پرەزيدەنت قاسىم-جومارت توقاەۆ جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى وتىرىسىندا اۋىل شارۋاشىلىعىن تسيفرلاندىرۋ تاجىريبەسىن كەڭىنەن ەنگىزۋ قاجەتتىگىن ايتتى, دەپ حابارلايدى Egemen.kz.
مەملەكەت باسشىسى جاھاندىق تەحنولوگيالىق وزگەرىستەر جاعدايىندا ەاەو ەلدەرى جاڭا تابىس كوزدەرىن ىزدەپ, جاساندى ينتەللەكت, روبوت تەحنيكاسى جانە بيوتەحنولوگيا سەكىلدى پەرسپەكتيۆتى باعىتتاردا بىرلەسكەن جوبالاردى دامىتۋى قاجەت ەكەنىن اتاپ ءوتتى.
– جاھاندىق ازىق-ت ۇلىك نارىعىنداعى ەاەو پوزيتسياسىن نىعايتاتىن جوعارى تەحنولوگيالىق باستامالاردى قولداۋعا كۇش سالۋعا بولادى. ەۋرازيالىق ەكونوميكالىق وداق تۋرالى شارتقا اگروونەركاسىپ كەشەنىندەگى كووپەراتسيالىق جوبالاردى قارجىلاي قولداۋ بويىنشا تۇزەتۋلەر ەنگىزىلىپ, قابىلداندى. بۇل – وسى جولداعى ماڭىزدى قادامنىڭ ءبىرى. مۇنداي تەحنولوگيالىق باستامالاردى قارجىلاندىرۋ كولەمىن ۇلعايتۋ ءۇشىن ەۋرازيا دامۋ بانكىنىڭ مۇمكىندىكتەرىن پايدالانعان ءجون. قۇرىلعاننان بەرگى جيىرما جىل ىشىندە اتالعان قارجى ينستيتۋتى ەۋرازيالىق ينتەگراتسيانىڭ ءتيىمدى ءارى سۇرانىسقا يە قۇرالى ەكەنىن دالەلدەدى. ءبىز شاعىن قۇرامداعى كەزدەسۋدە بانكتىڭ باسقارما توراعاسى جاساعان مازمۇندى باياندامانى تىڭداپ, ونى بەكىتتىك. ەادب الداعى ۋاقىتتا دا وداق كەڭىستىگىندەگى ستراتەگيالىق جوبالاردى جۇزەگە اسىرۋدا باستى لوكوموتيۆ بولۋعا ءتيىس دەگەن ۇيعارىمعا كەلدىك, – دەدى پرەزيدەنت.
مەملەكەت باسشىسى: ەلىمىزدە 650-دەن استام «اقىلدى» فەرمالار جۇمىس ىستەپ تۇر
قاسىم-جومارت توقاەۆ الەم ەكونوميكاسى ترانسفورماتسيالانىپ جاتقان كەزەڭدە جاڭا تابىس كوزدەرىن ىزدەۋ تاعى ءبىر باسىمدىق ەكەنىن اتاپ ءوتتى.
– ۇلتتىق ەكونوميكالاردىڭ ۇزاقمەرزىمدى ورنىقتىلىعى مەن بولاشاقتاعى ورنىن سايلاۋى جاڭا تەحنولوگيالىق سىن-قاتەرلەرگە جەدەل بەيىمدەلۋىنە تىكەلەي بايلانىستى. بۇل جونىندە ءبىز كەشە, ەۋرازيالىق ەكونوميكالىق فورۋمنىڭ العاشقى كۇنىندە ەگجەي-تەگجەيلى تالقىلادىق. جاپپاي تسيفرلاندىرۋدان باستاپ جاساندى ينتەللەكتىگە دەيىنگى تەحنولوگيالىق پروگرەسس تولقىنى بىرىنەن سوڭ ءبىرى تۋىنداپ جاتىر. وسىلايشا, تەحنولوگياداعى ءاربىر جاڭا بەلەس وزىق ويلى ادامدارعا مۇمكىندىك سىيلايتىن كەلەسى سونى سەرپىلىسكە نەگىز قالايدى. ساراپشىلاردىڭ پىكىرىنشە, الداعى 20 جىلدىڭ ىشىندە بيوتەحنولوگيا, اۆتونومدى جۇيەلەر, عارىش ەكونوميكاسى, ەنەرگيانى ساقتاۋ, كۆانتتىق ەسەپتەۋ سەكىلدى ماڭىزدى تەحنولوگيالىق ۇدەرىستەردىڭ تۇتاس لەگى پايدا بولادى. ماسەلەن, ۇزاقمەرزىمدى بولجام بويىنشا 2035 جىلعا قاراي الەمدىك روبوت تەحنيكاسى نارىعىنىڭ كولەمى 376 ميلليارد دوللاردان اسادى. ۆيرتۋالدى شىنايىلىق يندۋسترياسىنداعى قارجى اينالىمى 700 ميلليارد دوللارعا جۋىقتايدى. ارينە, ءبىزدىڭ ەلدەرىمىز وسى جاھاندىق جاڭاشىلدىقتاردان كەنجە قالماۋعا ءتيىس. ەۋرازيالىق ەكونوميكالىق كوميسسيا پەرسپەكتيۆتى دامۋ باعىتتارىندا ناقتى تاجىريبە الماسۋعا جانە بىرلەسكەن جوبالاردى جۇزەگە اسىرۋعا قولداۋ كورسەتۋى كەرەك دەپ سانايمىن, – دەدى مەملەكەت باسشىسى.