سىر ءوڭىرىنىڭ بالالارى الماتى چەمپيوناتىندا توپ جاردى

سپورتتىڭ كيوكۋشين بۋدوكاي كاراتە دەپ اتالاتىن ءتۇرى ءبىزدىڭ ەلىمىزدە دە جاقسى دامىپ كەلەدى. بۇل – تولىق كونتاكتتى جەكپە-جەككە نەگىزدەلگەن كاراتە ءستيلى. ول قاتال جاتتىعۋلارمەن, كۇشتى سوققىلارمەن جانە شىنايى جەكپە-جەك تەحنيكاسىمەن تانىمال.

قازاقستاندا كيوكۋشين بۋدوكاي كاراتەنى دامىتاتىن نەگىزگى ۇيىم – Kazakhstan Fullcontact Karate Organization (KFKO). 2013 جىلى قۇرىلعان. حالىقارالىق WKB ۇيىمىنىڭ رەسمي وكىلى. قازىرگى كۇنى 16 وڭىردە بولىمشەلەرى, 90-نان استام كلۋبى جۇمىس ىستەيدى. ولاردا تاربيەلەنىپ جاتقان سپورتشىلار جىل سايىن وڭىرلىك جارىستارعا, رەسپۋبليكالىق چەمپيوناتتارعا جانە حالىقارالىق تۋرنيرلەرگە قاتىسىپ وتىرادى. مىسالى, بيىل استانادا وتكەن Astana Open تۋرنيرىنە 600-گە جۋىق سپورتشى ەلىمىزدىڭ 15 وڭىرىنەن قاتىسقان. بۇل جارىستار جاستار اراسىندا سپورتتى دامىتۋعا جانە ەلدىك دەڭگەيدەگى, حالىقارالىق چەمپيوناتتارعا دايىندىققا مۇمكىندىك بەرەدى. كيوكۋشين بۋدوكاي كاراتەمەن 4 جاستاعى بالدىرعاننان باستاپ, 18-دەن جوعارعى جاستار مەن ەرەسەكتەر دە اينالىسا الادى. جۋىردا KFKO-نىڭ ۇيىمداستىرۋىمەن الماتى قالاسىندا «كۋميتە» ءتارتىبى بويىنشا بالالار, جاسوسپىرىمدەر جانە قىزدار اراسىندا SENTOKI CUP – 2026 چەمپيوناتى ءوتتى. وعان 200-گە جۋىق بالا قاتىستى. سولاردىڭ ىشىندە قىزىلوردا وبلىسىنا قاراستى ارال اۋدانىنىڭ بوگەن اۋىلىنان كەلگەن بەس بالا دا جۇلدە الدى. اتاپ ايتساق, 50+ سالماق دارەجەسىندە ماديار شاكي ءىى ورىنعا شىقتى. ال قىزدار اراسىنداعى 40+ سالماق دارەجەسىندە

گۇلبارشىن ارالباي – ءى ورىن (كۋبوك), كوركەم جاڭابەرگەن – ءىى ورىن, زارينا ساتەنوۆا ءىىى ورىن يەلەندى. -30 سالماق دارەجەسى بويىنشا سىنعا تۇسكەن رايانا اماندىققىزى دا نامىستى قولدان بەرمەي, كەۋدەسىنە ءىىى ورىننىڭ مەدالىن تاقتى.

«وسى الماتى چەمپيونتىنىڭ الدىندا عانا قىزىلوردا وبلىسى, ارال اۋدانىنداعى №بوگەن ورتا مەكتەبىندە اشىلعان «كيوكۋشين بۋدوكاي كاراتە» ۇيىرمەسىنىڭ جۇمىسىمەن تانىسىپ قايتقان بولاتىنمىن. ۇيىرمەنىڭ اشىلعانىنا كوپ بولا قايماسا دا, بالالاردىڭ جاتتىعۋ كەزىندەگى قابىلەت-قارىمىن, تالپىنىسىن بايقاپ, الداعى ۋاقىتتى جەڭىس تۇعىرىنان كورىنەتىندىكتەرىنە سەنگەن بولاتىنمىن. ەندى, مىنە, سەنىم اقتالدى. ءبىزدىڭ ماقسات – سىر وڭىرىندەگى سپورتتى سۇيەتىن بالالاردىڭ باسىن بىرىكتىرۋ, جاتتىقتىرۋ, ۇلكەن جارىستارعا دايىنداۋ, سپورتتى, سالاۋاتتى ءومىر سالتىن ناسيحاتتاۋ», دەيدى «Kazakhstan Fullcontact Karate Organization (KFKO)» رەسپۋبليكالىق قوعامدىق بىرلەستىگى قىزىلوردا وبلىستىق فەدەراتسياسىنىڭ جەتەكشىسى شاحماردان فايزۋللاەۆ.

دزيۋدودان گرۋزياداعى Grand Slam ءتۋرنيرى: تالعات ورىنباسار قولا جۇلدەگەر اتاندى

شالعايداعى اۋىل بالالارىن سپورتقا باۋلىپ جۇرگەن جاتتىقتىرۋشى مەيرام الىشەۆ – قازاق سپورت جانە تۋريزم اكادەمياسىن بىتىرگەن كاسىبي مامان. بۇگىندە وسى كيوكۋشين بۋدوكاي كاراتە سپورتى بويىنشا اشقان ۇيىرمەنىڭ قۇرامىندا 20 بالا بار.

«قازىر, جاسىراتىنى جوق, ۇلكەن-كىشى تۇگەل تەلەفونعا تاۋەلدىمىز. بالالاردىڭ بوس ۋاقىتىن ءتيىمدى وتكىزۋ ءۇشىن وسى «كيوكۋشين بۋدوكاي كاراتە» ۇيىرمەسىن اشقان بولاتىنمىن. قولداۋ بىلدىرگەن مەكتەپ ديرەكتورى مارات اندىزباەۆقا العىس بىلدىرەمىن. سپورت – تەك دەنە جاتتىعۋلارى عانا ەمەس, ول ادام ءومىرىن تارتىپكە كەلتىرەتىن, ەرىك-جىگەردى كۇشەيتەتىن, جاۋاپكەرشىلىك سەزىمىن ارتتىراتىن ءومىر سالتى. سپورتپەن اينالىساتىن جاستار زياندى ادەتتەردەن اۋلاق بولادى دەپ ويلايمىن. كىشكەنتاي سپورتشىلارىم الماتىدا وتكەن SENTOKI CUP – 2026 چەمپيوناتىندا مەرەيىمىزدى ءوسىرىپ تاستادى. قۋانىشتىمىن!», دەيدى №20 بوگەن ورتا مەكتەبىنىڭ دەنە شىنىقتىرۋ ءپانى مۇعالىمى, «كيوكۋشين بۋدوكاي كاراتە» ۇيىرمەسىنىڭ جەتەكشىسى مەيرام الىشەۆ.

دزيۋدوشى نۇرقانات سەرىكباەۆ گرۋزياداعى Grand Slam ءتۋرنيرىنىڭ چەمپيونى اتاندى