جانى قالايتىن ءىسىن تابىستى كاسىپكە اينالدىرۋ اركىمنىڭ قولىنان كەلە بەرمەيتىنى انىق. بۇل از ۋاقىت ىشىندە «تاۋداي بول» ساۋدا بەلگىسىنىڭ ونىمدەرىن تانىمال برەندكە اينالدىرعان جاننۇر مومىشقا جاقسى تانىس.
كىشكەنتايىنان پىسىرگەن تاماعى ءتىل ۇيىرەتىن جاننۇر كەيىن وسى ءىستى كاسىپكە اينالدىرۋدى كوپ ويلانىپتى. ونىڭ تالابىن قولداعان ازاماتى مۇزداتقىش كامەرا ساتىپ اپەرىپ, جاننۇر تاپسىرىسپەن ءتۇشپارا مەن مانتى ازىرلەپ ساتا باستايدى. العاش بولىپ تاپسىرىس بەرگەن كورشىلەرىنىڭ سۇرانىسى ءىس اياسىن كۇن سايىن كەڭەيە بەرۋگە سەپ بولىپتى. كاسىپتە العاشقى تابىسقا توقمەيىلسىگەندەردىڭ دەنى كوپ ۇزاماي توقىراۋعا تاپ بولادى. جاننۇر ىزدەنە ءجۇرىپ الەۋمەتتىك جەلىدەن ءۇي جاعدايىندا شۇجىق جاساۋعا قىزىعۋشىلىعى وياندى.
«شۇجىق جاساۋعا ۇيرەتەتىن ارنايى كۋرستار اقتاۋ قالاسىنان تابىلدى. قىمباتتاۋ بولسا دا, ازاماتىم قاجەتتى اقشانى تاۋىپ بەرىپ, تالابىمدى قولدادى. ءۇش ساتىلى وقۋدان كەيىن جاڭا كاسىپتى باستادىق. وسىدان 3 جىل بۇرىن جەكە كاسىپكەر رەتىندە تىركەلىپ, وبلىس ورتالىعىنان شاعىن عيماراتتى جالعا الدىق. شۇجىق ونىمدەرى مەن جارتىلاي فابريكاتتار شىعاراتىن تسەحقا قاجەتتى قۇرال-جابدىقتاردى الۋعا «دامۋ» كاسىپكەرلىكتى دامىتۋ قورىنان جەڭىلدەتىلگەن نەسيە الدىم. «تاۋداي بول» برەندىمەن ءونىم شىعارۋ ءىسى وسىلاي باستالدى», دەيدى كاسىپكەر.
ۋاقىت وتە كەلە تاپسىرىس كوبەيىپ, ءوندىرىس اياسىن كەڭەيتۋ قاجەت بولدى. بۇل جولى دا جاننۇر مەملەكەت قولداۋىنا ارقا سۇيەگەنىن ايتادى. 2021–2025 جىلدارعا ارنالعان كاسىپكەرلىكتى دامىتۋ ۇلتتىق جوباسى مەن «Coca Cola بەلەستەرى» باستاماسى اياسىندا جاڭا بيزنەس يدەيالاردى جۇزەگە اسىرۋعا مۇمكىندىك بەرەتىن جەڭىلدەتىلگەن گرانت ۇتىپ الدى. مەملەكەت قولداۋى تەك قۇرال-جابدىق ساتىپ الۋدان بولەك ءىستى جوسپارلاۋدا دا سەرپىن بەردى.
ءونىم تانىمال بولۋ ءۇشىن ساپاسىنا سىن كەلمەۋى كەرەك. سوندىقتان دا ول تسەحقا قاجەتتى شيكىزاتتى جالاعاش اۋدانىنداعى سەنىمدى فەرمەرلەردەن عانا ساتىپ الادى. ءاربىر ەت پارتياسى قاتاڭ تەكسەرۋدەن وتەدى. تۇتىنۋشىلار سەنىمىنە يە بولعان «تاۋداي بول» ساۋدا بەلگىسىمەن وندىرىلەتىن شۇجىق ونىمدەرى مەن جارتىلاي فابريكاتتار وبلىس ورتالىعىنداعى 16 دۇكەننىڭ سورەسىنەن ورىن تەپكەن. كاسىپكەر الدا ءونىم تۇرلەرىن كوبەيتە ءتۇسۋدى جوسپارلاپ وتىرعانىن ايتادى. ەلىمىزدەن بولەك سىرتتان دا تۇتىنۋشىلار تابۋ باعىتىندا ىزدەنىس بار.
«تۇمار» شاعىن ونەركاسىپ ايماعىنان 20 ءتۇرلى كونديتەر ءونىمىن شىعاراتىن جاڭا تسەحىن ىسكە قوسقان كاسىپكەر مەملەكەت تاراپىنان كورسەتىلىپ جاتقان قولداۋ شارالارى ونىڭ ءىسىن ىلگەرىلەتۋگە دەم بەرىپ وتىرعانىن ايتادى. بۇگىندە ەكى تسەحتا 11 ادام تۇراقتى جۇمىسپەن قامتىلسا, الدا ءوندىرىستى كەڭەيتىپ, تاعى ءبىر ساۋدا نۇكتەسىن اشۋ جوسپاردا بار. تالابى بيىك «تاۋداي بول» بۇل ۇدەدەن كورىنەتىنىنە سەنىم مول.
«ىسىڭە ادال بولىپ, العان بەتىڭنەن تايماساڭ, تابىسقا جەتەسىڭ. مەملەكەت ءاردايىم قولداۋ جاساپ, ءتۇرلى بيزنەس يدەيانى جۇزەگە اسىرۋعا مۇمكىندىك جاساپ كەلەدى», دەيدى كاسىپ يەسى.
قىزىلوردا