اقتاۋ: توتەنشە جاعدايعا بايلانىستى ەنگىزىلگەن تارتىپكە باعىنباعان كافە يەسىنە حاتتاما تولتىرىلدى

اقتاۋدا كورسەتىلگەن شەكتەۋلەردىڭ نەگىزىندە 4 جۇمىس توبى قۇرىلدى. اقتاۋ قالاسى پوليتسيا باسقارماسىنىڭ ۋچاسكەلىك پوليتسيا ينسپەكتورلارى وسى قۇرىلعان توپتارمەن بىرلەسە 70-تەن استام كوڭىل كوتەرۋ ورىندارىن, كومپيۋتەرلىك جانە بيليارد كلۋبتار تەكسەرىلىپ, ونىڭ ىشىندە 14-ءى اشىق تۇرعان. ولاردىڭ يەلەرىنە ەرەجەلەر ءتۇسىندىرىلدى, بەرىلگەن 15 مينۋت ۋاقىت ىشىندە ورىندار جابىلىپ, ەسكەرتىلدى. بۇل تۋرالى ماڭعىستاۋ وبلىستىق پوليتسيا دەپارتامەنتى ءباسپاسوز قىزمەتى حابارلادى.

ەنگىزىلگەن رەجيمگە سايكەس مەيرامحانالاردىڭ, كافەلەردىڭ, وزگە دە قوعامدىق تاماقتانۋ ورىندارىنىڭ جۇمىس ۋاقىتى شەكتەلدى – ولار 22.00-گە دەيىن جۇمىس ىستەيدى. ءىىم ءمينيسترى ە.تۇرعىمباەۆتىڭ توتەنشە جاعدايلار تۋرالى بىرنەشە ايتقانىنا قاراماستان اقتاۋ قالاسىنىڭ 26 شاعىن اۋدانىندا ورنالاسقان «سۆەجاك» ورنى كورسەتىلگەن ۋاقىتتان كەيىن دە جۇمىس جاساعان. اكىمشىگە قاتىستى اقبتك-ءنىڭ 476-بابىنا سايكەس اكىمشىلىك حاتتاما تولتىرىلدى. كەلۋشىلەرگە ەرەجەلەر ءتۇسىندىرىلىپ, ۇيلەرىنە تاراتىلدى.

5 جۇمىس توبى ءبولىنىپ, ءار شاعىناۋدان بويىنشا قاراپ شىقتى. اتاپ ايتساق, 1-9 شاعىناۋدان, 10-19 شاعىناۋدان, 20-29 شاعىناۋدان, 30-35 شاعىناۋدان (شىعىس 1, 2,3) جانە پريوزەرنىي, ومىرزاق اۋىلىنداعى كوڭىل كوتەرەتىن ورىندار مەن كومپيۋتەر, بيليارد كلۋبتارى قارالدى. ءتارتىپتى بۇزعاندار بارلىعى بەرىلگەن ۋاقىتتىڭ ىشىندە كەلۋشىلەردى تاراتىپ, ەسىگىن جاپتى. تارتىپكە باعىنباعان 1 كافە يەسىنە اكىمشىلىك حاتتاما تولتىرىلدى. ايتا كەتەيىك, اقتاۋدا 220-دان استام كوڭىل كوتەرۋ ورنى بار. جۇمىس توبى تۇنگى تەكسەرۋلەردى كۇن سايىن جالعاستىراتىن بولادى.

-ەلىمىزدە جاريالانعان توتەنشە جاعداي بويىنشا ءبىراز شەكتەۋلەر قويىلدى. ونىڭ ىشىندە شاعىن جانە ورتا كاسىپ سۋبەكتىلەرى بار. ساعات كەشكى 22.00-گە دەيىن كافە, مەيرامحانا, بارلارعا شەكتەۋ قويىلعان. ەندى قاراپ تەكسەرىپ كەلە جاتىرمىز, ءوزىڭىز كورگەندەي 80%-ى جابىق ەكەنى, جارلىققا سايكەس شارا قولدانعانىن كوردىك. ال, ءالى كۇنگە دەيىن جاساپ جاتقاندارىنا ەسكەرتۋ جاسالىپ, ەرەجەمەن تانىسىپ, يەلەرى جاپتى. الداعى ۋاقىتتا وسى جۇمىستار جالعاسادى, قاداعالايمىز,تەكسەرەمىز. قالالىق اكىمشىلىكتىڭ جانە پوليتسيا باسقارماسىنىڭ باقىلاۋىندا بولادى. العاشقى شارا ەسكەرتۋ. ەگەر كەلەڭسىز جاعداي بولىپ جاتسا, ياعني تاعى دا اشىق بولىپ, زاڭعا قايشى كەلىپ جاتسا, اكىمشىلىك قۇقىق بۇزۋشىلىق حاتتاماسى تولتىرىلىپ, 476- باپ بويىنشا 10 اەك ايىپپۇل تولەۋگە شارا قولدانىلادى, دەدى اقتاۋ قالاسى پوليتسيا باسقارماسى جەرگىلىكتى پوليتسيا قىزمەتى ءبولىمىنىڭ باستىعى پوليتسيا مايورى باتىر كوشكىنوۆ.

ماڭعىستاۋ وبلىسى