بەدەلدى امەريكالىق Bloomberg باسىلىمى قازاقستان تۋرالى كولەمدى ساراپتامالىق ماقالا جاريالاپ, ەلدى جاھاندىق وزگەرىستەرگە ءساتتى بەيىمدەلگەن مەملەكەتتەردىڭ ءبىرى رەتىندە اتادى, دەپ حابارلايدى Egemen.kz
ماقالا اۆتورلارىنىڭ ايتۋىنشا, سوڭعى جىلدارى قازاقستان حالىقارالىق تۇراقسىزدىق جاعدايىندا تەك تۇراقتىلىعىن ساقتاپ قانا قويماي, ەۋرازياداعى ماڭىزدى ەكونوميكالىق, لوگيستيكالىق جانە تەحنولوگيالىق ورتالىق رەتىندەگى پوزيتسياسىن كۇشەيتە الدى.
Bloomberg بۇل وزگەرىستەردىڭ سيمۆولى رەتىندە استانانى اتايدى. باسىلىم قازىرگى استانا وسىدان شيرەك عاسىر بۇرىن دالا توسىندەگى شاعىن قالا بولعانىن, ال بۇگىندە بىرەگەي ساۋلەتى مەن اۋقىمدى ينفراقۇرىلىمدىق جوبالارى بار زاماناۋي مەگاپوليسكە اينالعانىن ەسكە سالادى.
«استانا ەڭ الدىمەن ءوزىنىڭ نەنى بىلدىرەتىنىمەن قىزىقتى», دەلىنگەن Bloomberg جاريالانىمىندا.
الايدا اۆتورلار نەگىزگى نازاردى ەلدىڭ سىرتقى كەلبەتىنە ەمەس, ونىڭ جاڭا گەوەكونوميكالىق شىندىقتاعى رولىنە اۋدارادى.
Bloomberg باعالاۋىنشا, قازاقستان الەمدەگى ەڭ ءىرى نارىقتاردى بايلانىستىراتىن ماڭىزدى بۋىن رەتىندە بارعان سايىن سەنىمدى ارەكەت ەتۋدە. ماقالادا ترانسكاسپي حالىقارالىق كولىك باعىتىنا, ياعني ورتا دالىزگە ەرەكشە ورىن بەرىلگەن. بۇل باعىت قىتاي مەن ەۋروپا اراسىنداعى جۇك تاسىمالىنىڭ نەگىزگى ارنالارىنىڭ بىرىنە اينالىپ كەلەدى.
باسىلىم جاھاندىق لوگيستيكاداعى وزگەرىستەر اياسىندا قازاقستان ءوزىنىڭ گەوگرافيالىق ورنالاسۋىن ستراتەگيالىق ارتىقشىلىققا اينالدىرىپ, ەۋرازياداعى ترانزيتتىك حاب رەتىندەگى ءرولىن ايتارلىقتاي كۇشەيتكەنىن اتاپ وتەدى.
«ەل قىتاي, رەسەي جانە ەۋروپا اراسىنداعى ورنالاسۋىن ەكونوميكالىق ارتىقشىلىق رەتىندە پايدالانىپ وتىر», دەپ جازادى Bloomberg.
سونىمەن قاتار, ەلدىڭ جاھاندىق سىن-قاتەرلەردى ءوز دامۋىنا ءتيىمدى پايدالانا ءبىلۋ قابىلەتى ەرەكشە اتاپ وتىلەدى. اۆتورلاردىڭ پىكىرىنشە, قازاقستان حالىقارالىق نارىقتارداعى وزگەرىستەرگە, ەنەرگەتيكالىق داعدارىستارعا جانە لوگيستيكالىق تىزبەكتەردىڭ قايتا قۇرىلۋىنا بەيىمدەلىپ, ساۋدا مەن ينۆەستيتسيا تارتۋ ءۇشىن جاڭا مۇمكىندىكتەر اشا الدى.
Bloomberg ەلدىڭ تسيفرلىق ترانسفورماتسياسىنا دا ۇلكەن نازار اۋدارادى. جاريالانىمدا قازاقستان ايماقتاعى تسيفرلاندىرۋ كوشباسشىلارىنىڭ ءبىرى رەتىندە اتالادى. اۆتورلار ەلەكتروندى ۇكىمەتتىڭ جوعارى دەڭگەيدە دامىعانىن جانە مەملەكەتتىك باسقارۋعا تسيفرلىق سەرۆيستەردىڭ بەلسەندى ەنگىزىلىپ جاتقانىن اتاپ وتەدى.
باسىلىمنىڭ ەرەكشە قىزىعۋشىلىعىن قازاقستاننىڭ جاساندى ينتەللەكت سالاسىنداعى جوسپارلارى تۋدىرعان. ماقالادا جي-ءنى دامىتۋ مەملەكەتتىك باسىمدىقتاردىڭ بىرىنە اينالعانى جانە ەلدىڭ جاڭا تەحنولوگيالىق داۋىرگە ماماندار دايارلاۋعا باسىمدىق بەرىپ وتىرعانى ايتىلعان.
«قازاقستان جاساندى ينتەللەكت پەن تسيفرلىق يننوۆاتسيالار بويىنشا وڭىرلىك ورتالىققا اينالۋعا ۇمتىلۋدا», دەپ جازادى ماتەريال اۆتورلارى.
حالىقارالىق ينۆەستورلاردىڭ نازارىن اۋداراتىن فاكتورلاردىڭ قاتارىندا Bloomberg Astana Hub قىزمەتىن, داتا-ورتالىقتاردىڭ دامۋىن, ستراتەگيالىق ماڭىزدى مينەرالدار سالاسىنداعى جوبالاردى جانە «استانا» حالىقارالىق قارجى ورتالىعىنىڭ جۇمىسىن اتايدى.
باسىلىم سونداي-اق ەلدىڭ دەموگرافيالىق الەۋەتىنە نازار اۋدارادى. قازاقستان حالقىنىڭ شامامەن جارتىسى 30 جاسقا تولماعان. اۆتورلاردىڭ پىكىرىنشە, بۇل يننوۆاتسيالىق ەكونوميكا مەن تەحنولوگيالىق كاسىپكەرلىكتى ودان ءارى دامىتۋعا نەگىز قالايدى.
جالپى العاندا, Bloomberg قازاقستاندى شيكىزاتتىق ەكونوميكا تۋرالى ءداستۇرلى تۇسىنىكتەن شىعىپ, تەحنولوگيالارعا, لوگيستيكاعا, ادامي كاپيتالعا جانە حالىقارالىق ىنتىماقتاستىققا باسىمدىق بەرىپ وتىرعان مەملەكەت رەتىندە سيپاتتايدى.
جاريالانىمنىڭ نەگىزگى قورىتىندىسى – قازاقستاندى الەمدىك بيزنەس قاۋىمداستىعى ەندى شەتكەرى نارىق ەمەس, دەربەس ەكونوميكالىق ءوسۋ ورتالىعى ءارى ەۋرازيانىڭ جاڭا ارحيتەكتۋراسىن قالىپتاستىراتىن ماڭىزدى قاتىسۋشىلاردىڭ ءبىرى رەتىندە ءجيى قاراستىرا باستادى.