قاسىم-جومارت توقاەۆ ەۋرازيالىق ەكونوميكالىق وداققا مۇشە ەلدەردەگى ءوندىرىس وشاقتارى مەن اگروونەركاسىپ كەشەنىن تسيفرلىق ترانسفورماتسيالاۋدىڭ ماڭىزىنا نازار اۋداردى, دەپ جازادى Egemen.kz.
پرەزيدەنتتىڭ پايىمىنشا, ەكونوميكانى تسيفرلاندىرۋ – تەحنولوگيالىق ترەند قانا ەمەس, باسەكەگە قابىلەتتى بولۋدىڭ باستى كەپىلى.
«قازاقستان بۇل سىناققا اۋقىمدى تسيفرلىق ترانسفورماتسيا تۇجىرىمداسىن قابىلداۋ ارقىلى جۇيەلى ارەكەتتەرمەن جاۋاپ بەرمەك. ونەركاسىپ سەكتورى مەن تاۋ-كەن جانە مەتاللۋرگيا كەشەنىندەگى روبوتتاندىرۋ, «بۇلتتىق» شەشىمدەر, ءىرى كاسىپورىنداردىڭ «تسيفرلىق تەلنۇسقاسى» ونىمدىلىكتى ۇلعايتىپ, شىعىندى ازايتادى. اۋىل شارۋاشىلىعىن اۆتوماتتاندىرۋ مول ءونىم جيناۋعا, سۋ ۇنەمدەۋگە, قورشاعان ورتاعا زياندى ازايتۋعا سەپتىگىن تيگىزەدى. مال شارۋاشىلىعىنا قاعاز جۇزىندەگى قۇجات اينالىمىنان باس تارتىپ, ەسەپتىڭ دالدىگىن ارتتىراتىن بىرقاتار تسيفرلىق جۇيە ەنگىزىلدى. ەلىمىزدىڭ تۇكپىر-تۇكپىرىندە 650-دەن استام «اقىلدى» فەرمالار جۇمىس ىستەپ تۇر. وندا سيىر ساۋ, بورداقىلاۋ جانە ميكروكليماتتى قاداعالاۋ ۇردىستەرى اۆتوماتتاندىرىلعان جۇيەلەرمەن جابدىقتالعان. ەگىن جانە تۇقىم شارۋاشىلىعىندا ءونىمدى «ەگىس دالاسىنان تۇتىنۋشى داستارقانىنا دەيىن» جەتكىزۋ تىزبەگىن قاداعالايتىن جۇيە ەنگىزىلىپ جاتىر. تىڭعىلىقتى جوسپارلاۋ مەن تسيفرلىق بولجاۋ مۇمكىندىكتەرىن پايدالانۋ ناتيجەسىندە قازاقستاندا ەكىنشى جىل قاتارىنان ەگىن بىتىك شىعىپ, 27 ميلليون توننا كولەمىندە استىق جينالدى. بۇل – رەكوردتىق كورسەتكىش. اۋىل شارۋاشىلىعى جەرلەرىن جاپپاي تسيفرلاندىرۋ جۇمىسى جۇرگىزىلۋدە. اگرودروندار, جەرسەرىكتىك ناۆيگاتسيالار مەن مەتەوستانتسيا مالىمەتتەرى كەڭىنەن قولدانىلا باستادى. جەر تەلىمىن پايدالانۋعا بەرۋ ۇدەرىسى ەلەكتروندى فورماتقا كوشىرىلدى. ديحاندار مەن شارۋالاردى مەملەكەت تاراپىنان قولداۋ تەتىكتەرى تولىقتاي ەلەكتروندىق فورماتقا اۋىستى. بۇل جەمقورلىق تاۋەكەلدەرىن ازايتادى», دەدى قاسىم-جومارت توقاەۆ. ايتا كەتەيىك, مەملەكەت باسشىسى جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى كەزەكتى وتىرىسىندا ينتەگراتسيالىق قۇرىلىمدى ودان ءارى قارقىندى دامىتۋدى كوزدەيتىن بىرقاتار ستراتەگيالىق باسىمدىقتى اتادى.