پرەزيدەنت باسەكەلەستىكتى قورعاۋ جانە دامىتۋ اگەنتتىگىنىڭ توراعاسىن قابىلدادى

اگەنتتىك باسشىسى پرەزيدەنتكە «ەكونوميكانى ىرىقتاندىرۋ جونىندەگى شارالار تۋرالى» جارلىقتىڭ ىسكە اسىرىلۋ بارىسى جونىندە ەسەپ بەردى.

مارات وماروۆتىڭ سوزىنشە, جارلىقتى ورىنداۋ اياسىندا كۆازيمەملەكەتتىك سەكتوردى قىسقارتۋ جانە باسەكەلەستىكتى دامىتۋ باعىتىندا جۇيەلى جۇمىستار جۇرگىزىلىپ جاتىر. وسى ماقساتتا جەكەشەلەندىرۋ جونىندەگى ۇلتتىق كەڭسەنىڭ قاتىسۋىمەن 2026-2030 جىلدارعا ارنالعان كۆازيمەملەكەتتىك سەكتور سۋبەكتىلەرى مەن مەملەكەتتىك مەنشىك وبەكتىلەرىن وڭتايلاندىرۋ جوسپارى بەكىتىلگەن. باسەكەلەستىك ورتاعا بەرىلەتىن اكتيۆتەردىڭ جيىنتىق كىرىسى 3,4 تريلليون تەڭگەگە جەتكەن.

كەزدەسۋدە مەملەكەتتىك ساتىپ الۋ جۇيەسىن رەفورمالاۋ ناتيجەلەرى دە تالقىلاندى. قابىلدانعان شارالاردىڭ ارقاسىندا ءبىر كوزدەن ساتىپ الۋ ۇلەسى 39 پايىزدان 24 پايىزعا دەيىن تومەندەگەن. سونىڭ ناتيجەسىندە جالپى بيۋدجەتتەگى باسەكەلى ساتىپ الۋ كولەمى 6,2 تريلليون تەڭگەدەن 8,1 تريلليون تەڭگەگە دەيىن ۇلعايعان.

پرەزيدەنت الاتاۋ قالاسىن دامىتۋعا قاتىستى بىرقاتار تاپسىرما بەردى

سونداي-اق اگەنتتىك توراعاسى بيزنەس سۋبەكتىلەرىنىڭ تاۋار نارىقتارىنا شىعۋىنا كەدەرگى كەلتىرەتىن توسقاۋىلداردى جويۋ, ماڭىزدى نارىقتارداعى ءونىمسىز دەلدالداردى قىسقارتۋ جانە تسيفرلىق ەكونوميكانى رەتتەۋدىڭ جاڭا تاسىلدەرىن ازىرلەۋ بويىنشا اتقارىلىپ جاتقان جۇمىستار تۋرالى باياندادى.

بۇدان بولەك, باسەكەلەستىكتى قورعاۋ جانە دامىتۋ سالاسىنداعى زاڭنامالىق تۇزەتۋلەردىڭ التىنشى پاكەتى تانىستىرىلدى. زاڭ جوباسىندا باسەكەلەستىك ساياساتتىڭ تيىمدىلىگىن ارتتىرۋعا, مونوپوليالانعان نارىقتارداعى باقىلاۋدى كۇشەيتۋگە, مونوپولياعا قارسى رەتتەۋدى جەتىلدىرۋگە جانە ەكونوميكانىڭ مەملەكەتتىك سەكتورداعى ۇلەسىن قىسقارتۋعا باعىتتالعان جەتى جۇيەلى باعىت قاراستىرىلعان.

كەزدەسۋ سوڭىندا مەملەكەت باسشىسى اگەنتتىك توراعاسىنا بىرقاتار ناقتى تاپسىرما بەردى.

ەسكە سالا كەتەيىك, بۇعان دەيىن مەملەكەت باسشىسى ىشكى ىستەر ءمينيسترى ەرجان سادەنوۆتى قابىلدادى. ءمينيستردىڭ سوزىنشە, بەس ايدىڭ قورىتىندىسى بويىنشا تىركەلگەن قىلمىس سانى بىلتىرعى كەزەڭمەن سالىستىرعاندا 9 پايىزعا تومەندەگەن.