باعا بيلەگەن بۇگىنگى نارىقتىڭ جازىلماعان زاڭى بار. قازىر كەز كەلگەن كىسىدەن سۇراڭىز, قاڭتار-اقپان ايلارىن ء«ولى ماۋسىمعا» بالايدى. بۇل ايلاردا اقشا, ساۋدا تۋرالى اڭگىمە قوزعالسا, كۇمىلجىپ قالاتىنىن مەنەن دە جاقسى بىلەسىزدەر. ال ناۋرىز تۋىسىمەن تابيعات انامەن بىرگە تىرشىلىك تە, ەكونوميكا دا ەسىن جيا باستايدى. بارلىق سالاعا جان كىرەدى. كوكتەم كەلىپ شۋاعىن توككەنى ءوز الدىنا, دەمەك نارىقتىڭ كۇرمەۋىنىڭ ءوزى جىلدىڭ كەلۋىنە تاۋەلدى ەكەن. بۇل دا بولسا زاماناۋي نارىقتىڭ ءوزى جىل باسى ناۋرىز يگىلىگىنە يلىككەنىنىڭ ءبىر كورىنىسى ەمەس پە؟
پرەزيدەنت قاسىم-جومارت توقاەۆ پارمەنىمەن ناۋرىز مەرەكەسىن تويلاۋدىڭ جاڭا تۇجىرىمداماسى ازىرلەنىپ, امال كۇنىنەن باستاپ ون كۇن اتاپ ءوتۋدى حالىق وڭ قابىلدادى. «جۇرتشىلىق بۇل باستامانى جاقسى قابىلدادى. اسىرەسە ناۋرىزناماداعى «ۇلتتىق كيىم» كۇنى قوعامنىڭ زور قولداۋىنا يە بولدى. ۇلتتىق كيىمدەرگە دەگەن قىزىعۋشىلىق ارتا ءتۇستى», دەگەنى ەسىمىزدە.
مەملەكەت باسشىسى وسىلاي ۇيعارعانى نۇر ۇستىنە نۇر دەپ بىلەمىز. باقساق, مۇنىڭ دا سىرى مەن شەجىرەسى تەرەڭدە ەكەن. كوشپەلى ءھام وتىرىقشى مادەنيەت سالتانات قۇرعان ۇلى دالامىزدا ناۋرىزدى اپتالاپ, ايلاپ تويلاۋ ەرتەدەن قالىپتاسقانىن تاريحتىڭ ءوزى ايگىلەيدى. قازىبەك بي ايتپاقشى, جاقسىلىقتى اسىرا بىلگەن ەلمىز. ارىگە بارماي-اق بەرىدەن قايىرعاندا, اۋليە ءماشھۇر ءجۇسىپتىڭ ءبىر ەمەس, بىرنەشە جازباسىندا كەزدەسەدى. «جيىرما توعىز جاسىمدا بۇقاري شارىپتە عابدوللا حاننىڭ ناۋرىزناما تويىنىڭ ىشىندە سەگىز كۇن بولدىم. ءدال سەگىزىنشى كۇن ءمازارشاريف دەلىنەدى. قوجا ءباھۋالدين اۋليەنىڭ باسىنداعى كولشىككە قانت توگىپ, سۋدى قانت تاتىتىپ, جۇرت جابىلا ءىشىپ, توي تارقار بولادى», دەيدى ەكەن. اباي, ماشەكەڭ زامانىنان ناۋرىزناما اتاۋىنا يە جىل باسىن كوبىنە باي, اۋقاتتى كiسiلەر ۇيىتقى بولىپ تويلاعان دەسەدى. جانە سۋدى قانت تاتىتىپ, كوپشىلىك جابىلا ىشكەن سوڭ, بۇقارانىڭ تويىنا اينالعانىن اڭدايمىز.
قازىر قازاق دالاسىندا وسى ءۇردىستىڭ ءبارى ساقتالىپ تۇرعانى كوڭىلگە قۋانىش سىيلايدى. قاشاننان بەرى قازاق زيالىلارىنىڭ اۋزىنان تۇسپەگەن مەيرامنىڭ بۇگىنگى تۇجىرىمداماسى بۇرىنعى اڭىز-اڭگىمەلەردەگى ناۋرىزدان ءبىر كەم سوقپايدى. العاشقى, 14 ناۋرىزدا امال تۋادى, كورىسۋ كۇنى كەلەدى, بۇل ۋاقىتتا كۇن مەن ءتۇن تەڭەلەتىنى بىلتىردان بەرى ايتىلىپ ءجۇر. راسىندا تەلەفونىڭىزدان كۇن شىعاتىن مەزگىلمەن باتاتىن مەزەتتى قاراساڭىز, وسى كۇنى تەڭەسەدى ەكەن. دەمەك, بۇل كورىسۋ كىسىلەرمەن قاۋىشۋ عانا ەمەس, جىلمەن, كۇنمەن, جارىقپەن كورىسۋ ەكەنىن تۇسىنۋگە كوپ اقىلدىڭ كەرەگى جوق. ونىڭ ۇستىنە قازاق وسى كۇنى ءبىر جاسىڭمەن دەمەي مە؟ ءبىر جىلدى ارتقا تاستاپ, جاڭا جىلعا ساۋ وتۋىڭمەن دەگەندى ايگىلەيدى.
ەسكىدەن قانداي لەپەس قالسا دا ءجون-جوسىقسىز ايتىلماعانى كورىنەدى. مۇنان سوڭ ناۋرىزنامانىڭ ونكۇندىگىندە قايىرىمدىلىق, ۇلتتىق سالت-ءداستۇر, ۇلتتىق كيىمدەر كۇنى, شاڭىراق كۇنى, جاڭارۋ, ىنتىماق كۇندەرىنىڭ ارقايسىنىڭ ءارى جاڭا, ءارى ەسكى عاجايىپ ماندەرى بار. بۇل بەلگىلەر قازىر ءبىز وسىندا جۇرگەن سوڭ بىلىنە بەرمەۋى مۇمكىن, مۇندايدىڭ قادىرىن شەتەلدە وتانىن اڭساپ جۇرگەندەر بىلسە كەرەك-ءتى. قالاي دەسەك تە جىل باسى ناۋرىزدىڭ تۇجىرىمدامالىق نەگىزى كەز كەلگەن سانالى ازاماتتىڭ كوكەيىنە قوناتىنىن ايتقىمىز كەلەدى. شىن مانىندەگى جىل كەلەتىن جارىق كۇن, كوكتەم مەرەكەسى ەمەس پە؟ «اتا-اناداي ەلجىرەر كۇننىڭ كوزى» دەيتىن ۋاقىت – وسى. قىزۋى ارتىپ كۇن شىعادى, قىزىقتىرىپ گۇل شىعادى, تاستان سۋ اعادى, اعاش بۇرشىك اتادى دا, جاڭارعان الەم جان اناداي شۋاعىن توگەدى.
جىل سايىن جاڭا ومىرگە باستاپ, شۋاق سىيلايتىن تابيعات انانىڭ وسىنداي وشپەس قاسيەتىن تويلايىق تا, تويلاساق. ەندەشە, انا جۇرەگىنىڭ مەيىرىمىندەي جاڭا جىل تەك جاقسىلىعىمەن جارىلقاسىن.