كەيىنگى جىلدارى ەلىمىزدە جاساندى ينتەللەكت پەن تسيفرلاندىرۋ باعىتىندا بىرقاتار ماڭىزدى جوبا جۇزەگە اسىپ جاتىر.
سونىڭ ءبىرى – نازارباەۆ ۋنيۆەرسيتەتى اقىلدى جۇيەلەر مەن جاساندى ينتەللەكت ينستيتۋتى (ISSAI) ازىرلەگەن – «Oylan» مودەلى. اتالعان ينستيتۋتتىڭ سىرتقى بايلانىستار جونىندەگى اعا مەنەدجەرى ايگەرىم سارسەنوۆانىڭ ايتۋىنشا, بۇل – ءماتىن, اۋديو جانە بەينەدەرەكتەرىن ءتۇسىنىپ, ولاردى بىرگە تالداي الاتىن كوپمودالدى گەنەراتيۆتى جاساندى ينتەللەكت مودەلى.
– «Oylan» كۇردەلى تاپسىرمالاردى ورىنداۋ بارىسىندا ۆەب-ىزدەۋ جۇرگىزە الادى جانە كوپقادامدى ويلاۋ ارقىلى شەشىم ۇسىنادى. مودەل امبەباپ پلاتفورما رەتىندە جاسالعان جانە ونى ەكونوميكاداعى ءتۇرلى سالالارعا بەيىمدەپ, ناقتى سالالىق مىندەتتەردى شەشۋ ءۇشىن قولدانۋعا بولادى. مىسالى, ءبىلىم, اناليتيكا, مەديا كونتەنت جاساۋ, مەملەكەتتىك قىزمەتتەر جانە بيزنەس ۇدەرىستەرىن اۆتوماتتاندىرۋ سياقتى باعىتتاردا پايدالانۋعا مۇمكىندىك بار, – دەيدى ول.
وسى سالاداعى تاعى ءبىر ماڭىزدى جوبا – «TilSync». بۇل جۇيە قازاق, ورىس, اعىلشىن تىلدەرىندە ناقتى ۋاقىت رەجىمىندە جوعارى ساپالى سۋبتيتر جاساۋعا مۇمكىندىك بەرەتىن جي قىزمەتى. مۇنداي تەحنولوگيالار ونلاين ءىس-شارالار, كونفەرەنتسيالار, ءبىلىم پلاتفورمالارى, مەديا جانە ترانسلياتسيا سالاسىندا كەڭىنەن قولدانىلىپ وتىر. «TilSync» تىلدىك كەدەرگىنى ازايتىپ, كوپتىلدى اۋديتوريامەن ءتيىمدى جۇمىس ىستەۋگە كومەكتەسەدى.
– ەلىمىزدىڭ جاساندى ينتەللەكت ەكوجۇيەسىندە «MangiSoz» پلاتفورماسى دا ەرەكشە ورىن الادى. بۇل جۇيە ءماتىن مەن سويلەۋدى گەنەراتسيالاۋ, اۋدارۋ جانە تانۋ قىزمەتتەرىن اتقارادى. سونىمەن قاتار ول قولجازبا ءماتىندى جانە قۇجات سكاندارىن تانۋ (OCR), اۋديو جانە بەينەماتەريالدارداعى سويلەۋشىلەردى اجىراتۋ (دياريزاتسيا), سونداي-اق ەكسپرەسسيۆتى سينتەزدەلگەن داۋىس جاساۋ مۇمكىندىگىنە يە. پلاتفورما قازاق, ورىس, اعىلشىن, تۇرىك, قىتاي, اراب, ازەربايجان, يسپان, فرانتسۋز, قىرعىز, وزبەك تىلدەرىن قولدايدى. قازىر بۇل تەحنولوگيا مەملەكەتتىك ورگانداردا, ءبىلىم مەكەمەلەرىندە, كورپوراتيۆتىك سەكتوردا قولدانىلىپ كەلەدى. سونىمەن بىرگە «Beynele» اتتى جاساندى ينتەللەكتىگە نەگىزدەلگەن سۋرەت گەنەراتورى ازىرلەنگەن. بۇل جۇيە ەلىمىزدىڭ الەۋمەتتىك-مادەني ەرەكشەلىكتەرىن ءدال بەينەلەيتىن ۆيزۋالدار جاساۋعا مۇمكىندىك بەرەدى. ياعني جاساندى ينتەللەكت ارقىلى جاسالعان بەينەلەردە جەرگىلىكتى مادەنيەت, ءداستۇر, كيىم ۇلگىلەرى جانە ۇلتتىق ەرەكشەلىكتەر ەسكەرىلەدى. سوندىقتان «Beynele» باسپا ىسىندە, ماركەتينگتە, ءبىلىم جوبالارىندا جانە كرەاتيۆتى يندۋستريادا ۇلتتىق كونتەنتتى دامىتۋعا كومەكتەسەدى», دەيدى ءا.سارسەنوۆا.
ونىڭ پىكىرىنشە, ينفراقۇرىلىمدىق دەڭگەيدە جاساندى ينتەللەكت نەمەسە ماشينالىق وقىتۋدا مودەلدىڭ قورىتىندى شىعارۋ جۇيەسى دە جاسالعان. ول كوممەرتسيالىق قولجەتىمدى كومپونەنتتەر نەگىزىندە قۇراستىرىلىپ, ينستيتۋت ازىرلەگەن جي مودەلدەرىن ىسكە قوسۋعا ارنالعان. بۇل سەرۆەر ۇيىمنىڭ جابىق جەرگىلىكتى جەلىسىندە جۇمىس ىستەي الادى, سوندىقتان دەرەكتەردىڭ قاۋىپسىزدىگى جوعارى دەڭگەيدە ساقتالادى. مۇنداي شەشىمدەر مەملەكەتتىك ورگاندار مەن كورپوراتيۆتىك سەكتورعا وتە ماڭىزدى, سەبەبى ولار قۇپيا نەمەسە سەزىمتال دەرەكتەرمەن جۇمىس ىستەيدى.
مۇندا ايتا كەتەتىن ءبىر جايت, اتالعان جوبالاردىڭ بارلىعى نازارباەۆ ۋنيۆەرسيتەتى جانىنداعى اقىلدى جۇيەلەر مەن جاساندى ينتەللەكت ينستيتۋتىندا (Institute of Smart Systems and Artificial Intelligence – ISSAI) ازىرلەنگەن. ينستيتۋت ەلىمىزدە جاساندى ينتەللەكت تەحنولوگيالارىن دامىتۋعا, قازاق تىلىندەگى جي قۇرالدارىن جەتىلدىرۋگە, ولاردى عىلىم, بيزنەس پەن مەملەكەتتىك سەكتوردا كەڭىنەن ەنگىزۋگە باعىتتالعان زەرتتەۋلەر جۇرگىزىپ كەلەدى. سونىمەن بىرگە جەكە سەكتوردا دا تابىستى تسيفرلىق جانە جي جوبالارمەن اينالىسىپ وتىر. مىسالى, «Cerebra» – ءينسۋلتتى ەرتە انىقتاۋعا ارنالعان مەديتسينالىق جاساندى ينتەللەكت جۇيەسى, ول الەمنىڭ بىرنەشە ەلىندە قولدانىلادى. «Higgsfield AI» گەنەراتيۆتى ۆيزۋالدى جانە بەينە-كونتەنت تەحنولوگيالارىن دامىتۋ باعىتىندا جۇمىس ىستەيدى. ال «Shai Pro» سياقتى كومپانيالار بيزنەس-ۇدەرىستەردى اۆتوماتتاندىرۋعا, كومپانيالاردىڭ تيىمدىلىگىن ارتتىرۋعا ارنالعان جي قۇرالدارىن ۇسىنادى.