پاۆلودار وبلىسىندا ءۇش جاسار قىزىن ولتىرگەن 26 جاستاعى اۋىل تۇرعىنى ءومىر بويىنا باس بوستاندىعىنان ايىرىلدى, دەپ حابارلايدى Egemen.kz.
تەرگەۋ بارىسىندا ءبۇلدىرشىننىڭ ۇزاق ۋاقىت بويى زورلىق-زومبىلىق كورگەنى انىقتالعان. مەملەكەتتىك ايىپتاۋشى ەلەنا كورنەۆانىڭ ايتۋىنشا, سوتتالۋشى قىزىنىڭ وزىنەن تۋعانىنا كۇماندانىپ, وعان ءجيى قول كوتەرگەن.
ءىس ماتەريالدارىنا سايكەس, 2025 جىلدىڭ قىركۇيەگىندە ەر ادام كورشىسىنىڭ مونشاسىندا ىشىمدىك ىشكەننەن كەيىن ۇيىنە كەلىپ, قىزىن سوققىعا جىققان. كەيىن ونى وزىمەن بىرگە مونشاعا الىپ بارىپ, ەدەنگە لاقتىرىپ جىبەرگەن. اۋىر جاراقات العان ءبۇلدىرشىن اۋداندىق اۋرۋحانادا كوز جۇمدى.
سوت بارىسىندا ايىپتالۋشى كىناسىن تولىق مويىنداعان جوق. ونىڭ سوزىنشە, قىزىنا ءوزى ەمەس, كوبىنە اناسى قول كوتەرگەن. سونداي-اق ول بالانىڭ ولىمىنە ابايسىزدا سەبەپكەر بولعانىن مالىمدەدى.
الايدا سوت ۇسىنىلعان دالەلدەردى جەتكىلىكتى دەپ تانىپ, ەر ادامدى ءومىر بويىنا باس بوستاندىعىنان ايىرۋ تۋرالى ۇكىم شىعاردى. بۇدان بولەك, ول مارقۇم قىزدىڭ اناسىنا 5 ميلليون تەڭگە كولەمىندە مورالدىق وتەماقى تولەۋگە مىندەتتەلدى.
سوت ۇكىمى جاريالانعان ساتتە سوتتالۋشىنىڭ جاعدايى ناشارلاپ, ەسىنەن تانىپ قالعان.
ەسكە سالايىق ,جەتىسۋ وبلىسى جاركەنت قالاسىندا ايەل ءوز بالاسىن بايلاپ قويىپ, قاتىگەزدىكپەن ۇرعان.
ال شىمكەنتتە سوت شەشىمىمەن ءوز بالالارىن ازاپتاعان ايەلگە 5 جىل 3 اي مەرزىمگە باس بوستاندىعىنان ايىرۋ جازاسى تاعايىندالدى.