ۇلتتىق ءبىلىم بەرۋ پلاتفورماسى قازاقستانعا نە ءۇشىن قاجەت؟

OQU مەملەكەت باسشىسى قاسىم-جومارت توقاەۆتىڭ مەملەكەتتىك قىزمەتتەردى تسيفرلاندىرۋ جانە بىرىڭعاي تسيفرلىق ينفراقۇرىلىمدى دامىتۋ جونىندەگى تاپسىرمالارىن ىسكە اسىرۋ اياسىندا جاساقتالىپ وتىر. جوبا دەرەكتەردىڭ وزەكتىلىگى مەن بىرىزدىلىگىن قامتاماسىز ەتۋدەن باستاپ, پروتسەستەردىڭ اشىقتىعىن ارتتىرۋعا دەيىنگى بىرقاتار جۇيەلى مىندەتتەردى شەشۋگە باعىتتالعان. بۇگىنگى تاڭدا پلاتفورما ارقىلى ءبىرىنشى سىنىپقا قۇجات قابىلداۋعا 105 مىڭنان استام ءوتىنىش بەرىلگەن. قىزمەتتى ىسكە قوسۋ پروتسەسى رەسپۋبليكا بويىنشا كەزەڭ-كەزەڭىمەن جۇرگىزىلىپ جاتىر.

ءبىلىم بەرۋ پلاتفورماسىن وقۋ-اعارتۋ مينيسترلىگى, جاساندى ينتەللەكت جانە تسيفرلىق دامۋ مينيسترلىگى, «قازاقتەلەكوم» اق, Bilim Group IT حولدينگى مەن «ۇلتتىق اقپاراتتىق تەحنولوگيالار» اق بىرلەسە جۇزەگە اسىرعان. ۇلتتىق پلاتفورمانىڭ قانداي مىندەتتەردى شەشەتىنىن جانە ونىڭ ءبىلىم بەرۋ جۇيەسىن تسيفرلاندىرۋداعى ءرولى قانداي بولاتىنىن سارالاپ كوردىك.

مامىر ايىنىڭ 27-ىسىنەن باستاپ ەلىمىزدە بالالاردى ءبىرىنشى سىنىپقا قابىلداۋ باستالدى. وتكەن جىلدارعا قاراعاندا, بيىل قۇجات تاپسىرۋ وڭىرلەر بويىنشا كەزەڭ-كەزەڭىمەن باستالىپ جاتىر. استانا قالاسى مەن اباي, جەتىسۋ وبلىسى, قىزىلوردا, باتىس قازاقستان وبلىستارىنداعى اتا-انالار ءبىرىنشى بولىپ مەكتەپكە قۇجات تاپسىرعاندار قاتارىندا بولسا, 10 ماۋسىمنان باستاپ مەملەكەتتىك قىزمەت الماتى قالاسى مەن اقمولا, اقتوبە, جامبىل, شىعىس قازاقستان وبلىستارىنىڭ تۇرعىندارىنا قولجەتىمدى بولدى. بيىل بۇل قىزمەت OQU ۇلتتىق ءبىلىم بەرۋ پلاتفورماسى ارقىلى جۇزەگە اسىپ وتىر. الايدا ءبىرىنشى سىنىپقا قابىلداۋ پلاتفورمادا الداعى ۋاقىتتا ۇسىنىلاتىن بىرنەشە مەملەكەتتىك قىزمەتتىڭ ءبىرى عانا بولماق.

ء«بىرىنشى سىنىپقا قۇجات قابىلداۋ – OQU پلاتفورماسىنا كوشىرىلگەن العاشقى اۋقىمدى قىزمەتتەردىڭ ءبىرى. بۇل ءبىز ءۇشىن وتە ماڭىزدى قىزمەت دەسەك بولادى, ويتكەنى جىل سايىن ەلىمىز بويىنشا ءجۇز مىڭداعان وتباسى وسى قىزمەتتى پايدالانادى. وتكەن جىلدارمەن سالىستىرعاندا بۇل پروتسەستى ايتارلىقتاي جەڭىلدەتتىك. مەملەكەتتىك اقپاراتتىق جۇيەلەرمەن ىقپالداسۋ ارقاسىندا قاجەتتى دەرەكتەردىڭ باسىم بولىگى اۆتوماتتى تۇردە جۇكتەلەدى. سوندىقتان اتا-انالارعا بۇرىنعىداي قۇجات جيناۋدىڭ نەمەسە ءتۇرلى جۇيەلەرگە ءبىر اقپاراتتى قايتالاپ ەنگىزۋدىڭ قاجەتى جوق. تەك پلاتفورماعا كىرىپ, مەكتەپتى تاڭداپ, ءوتىنىم بەرۋ جەتكىلىكتى. وعان قوسا, بيىل پلاتفورما وڭىرلەر بويىنشا كەزەڭ-كەزەڭىمەن ىسكە قوسىلىپ جاتىر. مۇنداي ءتاسىل جۇكتەمەنى بىركەلكى بولۋگە جانە قۇجات قابىلداۋ ناۋقانى كەزىندە جۇيەنىڭ تۇراقتى جۇمىسىن قامتاماسىز ەتۋگە مۇمكىندىك بەردى», دەيدى پلاتفورما ازىرلەۋشىلەردىڭ ءبىرى Bilim Group IT حولدينگىنىڭ باس ديرەكتورى الەكساندر ساۆچەنكو.

ونىڭ ايتۋىنشا, OQU ۇلتتىق پلاتفورماسى ءبىلىم بەرۋ جۇيەسىندەگى دەرەكتەردى, مەملەكەتتىك قىزمەتتەردى جانە نەگىزگى پروتسەستەردى ءوزارا بايلانىستىراتىن بىرىڭعاي تسيفرلىق ورتا قالىپتاستىرۋعا باعىتتالعان. جۇيە مەملەكەتكە ناقتى ءارى اشىق دەرەكتەرگە سۇيەنۋگە, ءبىلىم بەرۋ ۇيىمدارىنا ءبىرىزدى پروتسەستەردى ازايتۋعا, ال ازاماتتارعا مەملەكەتتىك قىزمەتتەردى جىلدام ءارى ىڭعايلى فورماتتا الۋعا مۇمكىندىك بەرەدى.

جاساندى ينتەللەكت ءار سىنىپتا: پرەزيدەنت جارلىعى ورتا ءبىلىم بەرۋدى اۋقىمدى تسيفرلاندىرۋدى باستايدى

«Bilim Group بۇل جوباعا تەحنولوگيالىق جانە ادىستەمەلىك سەرىكتەس رەتىندە قاتىسىپ وتىر. ءبىزدىڭ كوماندا پلاتفورمانى جاساۋعا, تسيفرلىق شەشىمدەردى ازىرلەپ, ەنگىزۋگە, سونىمەن قاتار OQU-دىڭ مەملەكەتتىك دەڭگەيدە ءتيىمدى جۇمىس ىستەۋىنە قاجەتتى تسيفرلىق پروتسەستەردى جولعا قويۋعا اتسالىستى. پلاتفورمانى ازىرلەۋ بارىسىندا ءبىز ءبىلىم بەرۋ تەحنولوگيالارى سالاسىنداعى 15 جىلدان استام تاجىريبەمىزگە, ونىڭ ىشىندە اۋقىمدى تسيفرلىق جوبالاردى ىسكە اسىرۋداعى جانە ينفراقۇرىلىمدىق شەشىمدەردى قۇرۋداعى ادىستەمەلەرىمىزگە سۇيەندىك», دەيدى الەكساندر ساۆچەنكو.

ۇلتتىق ءبىلىم بەرۋ پلاتفورماسىن جاساقتاۋ كەزىندە مەملەكەتتىك دەرەكقورلارمەن جانە اقپاراتتىق جۇيەلەرمەن ىقپالداسۋعا ەرەكشە ءمان بەرىلگەن. سونىمەن قاتار اقپاراتتىق قاۋىپسىزدىك پەن دەرەكتەردى سەنىمدى ساقتاۋعا ەرەكشە كوڭىل بولىنگەن. پلاتفورما مەملەكەت باسشىسىنىڭ تسيفرلاندىرۋ سالاسىنداعى تاپسىرمالارى اياسىندا دامىپ جاتقان مەملەكەتتىك QazTech پلاتفورماسىندا ورنالاستىرىلعان. بىرىڭعاي مەملەكەتتىك پلاتفورما زاماناۋي قاۋىپسىزدىك ستاندارتتارىن, سەنىمدىلىكتى جانە سەرۆيستەردىڭ ۇزدىكسىز جۇمىسىن قامتاماسىز ەتۋگە مۇمكىندىك بەرەدى. Bilim Group ازىرلەۋشىسى جانە جوبا جەتەكشىسى نازير جاشيبەكوۆتىڭ ايتۋىنشا, جۇيەدە پايدالانۋشىلاردىڭ ارەكەتتەرىن باقىلاۋ, تۇراقتى تەحنيكالىق مونيتورينگ جۇرگىزۋ جانە دەرەكتەردىڭ رەزەرۆتىك كوشىرمەسىن جاساۋ تەتىكتەرى ەنگىزىلگەن. 

«بۇگىنگى تاڭدا OQU ارقىلى 105 مىڭنان استام ءوتىنىم بەرىلدى. جۇيەنىڭ ءتيىمدى تۇستارىن اتا-انالار دا, ءبىلىم بەرۋ ۇيىمدارى دا بايقاپ جاتىر. قولدانۋشىلاردىڭ كەرى بايلانىسىن دا ءجىتى قاداعالاپ وتىرمىز. كوپتەگەن اتا-انا پروتسەستىڭ نەبارى بىرنەشە مينۋت الاتىنىن, مەكتەپتىڭ جاۋابى جىلدام كەلىپ جاتقانىن ايتۋدا. ءبىزدىڭ ويىمىزشا, بۇل تسيفرلاندىرۋدىڭ كۇندەلىكتى ءومىرىمىزدىڭ ءبىر بولىگىنە اينالىپ, قىزمەتتەردى تەز ءارى ىڭعايلى فورماتتا الۋعا قالاي كومەكتەسەتىنىنىڭ ايقىن كورىنىسى», دەيدى نازير جاشيبەكوۆ.

ايتىپ وتكەنىمىزدەي, OQU پلاتفورماسى تەك ءبىر قىزمەتپەن شەكتەلمەيدى. قازىردىڭ وزىندە OQU ارقىلى پيلوتتىق رەجيمدە قوسىمشا ءبىلىم بەرۋ سالاسىنداعى مەملەكەتتىك قىزمەتتەر ۇسىنىلعان. الداعى ۋاقىتتا پلاتفورما مەكتەپكە دەيىنگى, ورتا, سونىمەن قاتار تەحنيكالىق جانە كاسىپتىك ءبىلىم بەرۋ دەڭگەيلەرىن دە قامتىماق.