پاۆلودار قالاسىندا ساۋدا ورتالىعىنا بارعان زەينەتكەر تەلەفون الاياقتارىنىڭ ارباۋىنا ءتۇسىپ, ءوز جيناعىنان ايىرىلىپ قالا جازدادى. قاسكويلەردىڭ پسيحولوگيالىق قىسىمىنا سەنگەن ول 4 ملن تەڭگەسىن الاياقتاردىڭ شوتىنا اۋدارماق بولعان, دەپ حابارلايدى Egemen.kz
الاياقتار العاشقى قوڭىراۋ كەزىندە وزدەرىن مەديتسينالىق مەكەمە قىزمەتكەرلەرى رەتىندە تانىستىرىپ, تەكسەرۋدەن ءوتۋ سىلتاۋىمەن SMS-كودتى اتاۋىن سۇراعان. قاۋىپتى سەزبەگەن زەينەتكەر قاجەتتى مالىمەتتەردى ايتىپ قويعان. كەيىننەن ولار «قاۋىپسىزدىك قىزمەتى» رەتىندە قايتا حابارلاسىپ, ونىڭ بانك شوتتارىنا قاۋىپ ءتونىپ تۇرعانىن العا تارتىپ, بارلىق قاراجاتىن دەرەۋ باسقا شوتقا اۋدارۋعا كوندىرگەن.
جەتىسۋدا مىڭنان استام الاياقتىق سايت بۇعاتتالدى
قاتتى الاڭداعان زەينەتكەر ەسەپشوتىنان 4 ملن تەڭگە شەشىپ الىپ, Batyr Mall ساۋدا ورتالىعىنا بارعان. الاياقتار ونىمەن تەلەفون ارقىلى بايلانىسىن ۇزبەي, ءار قادامىن باقىلاپ وتىرعان.
الايدا قىلمىس ءىىم oقۋ ورتالىعىنىڭ قىزمەتكەرى سالتانات كاريموۆانىڭ قىراعىلىعىنىڭ ارقاسىندا كەسىلدى. ەگدە جاستاعى ازاماتتىڭ مىنەز-قۇلقىنداعى كۇماندى ارەكەتتەردى بايقاعان ول دەرەۋ پوليتسيا شاقىرىپ, زەينەتكەردى اقشانى اۋدارۋدان ساقتاپ قالۋعا تىرىسقان.
«وسىنداي ساتتەردە بەيجاي قالماي, كۇماندى جاعدايدى بايقاساڭ, دەرەۋ ارەكەت ەتۋ وتە ماڭىزدى. سول ساتتە مەن تەك ادامنىڭ قاۋىپسىزدىگىن قامتاماسىز ەتۋدى ءجون سانادىم», دەيدى سالتانات كاريموۆا.
پوليتسەيلەردىڭ جەدەل ارەكەتى مەن قىزمەتكەردىڭ قىراعىلىعىنىڭ ارقاسىندا زەينەتكەر ءوز قاراجاتىن ساقتاپ قالدى, ال الاياقتار قىلمىستىق نيەتىن جۇزەگە اسىرا المادى.
قاراعاندىدا زەينەتكەرلەردى الداعان الاياق ۇستالدى
ءىىم ازاماتتاردى تاعى دا ەسكەرتەدى: بانك, قۇقىق قورعاۋ ورگاندارى, مەديتسينالىق مەكەمەلەر جانە وزگە دە رەسمي قۇرىلىمدار تەلەفون ارقىلى اقشا اۋدارۋدى, SMS-كودتاردى ايتۋدى نەمەسە جەكە دەرەكتەردى بەرۋدى تالاپ ەتپەيدى.
الاياقتاردىڭ ءبىر عانا قوڭىراۋى ادامنىڭ ءومىر بويعى جيناعىن جوعالتۋىنا سەبەپ بولۋى مۇمكىن. سوندىقتان كۇماندى قوڭىراۋلارعا سەنبەي, ارقاشان رەسمي ارنالار ارقىلى تەكسەرۋ قاجەت.