2026 جىلعى 10 مامىردا باستالعان نەگىزگى ۇبت اياسىندا تالاپكەرلەر تەستىلەۋدى 236 مىڭعا جۋىق رەت تاپسىردى. ۇلتتىق تەستىلەۋ ورتالىعىنىڭ مالىمەتىنشە, قاتىسۋشىلاردىڭ 72 پايىزى ەمتيحاندى – قازاق تىلىندە, 28 پايىزى – ورىس تىلىندە, 408 تالاپكەر – اعىلشىن ءتىلىن تاڭداعان, دەپ حابارلايدى Egemen.kz.
تەستىلەۋدىڭ بەس اپتالىق قورىتىندىسى بويىنشا تالاپكەرلەردىڭ 67 پايىزى شەكتى بالل جينادى. بەس ءپان بويىنشا ورتاشا ناتيجە – 64 بالدى قۇرادى. ەڭ جوعارى كورسەتكىشكە پاۆلودار وبلىسىنىڭ تۇلەگى اسەت التاير قول جەتكىزىپ, 140 بالل جينادى.
ەرەكشە ءبىلىم بەرۋ قاجەتتىلىكتەرى بار تالاپكەرلەرگە دە قاجەتتى جاعدايلار جاسالعان. بيىل ۇبت-عا وسىنداي ساناتتاعى 668 تالاپكەر قاتىستى.
تالاپكەرلەر تەست اياقتالعاننان كەيىن 30 مينۋت ىشىندە تاپسىرمالاردىڭ مازمۇنىنا قاتىستى اپەللياتسيا بەرە الادى. ال تەحنيكالىق ماسەلەلەر بويىنشا وتىنىشتەر تەستىلەۋ بارىسىندا قابىلدانادى. سەرتيفيكاتتار اپەللياتسيا ءراسىمى اياقتالعان سوڭ جەكە كابينەتتەردە جاريالانادى.
ۇبت-دا قۇقىقتارى بۇزىلعان تالاپكەرلەر قايدا جۇگىنە الادى؟
بەس اپتا ىشىندە ۇبت وتكىزۋ بارىسىندا 474 ەرەجە بۇزۋشىلىق تىركەلدى. ونىڭ ىشىندە 298 تالاپكەر سمارتفون, سمارت-كوزىلدىرىك, ميكروقۇلاققاپ, شپارگالكا جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋگە جىبەرىلمەدى.
سونداي-اق 176 ادام تەست تاپسىرۋ كەزىندە ەرەجەلەردى بۇزعانى ءۇشىن اۋديتوريادان شىعارىلىپ, ولاردىڭ ناتيجەلەرى جارامسىز دەپ تانىلدى. باسقا ادامنىڭ ورنىنا كىرۋ فاكتىلەرى انىقتالماعان.
ۇلتتىق تەستىلەۋ ورتالىعىنىڭ حابارلاۋىنشا, ۇبت اياقتالعاننان كەيىن 31 قازانعا دەيىن بەينەجازبالارعا قوسىمشا تالداۋ جۇرگىزىلەدى. ەگەر تىيىم سالىنعان زاتتاردى پايدالانۋ نەمەسە باسقا دا زاڭبۇزۋشىلىقتار انىقتالسا, تالاپكەرلەردىڭ ناتيجەلەرى كۇشىن جويادى.
ۇبت كەزىندە جارىق ءوشىپ قالسا, تۇلەكتەردىڭ ناتيجەسى قالاي باعالانادى؟ مينيستر جاۋاپ بەردى
ايتا كەتەيىك, بيىل تەستىلەۋگە قاتىسۋ ءۇشىن 240 مىڭعا جۋىق تالاپكەر ەكى مۇمكىندىكتى ەسەپكە العاندا 446 مىڭنان استام ءوتىنىش بەرگەن.