ون توعىز جاسىندا العاش رەت «ىقىلاس كۇيىن» شىعارىپ, كەيىننەن «قوڭىر», «جەزكيىك», «اققۋ», «جالعىزاياق» سىندى شىعارمالارىمەن قازاق دالاسىنا تانىلعان ايگىلى كۇيشى-قوبىزشى, كومپوزيتور ىقىلاس دۇكەن ۇلىنىڭ مول مۇراسى وسكەلەڭ ۇرپاق ءۇشىن قاي كەزدە دە تاۋسىلماس قازىنا ەكەنى راس.
قازاق دالاسىن قوبىزدىڭ مۇڭدى ۇنىمەن تەربەگەن ونەر يەسى پايدالانعان اسپاپتىڭ تۇپنۇسقاسى بۇگىندە وبلىستىق تاريحي-ولكەتانۋ مۋزەيىندە ساقتاۋلى تۇر. «قوبىزشى, ايگىلى كۇيشى-كومپوزيتور ىقىلاس دۇكەن ۇلىنىڭ ءوزى جاساپ, كۇي شەرتىپ, پايدالانعان مۋزىكالىق اسپابى بۇگىندە ءبىزدىڭ مۋزەيدىڭ قۇندى جادىگەرى سانالادى.
اتالعان قوبىزدى ىقىلاستىڭ ۇرپاقتارى 1916 جىلدان بۇگىنگى كۇنگە دەيىن قاستەرلەپ, وتباسىنىڭ كيەلى مۇراسى رەتىندە ساقتاپ كەلگەن. ولار كەلتىرگەن دەرەككە سەنسەك, ىقىلاس دۇكەن ۇلى قوبىزىن وسىدان 140 جىلدان استام ۋاقىت بۇرىن جاساعان ەكەن. قورقىت پەن قويلىبايدان كەيىن قازاق دالاسىن سازبەن تەربەگەن ايگىلى قوبىزشى ىقىلاس ەكەنى ءمالىم. ىقىلاس دۇكەن ۇلىنىڭ شوبەرە كەلىنى التىن اقىنباەۆا مۋزەي قورىنا 2008 جىلى وتكىزگەن جادىگەردىڭ ءبىز ءۇشىن ورنى بولەك», دەيدى وبلىستىق تاريحي-ولكەتانۋ مۋزەيى ديرەكتورىنىڭ ورىنباسارى زارينا دۇكەنباەۆا.
ونىڭ ايتۋىنشا, مۋزەيگە كەلگەن جۇرتشىلىق ىقىلاستىڭ قوبىزىنا ايرىقشا نازار اۋدارادى ەكەن. ءتىپتى قولىنا ۇستاپ سۋرەتكە تۇسكىسى كەلەتىندەر دە از ەمەس.
جامبىل وبلىسى