كەشەدەن بەرى موڭعوليالىق ءباسپاسوز قۇرالدارى ۇشاقتا اۋىر جۇرەك تالماسىنا ۇشىراعان ايەلدى اجالدان قۇتقارىپ قالعان دارىگەر تۋرالى جارىسا جازىپ جاتىر.
ايەلدى اجال اۋزىنان امان الىپ قالعان ادام – موڭعولياعا ەڭبەك سىڭىرگەن دارىگەر, مەملەكەتتىك ۇلى قۇرال دەپۋتاتى ءھام قورشاعان ورتا, ازىق-ت ۇلىك جانە اۋىل شارۋاشىلىعى جونىندەگى تۇراقتى كوميتەت توراعاسى بەيسەن بۇلان ۇلى ەكەن.
وسى قازاق قايراتكەرىمەن ۇشاقتا ساپارلاس بولعان تاعى ءبىر ارىپتەسى, ياعني مەملەكەتتىك ۇلى قۇرال دەپۋتاتى ب.مونحباياسگالان «www.newsroom.mn» پورتالىنىڭ الەۋمەتتىك جەلىدەگى پاراقشاسىندا جاريالاعان جازباسىندا: «وتكەن سەنبى كۇنى ىستانبۇل قالاسىنان ۇشىپ شىعىپ, ۇلان-باتىرعا بەتتەپ كەلە جاتقان «Turkish Airlines» اۋە لاينەرىنىڭ ىشىندە توتەنشە وقيعا ورىن الدى. اۋە كەمەسى تاجىكستان اسپانىندا قالقىپ كەلە جاتقان-تىن. جولاۋشىلار بەيعام. ءباز ءبىرى ۇيقىدا. كەنەت ەكيپاج كومانديرى, جولاۋشىلاردىڭ ءبىرىنىڭ دەنساۋلىعى كۇرت تومەندەگەنىن, ەسى كىرەسىلى-شىعاسىلى كۇيگە تۇسكەنىن, ۇشاق ىشىندە دارىگەر بولسا كومەككە كەلۋىن ءوتىنىپ, تۇرىك جانە اعىلشىن تىلىندە جاريا ءتۇسىردى. سول ساتتە ارىپتەسىم بەيسەن دەرەۋ اتىپ تۇرىپ, ىسكە كىرىستى. بۇل ازامات ەكيپاج مۇشەلەرىمەن تاپ-تازا تۇرىك تىلىندە سويلەسىپ, ۇشاقتى دۋشانبەگە قوندىرۋدىڭ قاجەتى جوق ەكەنىن, بۇيىرسا اۋرۋدى اجال قۇشتىرمايمىن دەپ نىق سەنىممەن ايتتى جانە ونى اجال اۋزىنان الىپ قالدى» دەپ جازىپتى.
جوعارىداعى جاڭالىقتى ەستىگەننەن كەيىن كەشە تاڭمەن تالاسا بەيسەن بۇلان ۇلىنا حابارلاستىق:
– ۇكىمەت جۇمىسىمەن ءبىر توپ ۇلى قۇرال دەپۋتاتتارى وڭتۇستىك افريكاعا بارىپ, قايتاردا ىستانبۇل ارقىلى ۇشىپ كەلە جاتىر ەدىك, – دەيدى دارىگەر باۋىرىمىز. – ۇشاق كومانديرى بورت ىشىندە جولاۋشى ەسىنەن تانىپ قالدى, دەگەن سوڭ جەتىپ باردىم. مەنىڭ ۇزاق جىلعى دارىگەرلىك تاجىريبەم, وزىممەن بىرگە مەديتسينالىق قۇرال-جابدىق, ءدارى-دارمەك الا جۇرەتىن ەدىم. بارىپ, ولشەپ كورسەم ايەلدىڭ قان قىسىمى 220-عا (جوعارعى شەك) جەتىپتى. جۇرەك سوعىسى مينۋتىنا 6-7 رەت ءۇزىلىپ سوعىپ تۇر. بەت-الپەتى كوگەرىپ كەتكەن. قىسقاسى, جاعدايى كۇردەلى. دەرەۋ وتتەگىمەن قانىمداپ, قاسىمدا الىپ جۇرگەن قىسىم تۇسىرەتىن, جۇرەك سوعىسىن رەتتەيتىن ءدارىنى بەرىپ, قوسىمشا دارىگەرلىك شارالار جاسادىم. ۇشاق ۇشۋىن جالعاستىرا بەردى. ەكى ساعات دەگەندە ناۋقاس ەسىن جيىپ, ۇلان-باتىر اۋەجايىنا امان-ەسەن تابانى ءتيدى...
قىسقاسى, 40 جىلدىق تاجىريبەسى بار دارىگەر وسىلاي ۇشاق ىشىندە اۋىرعان ادامدى اجالدان اراشالاپ قالدى.