17 ماۋسىمدا الماتىدا ارالاس جەكپە-جەكتەن وتەتىن اسا-205 تۋرنيرىندە ارتەم رەزنيكوۆتىڭ (26-11) قارسىلاسى بەلگىلى بولدى. «سپارتاك» دەگەن بۇركەنشىك ەسىممەن تانىلعان وتانداسىمىز زاۋر «ەل پانتەرا» گادجيەۆپەن (13-5) كۇش سىناسادى. ارتەمگە بۇل جارىستا مىندەتتى تۇردە جەڭىسكە جەتۋ قاجەت. سەبەبى ول سوڭعى جەتى باسەكەنىڭ بەسەۋىندە جەڭىلىستىڭ كەرمەك ءدامىن تاتتى. ەندى «سپارتاك» تاعى ءبىر رەت ۇتىلسا, وندا اتالعان پروموۋشەننەن كەتۋى مۇمكىن.
بۇل كۇندەرى فيليپپيندە ۆولەيبولدان ايەلدەر اراسىندا ازيانىڭ ۇلتتار كۋبوگى ءوتىپ جاتىر. تۇساۋكەسەر كەزدەسۋدە قازاقستان قۇراماسى گونكونگتى ۇتتى – 3:1 (20:25, 25:17, 25:16, 25:13). كەلەسى كەزدەسۋدە يندونەزيانى تازا جەڭدى – 3:0 (25:19, 25:19, 25:18. ءۇشىنشى تۋردا يراندى تىزە بۇكتىردى – 3:1 (13:25, 25:20, 25:14, 25:18). ودان كەيىن ليۆاننىڭ تاس-تالقانىن شىعاردى – 3:0 (25:11, 25:19. 25:14). سوڭعى ماتچتا ۆەتنامعا قارسى وينادىق. فاۆوريتتەرگە قارسى وتكەن شيەلەنىستى اسا باسەكەدە ءبىزدىڭ قىزدار تاماشا ويىن ۇلگىسىن كورسەتىپ, كۇمانسىز جەڭىسكە جەتتى – 3:2 (18:25, 25:19, 23:25, 25:22, 15:13). ءسويتىپ, ءوز توبىندا ءبىرىنشى ورىن العان جەرلەستەرىمىز جارتىلاي فينالعا جولداما الدى. ال كەلەسى توپتا وڭتۇستىك كورەيا مەن تايپەي وزدى.
25 جاستاعى پسج-نىڭ ويىنشىسى حۆيچا كۆاراتسحەليا ۋەفا چەمپيوندار ليگاسىنىڭ ەڭ ۇزدىك ويىنشىسى دەپ تانىلدى. ءوز مانسابىن ءتبيليسيدىڭ «تورپەدوسىندا» باستاعان حۆيچا ءار كەزدەرى گرۋزيانىڭ «رۋستاۆي» مەن «دينامو باتۋمي», ماسكەۋدىڭ «لوكوموتيۆ», يتاليانىڭ «ناپولي» كلۋبتارىندا وينادى. بىلتىر فرانتسياعا قونىس اۋدارىپ, پسج-نىڭ جەيدەسىن كيدى. ۆينگەر مىندەتىن اتقارىپ جۇرگەن ول پاريجدىك كوماندامەن بىرگە 42 رەت جاسىل الاڭعا شىعىپ, 12 گولدىڭ اۆتورى اتاندى. گرۋزيا قۇراماسى ساپىندا 49 ماتچتا قارسىلاستار قاقپاسىن 22 رەت ءدال كوزدەدى.
بيىلعى ماۋسىمداعى ۋەفا چەمپيوندار ليگاسى پسج-نىڭ جەڭىسمەن اياقتالعانى بەلگىلى. فينالدا ولار لوندوننىڭ «ارسەنالىن» پەنالتي سوعۋ بارىسىندا (/1:1, 4:3) ۇتتى. شەشۋشى ويىندا دا كۆاراتسحەليا گول سوقتى. ال ۋەفا-نىڭ شارتتى قۇرامىنا مىنا ويىنشىلار ەندى: قاقپاشى – داۆيد رايا («ارسەنال»), قورعاۋشىلار – نۋنۋ مەندەش (پسج), گابريەل ماگالياەس («ارسەنال»), ماركينوس (پسج), ماركوس لورەنتە («اتلەتيكو»). جارتىلاي قورعاۋشىلار – حۆيچا كۆاراتسحەليا (پسج), ۆيتينيا (پسج), دەكلان رايس («ارسەنال»), مايكل وليسە («باۆاريا»). شابۋىلشىلار – گارري كەين («باۆاريا»), ۋسمان دەمبەلە (پسج).