پرەمەر-مينيستر ولجاس بەكتەنوۆ مەملەكەت باسشىسىنىڭ «تازا قازاقستان» باستاماسىن جۇزەگە اسىرۋ بارىسىنا مونيتورينگ جۇرگىزۋ ورتالىعىنىڭ وتىرىسىن وتكىزدى. وندا كوگالداندىرۋ, ونىڭ ىشىندە ورمان القاپتارىن قۇرۋ, وڭىرلەردە ەكولوگيالىق جوبالاردى جۇزەگە اسىرۋ ماسەلەلەرى قارالدى.
«پرەزيدەنتىمىزدىڭ «تازا قازاقستان» باستاماسىنىڭ نەگىزگى قاعيداتتارى, ونىڭ ىشىندە حالىقتىڭ ەكولوگيالىق مادەنيەتىن قالىپتاستىرۋ, قورشاعان ورتانى قورعاۋ, تابيعاتقا ۇقىپتى قاراۋ سياقتى نەگىزگى قۇندىلىقتار ەلىمىزدىڭ جاڭا كونستيتۋتسياسىندا ناقتى بەكىتىلگەن. تابيعاتتى قورعاۋ – قۇر ءسوز ەمەس, ول بارشامىزدىڭ ورتاق كونستيتۋتسيالىق بورىشىمىز. ەرىكتىلەر ۇيىمدارى مەن جاستاردىڭ الەۋەتىن پايدالانۋىمىز كەرەك. ولاردىڭ بەلسەندى قاتىسۋى تابيعاتقا قامقورلىقپەن قاراۋداعى ساباقتاستىقتى قامتاماسىز ەتەدى. ءبىز كونستيتۋتسيادا بەكىتىلگەن جاڭا ەكولوگيالىق مادەنيەتتىڭ نەگىزىن قالايمىز. ارال تەڭىزى ايماعىندا اعاش وتىرعىزۋ جانە ەكولوگيالىق احۋالدى جاقسارتۋ بويىنشا جۇرگىزىلىپ جاتقان اۋقىمدى جۇمىستار مەملەكەت باسشىسىنىڭ ەكولوگيانى قالپىنا كەلتىرۋ جانە ساقتاۋ, قاۋىپسىز قورشاعان ورتانى دامىتۋ قاعيداتتارىنا دەگەن بەرىك ۇستانىمىن كورسەتەدى. قازىر وندا سەكسەۋىل القاپتارى ەگىلۋدە. ولار تۇزدى داۋىلدارعا توسقاۋىل بولىپ, ءوڭىردىڭ ەكوجۇيەسىن قالپىنا كەلتىرۋگە ىقپالىن تيگىزەدى», دەدى پرەمەر-مينيستر.
ەكولوگيا جانە تابيعي رەسۋرستار ءمينيسترى ەرلان نىسانباەۆ ەلىمىزدەگى ورمان القاپتارى جانە ارال تەڭىزىنىڭ قۇرعاعان تۇبىنە اعاش وتىرعىزۋ جۇمىستارىنىڭ بارىسى تۋرالى باياندادى. جەرگىلىكتى اتقارۋشى ورگانداردىڭ ەكولوگيالىق ءىس-شارالار وتكىزۋ, اۋماقتاردى اباتتاندىرۋ, رۇقسات ەتىلمەگەن قوقىس ورىندارىن جويۋ جانە «تازا قازاقستان» باستاماسىن جۇزەگە اسىرۋعا حالىقتى ەكولوگيالىق اكتسيالارعا تارتۋ جۇمىستارىن ۇيىمداستىرىپ, ۇيلەستىرۋگە ءتيىس ەكەنى ەرەكشە اتاپ ءوتىلدى. وسى ورايدا اقمولا, شىعىس قازاقستان, قىزىلوردا, ماڭعىستاۋ, ۇلىتاۋ وبلىستارىنىڭ جانە شىمكەنت قالاسىنىڭ اكىمدەرى بايانداما جاسادى.
ەكولوگيا جانە تابيعي رەسۋرستار مينيسترلىگىنىڭ دەرەكتەرى بويىنشا 2021–2025 جىلدار ارالىعىندا رەسپۋبليكادا شامامەن 1,6 ملرد اعاش وتىرعىزىلدى. ال بيىل 210 ملن-نان استام كوشەت ەگۋ جوسپارلانعان. جالپى اۋدانى 2,7 مىڭ گەكتار بولاتىن 243 ورمان تالىمباعىندا شامامەن 157 ملن كوشەت ءوسىرىلىپ جاتىر. وسى جىلى تاعى 6 جوبانى جۇزەگە اسىرۋ جوسپارلاندى. ولاردىڭ ارقايسىسىنىڭ وندىرىستىك قۋاتى جىلىنا 6 ملن كوشەتتى قۇرايدى.
ارال ءوڭىرىنىڭ ەكوجۇيەسىن قالپىنا كەلتىرۋ شەڭبەرىندە 2021–2025 جىلدارى مەليوراتسيالىق ورمان جۇمىستارى 1 ملن گەكتاردان استام القاپتا جۇرگىزىلدى. ال قازىرگى ۋاقىتتا 165 مىڭ گەكتار القاپتا جالعاسىپ جاتىر. عىلىمي سۇيەمەلدەۋدى قامتاماسىز ەتۋ ماقساتىندا وڭىردە قازاق ورمان شارۋاشىلىعى جانە اگروورمان مەليوراتسياسى عىلىمي-زەرتتەۋ ينستيتۋتىنىڭ فيليالى قۇرىلدى. ارال تەڭىزىنىڭ قۇرعاعان تۇبىندە تالىمباق قۇرىلىسى جۇرگىزىلىپ جاتىر. سونىمەن قاتار «ارال ورمانى» مەملەكەتتىك تابيعي رەزەرۆاتىن قۇرۋ جۇمىسى اياقتالۋعا جاقىن.
پرەمەر-مينيستر مەملەكەتتىك ورگاندار مەن اكىمدىكتەردىڭ نازارىن مالىمدەلگەن جوسپارلاردى ورىنداۋعا عانا ەمەس, سونداي-اق ەگىلگەن اعاشتاردىڭ كوپ كولەمدە جەرسىنىپ كەتۋىن قامتاماسىز ەتۋ قاجەتتىگىنە دە اۋداردى. وسىعان بايلانىستى ەكولوگيا جانە تابيعي رەسۋرستار مينيسترلىگى اكىمدىكتەرمەن بىرلەسىپ, كوشەتتەردىڭ جەرسىنىپ كەتۋىن مىندەتتى تۇردە قاداعالاي وتىرىپ, بيىلعا جوسپارلانعان وتىرعىزۋ كولەمىن جۇزەگە اسىرۋدى قامتاماسىز ەتۋگە ءتيىس. سونداي-اق مەملەكەت باسشىسى جاريالاعان تسيفرلاندىرۋ جىلىن ەسكەرە وتىرىپ, جەردى قاشىقتىقتان زوندتاۋ, دروندار مەن جي ەلەمەنتتەرى سىندى تسيفرلىق شەشىمدەردى بەلسەندى ەنگىزۋ تاپسىرىلدى. بيىلعى ءساۋىر ايىنىڭ سوڭىنا دەيىن قىزىلوردا جانە تۇركىستان وبلىستارىنداعى ارال تەڭىزىنىڭ قۇرعاتىلعان ءتۇبىنىڭ 165 مىڭ الاڭىندا مەليوراتسيالىق ورمان جۇمىستارىن اياقتاۋ مىندەتى قويىلدى.
ورمان تالىمباقتارى جەلىسىن دامىتۋعا ەرەكشە نازار اۋدارىلىپ كەلەدى. پرەمەر-مينيستر الماتى, قوستاناي, پاۆلودار, شىعىس قازاقستان جانە اباي وبلىستارىندا ورمان تالىمباقتارى قۇرىلىسىن جەدەلدەتۋدى جانە الداعى ۋاقىتتا وڭىرلەردە ساپالى كوشەت قورىنىڭ بولۋى ءۇشىن جابىق ءوسىرۋ جۇيەسى بار كوشەتتەردى ءوسىرۋدىڭ ورنىقتى جۇيەسىن قۇرۋدى قامتاماسىز ەتۋدى تاپسىردى.
سونىمەن قاتار قالدىقتاردى كادەگە جاراتۋ ماسەلەسى دە ءسوز بولدى. بۇگىندە 185 ملرد تەڭگەگە جەڭىلدەتىلگەن قارجىلاندىرۋ قاراستىرىلعان بولسا, سونىڭ ىشىندە 90 ملرد تەڭگەدەن استام سوماعا 26 جوبا جۇزەگە اسىرىلىپ جاتىر. اكىمدىكتەرگە جوسپارلانعان ءىس-شارالاردىڭ ۋاقتىلى ورىندالۋىن قامتاماسىز ەتۋ, سونداي-اق جەر قويناۋىن پايدالانۋشىلارمەن بىرلەسىپ, كارەرلەر اۋماقتارىنىڭ 40%-دان استامىن, ونىڭ ىشىندە سانيتارلىق قورعاۋ ايماقتارىنىڭ شەكارالارىندا كوگالداندىرۋ جۇمىستارىن جۇرگىزۋ تاپسىرىلدى.
23 ناۋرىزدا ء«مولدىر بۇلاق» رەسپۋبليكالىق اكتسياسى باستالادى. ونىڭ شەڭبەرىندە بۇلاقتار مەن جاعالاۋ اۋماقتارىن تازارتۋ, سونداي-اق 700-دەن استام الەۋەتتى سۋ نىساندارىن تۇگەندەۋ جوسپارلانىپ وتىر.
«تازا قازاقستان» باستاماسىن ودان ءارى جۇزەگە اسىرۋ وسى جىلعا ارنالعان ەكولوگيالىق اكتسيالاردىڭ جاڭا تسيكلىنىڭ كەستەسىنە سايكەس جۇرگىزىلەدى.
جيىندا وڭىرلىك ەكولوگيالىق سامميتكە دايىندىق بارىسى دا پىسىقتالدى. ءىس-شارا ەكولوگيا سالاسىنداعى حالىقارالىق ىنتىماقتاستىقتى دامىتۋ ءۇشىن ماڭىزدى الاڭعا اينالاتىنى اتاپ ءوتىلدى.