ-سارايشىق» اتتى رەسپۋبليكالىق تاريحي-ەتنوگرافيالىق ەكسپەديتسيانى ۇيىمداستىردى. كەشە ءبىر توپ تاريحشى-عالىم, ەكسپەديتسيا قاتىسۋشىلارى جولعا شىعىپ, تارازعا جەتتى.
«ەكسپەديتسيا مارشرۋتى بويىنشا جامبىل, ۇلىتاۋ, قىزىلوردا, اقتوبە, تۇركىستان جانە اتىراۋ وبلىستارىنىڭ ارحەولوگيالىق, ارحيتەكتۋرالىق ەسكەرتكىشتەرىن تولىق كولەمدە زەردەلەۋ جوشى ۇلىسى مەن التىن وردا داۋىرىندەگى قازاقستان تاريحىن زەرتتەۋگە جان-جاقتى قاراۋعا مۇمكىندىك بەرەدى», — دەيدى وبلىستىق وبلىستىق مادەنيەت, مۇراعاتتار جانە قۇجاتتاما باسقارماسىنىڭ باسشىسى ەركەبۇلان جۇماكەنوۆ.
ەكسپەديتسيا قۇرامىندا ەلىمىزدەگى تاريحشى-عالىمداردان بولەك باۋىرلاس تۇركيا ەلىنەن كەلگەن ارحەولوگ چوبان اكايال, ەتنولوگ, م.امموسوۆ اتىنداعى سولتۇستىك-شىعىس فەدەرالدى ۋنيۆەرسيتەتىنىڭ ماگيسترانتى, التىن وردا تاريحىن زەرتتەۋشى, تاريحشى, رەسەي فەدەراتسياسىنان كەلگەن ساينا ميحايلوۆا سەكىلدى الىس جاقىن شەت ەلدەن كەلگەن تاريحشىلار بار. بۇل دەگەنىمىز ەكسپەديتسيانىڭ كەڭ اۋقىمىن كورسەتەدى.
«ەكسپەديتسيا بارىسىندا جوشى ۇلىسىنىڭ تاريحىمەن بايلانىستى ارحەولوگيالىق, ارحيتەكتۋرالىق, مەموريالدىق نىسانداردىڭ قازىرگى جاعدايىنا باقىلاۋ جۇرگىزىلەدى, تۋريستىك باعىتتى ارتتىرۋ بويىنشا ۇسىنىستار ازىرلەنەدى, فوتو, بەينە, اۋديو فورماتتا تانىمدىق اقپاراتتىق ونىمدەر دايىندالادى. عالىمدار, تاريحشىلار مەن مامانداردىڭ سۇحباتى نەگىزىندە دەرەكتى فيلم ءتۇسىرىلىپ, حالىققا ۇسىنىلادى», — دەيدى وبلىستىق تاريحي-ولكەتانۋ مۋزەيىنىڭ باسشىسى ەرجان نۇرماعانبەتوۆ.
جوشى ۇلىسىنىڭ 800 جىلدىعىنا ارنالعان «تالاس- ۇلىتاۋ-سارايشىق» رەسپۋبليكالىق تاريحي-ەتنوگرافيالىق ەكسپەديتسيالىق كوشى 20 قىركۇيەك – 1 قازان ارالىعىندا جولدا بولادى.
ەكسپەديتسيا بۇگىن «تەكتۇرماس» ەتنو-تاريحي كەشەنى, ەجەلگى تاراز الەمى قالاشىعى, قاراحان كەسەنەسى, جانىبەك-كەرەي حاندارىنىڭ ەسكەرتكىشى, ايشا ءبيبى كەسەنەسىنە بارادى.