كوك جۇزىنەن اعاراڭداعان پاراپلان اعىنداتقان كۇيى شەشەك اسۋىنداعى جازىققا قوندى. اسكەري ارداگەر ۇشقىش نيكولاي پەتينتسەۆ رەفەرەندۋم ۋچاسكەسىنە داۋىس بەرۋگە كەلە جاتقان بەتى ەكەن. دەرەۋ پاراپلانىن جيناستىردى دا, وزىنە تيەسىلى ۋچاسكەگە قاراي اسىقتى.
اسكەري وقۋدى ءتامامداي سالا ۇشاق تىزگىندەگەن ول ءالى كۇنگە دەيىن زەڭگىر كوكتەن تۇسكەن جوق. قولى قالت ەتسە, ءوزى قۇراستىرعان پاراپلانىن وتالدىرىپ, اسپان الەمىندە قالىقتاپ ءجۇرۋدى ۇناتادى. ساياسي ناۋقاندا دا ەلدىڭ ارمانى بيىك بولسىن دەگەن نيەتتە بيىكتەن كەلىپ داۋىس بەرگەن. جولاي اڭگىمەلەسىپ كەلە جاتقانىمىزدا كوك اسپاندا قانداي جاۋاپكەرشىلىكتى سەزىنسەڭ, ەل ەرتەڭى ءۇشىن دە سولاي جاۋاپتىسىڭ دەيدى قازاقستان قارۋلى كۇشتەرىنىڭ زەينەتتەگى پولكوۆنيگى نيكولاي پەتينتسەۆ. بالا جاستان زەڭگىر كوكتە قالىقتاۋدى ارمانداعان ول زەينەتكە دەيىن اسكەري ۇشاق تىزگىنىنەن تۇسپەگەن. پاراپلانمەن عانا ەمەس, پاراشيۋتپەن سەكىرۋدىڭ دە اككى شەبەرى. وسكەمەندەگى پاراشيۋتتەن سەكىرۋ كلۋبىنىڭ نەگىزىن قالاۋشى. ايتا بەرسەك, اتقارعان ەڭبەگى ەرەن.
ء«ومىر بويى مەملەكەتكە قىزمەت ەتتىم. الپىس ۇشكە كەلسەم دە, ساياسي ناۋقانداردان قالمايمىن», دەيدى نيكولاي پەتينتسەۆ.
نيكولايدىڭ اسپانعا دەگەن قىزىعۋشىلىعى بالا كەزىنەن باستالعان. ءتىپتى بەس جاسىندا-اق بولاشاقتا ۇشقىش بولامىن دەپ نىق سەنىممەن ايتىپ ءجۇرىپتى.
كاتونقاراعاي اۋدانى بەلقاراعاي اۋىلىندا تۋعان ول 16 جاسىندا پاراشيۋت سپورتىمەن اينالىسا باستايدى. 1978 جىلى اۆياتسيالىق-سپورت كلۋبىنىڭ بازاسىندا العاش رەت پاراشيۋتتەن سەكىرگەن. كەيىن بارناۋلداعى اسكەري ۇشقىشتار ۋچيليششەسىنە ءتۇسىپ, كاسىبي ۇشقىش اتانادى. وقۋىن اياقتاعان سوڭ, «سۋ-24» ۇشاعىمەن اۋعانستاندا جاۋىنگەرلىك تاپسىرمالار ورىنداعان. اسكەري ۇشاقپەن ەل شەكاراسىن كۇزەتكەن.
بەرتىندە ن.پەتينتسەۆ پاراپلانمەن ۇشۋعا قىزىعىپ, جاڭا باعىتقا بەت بۇرادى. كەيىنگى ون جىلدا ول جەردەن گورى اسپاندا كوبىرەك ۋاقىت وتكىزەتىنىن ايتادى.
شىعىس قازاقستان وبلىسى