قازىرگى زاماندا ۋربانيزاتسيا ۇدەرىسى كۇشەيىپ, كوپشىلىك قالاعا بەت بۇرىپ جاتقانىمەن, اۋىلدا قالىپ, اتاكاسىپتى دامىتىپ وتىرعان جاستار دا بار. سولاردىڭ ءبىرى – بەس جىلدان بەرى ۇلىتاۋ وبلىسىنىڭ مالشەك اۋىلىندا مال شارۋاشىلىعىمەن اينالىسىپ كەلە جاتقان سىرىم باقىتجان ۇلى. نەگىزگى ماماندىعى تەاتر اكتەرى بولعانىمەن, بۇگىندە ول اۋىل شارۋاشىلىعىن كاسىپكە اينالدىرىپ, الەۋمەتتىك جەلى ارقىلى اۋىل ءومىرىن كەڭىنەن ناسيحاتتاپ ءجۇر.
سىرىمنىڭ اۋىلعا ورالۋى – كەزدەيسوق شەشىم ەمەس. ونىڭ وتباسى بۇرىننان مال شارۋاشىلىعىمەن اينالىسادى. اتاكاسىپكە دەگەن قۇرمەتى وسى جولدى تاڭداۋعا تىكەلەي اسەر ەتكەن. ول ءوز ءىسىن دامىتا وتىرىپ, تۇتىنۋشىلارعا ساپالى ءارى تابيعي ازىق-ت ۇلىك ۇسىنۋمەن ەڭبەك ەتىپ كەلەدى. شارۋاشىلىقتا وندىرىلگەن تازا ەتپەن قاتار, قولدان جاسالعان قۇرت پەن ماي دا دايىندالادى. بۇل ونىمدەردى جەرگىلىكتى دۇكەندەرگە جەتكىزىپ, حالىق سۇرانىسىن وتەيدى. سونىمەن قاتار ءونىمنىڭ ساپاسىنا ەرەكشە ءمان بەرىلەدى. ءار دايىندالاتىن تاعام تابيعيلىعىن جوعالتپاۋ ماقساتىندا ءداستۇرلى تاسىلدەرمەن ازىرلەنەدى. بۇل – ساۋدا ءۇشىن عانا جاسالاتىن جۇمىس ەمەس, ۇلتتىق تاعام مادەنيەتىن ساقتاپ, ونى حالىققا ۇسىنۋدىڭ ءبىر جولى.
قازىرگى كەيبىر جاستار اراسىندا «اۋىل ارتتا قالعان» دەگەن پىكىر قالىپتاسقانىمەن, جاس كاسىپكەر بۇل كوزقاراسپەن كەلىسپەيدى. ونىڭ ويىنشا, بۇل – ەسكىرگەن ستەرەوتيپ. «قازىرگى اۋىل دامۋعا بەيىم, ەڭبەك پەن يننوۆاتسياعا اشىق. الەۋمەتتىك جەلىنى بەلسەندى جۇرگىزۋدەگى ماقساتىم دا – وسى تاپتاۋرىنداردى وزگەرتۋ», دەيدى ول.
وتباسىلىق شارۋاشىلىق جىلىنا شامامەن 20–25 ملن تەڭگە كولەمىندە تابىس اكەلەدى. مۇندا دەمالىس پەن جۇمىس ۋاقىتى ناقتى بولىنبەيدى. سوعان قاراماستان, ول اۋىل ءومىرىنىڭ ادامدى شىڭدايتىنىن ايتادى. بۇل ورتا ادامدى ەڭبەككە عانا ەمەس, سابىر مەن توزىمگە دە ۇيرەتەدى.
سىرىمنىڭ بولاشاققا جوسپارى دا اۋىلمەن تىعىز بايلانىستى. ول شارۋاشىلىقتى كەڭەيتىپ, مال باسىن كوبەيتۋدى كوزدەيدى. اۋىل ءومىرىن جاڭا فورماتتا دامىتۋ ماقساتىندا ونلاين كۋرستار اشۋ, ەت ونىمدەرىن تانىستىرۋ, جاستارعا ارنالعان اۋىل تۋرلارىن ۇيىمداستىرۋ سياقتى جوبالاردى جۇزەگە اسىرۋدى جوسپارلاپ وتىر.
بۇگىندە ول الەۋمەتتىك جەلى ارقىلى اۋىل تىرشىلىگىنىڭ شىنايى بەينەسىن كورسەتۋگە تىرىسادى. كوپشىلىك فەرمەر ەڭبەگىن سىرتتاي عانا كورگەنىمەن, ونىڭ ارتىنداعى كۇردەلى ۇدەرىستى بىلە بەرمەيدى. ءوز پاراقشاسىندا ول شارۋشىلىقتىڭ قىر-سىرىن اشىپ كورسەتۋگە تىرىسادى. مۇندا مال باعۋ, ونى ەمدەۋ, كۇتىپ-باپتاۋ سياقتى جۇمىستار اتا-بابادان قالعان ۇردىسپەن ساباقتاسىپ جاتىر. قوي قىرقۋ, ەت وڭدەۋ, قۇرت جاساۋ – مۇنىڭ ءبارى جاي تۇرمىستىق ارەكەت ەمەس, ۇلتتىق مادەنيەتتىڭ جالعاسى.
اۋىل ءومىرى – قيىندىق پەن مۇمكىندىكتى قاتار الىپ جۇرەتىن ەرەكشە ورتا. بىرەۋگە اۋىر ەڭبەك بولىپ كورىنسە, ەندى بىرەۋگە سۇيىكتى ءىس. مۇنداي ءىستى تاڭداعان جاستار اۋىلدىڭ دامۋىنا سەرپىن بەرىپ, ونىڭ جاڭا كەلبەتىن قالىپتاستىرىپ جاتىر. ويتكەنى اۋىل – ارتتا قالعان ەمەس, كەرىسىنشە, بولاشاعى زور, تامىرى تەرەڭ جايىلعان, ومىرشەڭ, ءداستۇرى بار مەكەن.
نۇراي مۇحانوۆا,
ل.ن.گۋميلەۆ اتىنداعى ەۋرازيا ۋنيۆەرسيتەتىنىڭ ستۋدەنتى