دەمالىس كۇندەرى فۋتبولدان الەم چەمپيوناتىندا كانادا مەن بوسنيا-گەرتسەگوۆينا, اقش پەن پاراگۆاي, قاتار مەن شۆەيتساريا, برازيليا مەن ماروككو, گايتي مەن شوتلانديا, اۋستراليا مەن تۇركيا, گەرمانيا مەن كيۋراساو كۇش سىناستى. كەشە نيدەرلاند پەن جاپونيا, كوت-د’يۆۋار مەن ەكۆادور, شۆەتسيا مەن تۋنيس اراسىنداعى تارتىستى تاماشالادىق.
ەكى ويىن دا تەڭ اياقتالدى
ءوز تاريحىندا كانادا الەمدىك دوپ دوداسىنا ەكى مارتە عانا قاتىستى. العاشىندا 1986 جىلى مەكسيكادا, ەكىنشى رەت 2022 جىلى قاتاردا باق سىنادى. سول چەمپيوناتتاردا باس-اياعى التى ويىن وتكىزىپ, جەڭىلىستەن كوز اشپادى. «ەر كەزەگى – ۇشكە دەيىن» دەمەكشى, ۇيەڭكى جاپىراقتار ەلى وكىلدەرىنە وسى جولى جايسىز ستاتيستيكانى تۇزەۋگە جاقسى مۇمكىندىك تۋىندادى. ولاي دەۋگە ەكى نەگىز بار. بىرىنشىدەن, كانادا – سپورتتىق شارانى قابىلداۋشى مەملەكەتتەردىڭ ءبىرى, توپتىق ءتۋرنيردى ءوز جەرىندە وتكىزەدى. ەكىنشىدەن, تۇساۋكەسەر كەزدەسۋىندەگى قارسىلاستارى سونشالىقتى مىقتى ەمەس. حح عاسىردىڭ 90-جىلدارىندا عانا يۋگوسلاۆيادان ءبولىنىپ شىققان بوسنيا مەن گەرتسەگوۆينا وسىعان دەيىن مۋنديالعا ءبىر رەت قانا قاتىستى. 2014 جىلى برازيلياداعى تۋرنيردە بوسنيالىقتار ءبىر ويىندا ۇتىپ, ەكەۋىندە ۇتىلدى.
تورونتوداعى «بيمو فليد» ستاديونىندا تاريحي وقيعا تىركەلىپ, ەلىمىزدىڭ پرەمەر-ليگاسىندا وينايتىن فۋتبولشى تۇڭعىش رەت الەم چەمپيوناتىندا ونەر كورسەتتى. ول – «استانانىڭ» جارتىلاي قورعاۋشىسى يۆان باشيچ. كەزدەسۋدىڭ 21-مينۋتىندا ءدال سول حاۆبەكتىڭ بۇرىشتامادان بەرگەن دوبىن يوۆو لۋكيچ باسپەن قاقپاعا ءدوپ ءتۇسىردى. 78-مينۋتتا كارل لارين ەسەپتى تەڭەستىردى – 1:1.
قاتار مەن شۆەيتساريا اراسىنداعى ماتچتىڭ 17-مينۋتىندا بريل ەمبولو پەنالتيدەن گول سوعىپ, كومانداسىن العا شىعاردى. ودان كەيىن دە باسىمدىق ەۋروپالىقتاردا بولدى. بىراق ولاردىڭ تولاسسىز شابۋىلى ەش ناتيجە بەرمەدى. ويىننىڭ سوڭعى مينۋتتارىندا بۋالەم حۋحي تارازى باسىن تەڭەستىردى – 1:1.
اقش ايبار كورسەتتى, اۋستراليا الدىرمادى
سەنبىدە «D» توبىنداعى كوماندالار جارىسى ءوتتى. لوس-اندجەلەستەگى «سوۋ-فاي ستەديۋمدا» اقش قۇراماسى پاراگۆايدى ويسىراتا ۇتتى. بارلىعى جارتىلاي قورعاۋشى داميان بوباديليانىڭ 7-مينۋتتا ءوز قاقپاسىنا ابايسىزدا گول سوعىپ العانىنان كەيىن باستالدى. ءبىرىنشى تايم اياقتالعانعا دەيىن فولارين بالوگان ەكى مارتە مەرگەندىك تانىتتى. نەگىزى ونىڭ حەت-تريك جاساۋى دا مۇمكىن ەدى. بىراق امەريكالىق شابۋىلشىنىڭ تاعى ءبىر دوبى ەسەپكە الىنبادى. بۇل رەتتە تورەشى «وفسايد» بەلگىلەدى. 73-مينۋتتا ماۋريسيو قارىمتا ءبىر گول سوققانىمەن, 90+7-مينۋتتا دجوۆانني رەين ءتورتىنشى دوپتى توردا تۋلاتتى – 4:1.
اۋستراليا مەن تۇركيا اراسىنداعى كەزدەسۋدىڭ ءفاۆوريتى تۇرىكتەر ەدى. الايدا جارىسقا وتە جاقسى دايىندىقپەن كەلىپ, ساۋاتتى تاكتيكا قۇرا بىلگەن جاسىل قۇرلىق فۋتبولشىلارى قارسىلاستارىنىڭ بار جوسپارىن كۇل-تالقان ەتتى. دوپقا يەلىك ەتۋ, سوققى جاساۋ, قاقپانى ءجيى تورۋىلداۋ, باسقا دا قيمىلدار جونىندە باسىمدىق اندولى ەلى وكىلدەرىندە بولعانى راس. بىراق ولار ودان ەشتەڭە وندىرە المادى. اۋستراليالىقتار از شابۋىلداعانىمەن, ەكى رەت نىسانانى ءدال كوزدەپ, تۇرىكتەردى سازعا وتىرعىزدى. ءبىرىنشى كەزەڭ بەل ورتادان اۋعان تۇستا, قارىمتا شابۋىل كەزىندە نەستوري يرانكۋندا ەسەپ اشتى.
ۇزىلىستەن كەيىن جەڭىپ جاتقان كوماندا تۇركيالىقتاردىڭ سانسىز شابۋىلىنا تويتارىس بەرىپ قانا قويماي, 75-مينۋتتا كوننور مەتكالف الىس بۇرىشتى ءدال كوزدەدى – 2:0.
«اتلاس ارىستاندارى» «پەنتاكامپەوندارعا» توتەپ بەردى
استانا ۋاقىتىمەن 03:00-دە برازيليا مەن ماروككو شەبەرلىك بايقاستى. «اتلاس ارىستاندارى» الەمنىڭ بەس دۇركىن چەمپيوندارىنان ەش قايمىققان جوق. ويىننىڭ العاشقى مينۋتتارىندا افريكالىقتار العا ۇمتىلىپ, پەلەنىڭ وتانداستارىن ابدەن قىسپاققا الدى. كارلو انچەلوتتيدىڭ كومانداسى ءوز قاقپالارىنا قاراي ىعىستى. «پەنتاكامپەوندار» بىرتە-بىرتە ءوز-وزدەرىنە كەلىپ, شابۋىلداي باستاعان ەدى, الاڭىنىڭ ورتاسىنان برايم دياس يسماەل سايباريگە كەرەمەت پاس بەردى. كوز ىلىسپەس جىلدامدىقپەن گابريەل ماگالياينس مەن ماركينوستىڭ اراسىنان سىتىلىپ شىققان پسۆ-ءنىڭ جارتىلاي قورعاۋشىسى دوپتى اليسوننان اسىرا سالدى.
قاپيادا جىبەرىپ العان گولدان كەيىن دە برازيليالىقتاردىڭ ويىنى ۇيلەسپەدى. تەك 32-مينۋتتا عانا ۆينيسيۋس جۋنيور تارازى باسىن تەڭەستىردى – 1:1. ءمادريدتىڭ «رەالىنىڭ» جۇلدىزى ءوز ستيلىندە كەرەمەت سوققى جاساپ, دوپتى تورعا توعىتتى. شىنى كەرەك, بۇل باسەكەدە برازيليانىڭ باسىمدىعى بايقالمادى. كەرىسىنشە, ماروككونىڭ فۋتبولشىلارى تاماشا وينادى. تەحنيكالارى جەتىك, تاكتيكالىق ساۋاتتىلىعىندا ەش ءمىن جوق. دريبلينگ جاساۋ, ءدال پاس بەرۋ جاعىنان دا موحامەد ءۋابيدىڭ شاكىرتتەرى «فۋتبول سيقىرشىلارىنان» كەم سوقپادى. قوس كوماندا دا بىرنەشە مۇمكىندىك بولعانىمەن, باسەكەنىڭ سوڭىنا دەيىن تەڭ ەسەپ ساقتالدى.
تاڭ اتا «س» توبىنداعى كەلەسى جۇپ – گايتي مەن شوتلانديا قۇرامالارى الاڭعا شىقتى. 28 جىلدان كەيىن مۋنديالعا قايتا ورالعان ەۋروپالىقتار بۇل ماتچا جەڭىسكە جەتتى – 0:1. جالعىز گولدى 28-مينۋتتا جارتىلاي قورعاۋشى دجون ماكگينن سالدى.
سەگىز گول سوعىلعان ويىن
«ە» توبىنداعى تارتىستى گەرمانيا مەن كيۋراساو قۇرامالارى باستادى. كەزىندە انگليانىڭ داڭقتى فۋتبولشىسى گاري لينەكەردىڭ «فۋتبولدى 22 ادام ويناعانىمەن, ءتۇبى نەمىستەر جەڭىسكە جەتەدى» دەپ ايتقان قاناتتى ءسوزى بار. ال نەبارى 150 000 حالقى بار, كاريب تەڭىزىندە ورنالاسقان شاعىن عانا ەلدىڭ فۋتبولشىلارى الەمدىك دوپ دوداسىنا جولداما الادى دەپ ەشكىم دە ويلاماپ ەدى. ءبىر ايتا كەتەرلىگى, كيۋراساو كونكاكاف اۋماعىندا وتكەن ىرىكتەۋ تۋرنيرىندە بىردە-ءبىر رەت جەڭىلىستىڭ كەرمەك ءدامىن تاتقان جوق. ەكىنشى كەزەڭدە ولار گايتي, سەنت-ليۋسيا, ارۋبا, باربادوستان باسىم تۇسسە, ءۇشىنشى تۋردا يامايكا, ترينيداد پەن توباگو, بەرمۋد ارالدارىن ارتقا تاستادى. بارلىعى 10 كەزدەسۋدە 7 رەت جەڭىسكە جەتىپ, 3 ويىندى تەڭ اياقتادى. دوپ ايىرماشىلىعى – 28:5.
مۋنديالدا كيۋراساو داڭقى الىسقا تاراعان گەرمانيامەن جارتى ساعاتتان اسا ۋاقىت تىرەستى. 6-مينۋتتا فەليكس نمەچا سوققان دوپقا ولار 21-مينۋتتا ليۆانو كومەنەنسيانىڭ گولىمەن جاۋاپ بەردى. ءبىرىنشى كەزەڭنىڭ اياقتالۋىنا شامامەن 10 مينۋتتاي ۋاقىت قالعاندا «نەمىس ماشيناسى» وت الدى. ەندى ولاردى توقتاتۋ مۇمكىن ەمەس ەدى. نيكو شلوتتەربەك (38- مينۋت), كاي حاۆەرتس (45+5 مينۋت, پەنالتيدەن), دجامال مۋسيالا (47-مينۋت), ناتانيەەل براۋن (68-مينۋت), دەنيز ۋەداۆ (78-مينۋت) بىرىنەن سوڭ ءبىرى نىسانى ءدال كوزدەپ, ەسەپتى 7:1-گە جەتكىزدى.
جەكسەنبى كۇنگى وزگە ماتچتار مىناداي ناتيجەمەن اياقتالدى: كوت-د’يۆۋار – ەكۆادور («E» توبى) 1:0, نيدەرلاند – جاپونيا («F» توبى) 2:2, شۆەتسيا – تۋنيس (F توبى) 5:1.