اقتاۋدا وتەتىن «كاسپي» - «استانا» فۋتبول كلۋبتارى اراسىنداعى چەمپيوناتقا جانكۇيەرلەر قاتىستىرىلمايدى. بۇل تۋرالى قوعامدىق كوممۋنيكاتسيا ورتالىعىندا وتكەن كوروناۆيرۋس ينفەكتسياسىنىڭ الدىن الۋعا ارنالعان شارالار تۋرالى بريفينگتە ماڭعىستاۋ وبلىسى اكىمىنىڭ ورىنباسارى قانىبەك جۇماشەۆ ءمالىم ەتتى.
- 15 ناۋرىزدا اقتاۋ قالاسىندا «كاسپي» - «استانا» فۋتبول كلۋبتارى اراسىنداعى چەمپيونات وتكىزىلەدى. الايدا, كورەرمەندەر قاتىستىرىلمايدى. بۇل كوروناۆيرۋسقا قارسى ساقتىق شارالارىن كۇشەيتۋ ءۇشىن. ال وسى ىندەتكە قارسى 1, 2, 3-كاتەگوريالار ەنگىزىلگەن ەلدەردە بولعان فۋتبولشىلار قاتاڭ تۇردە تەكسەرۋدەن وتكىزىلمەك, - دەدى ق.جۇماشەۆ.
ماڭعىستاۋ وبلىسى اكىمىنىڭ ايتۋىنشا, فۋتبولدان ەل چەمپيوناتىنا قاتىستى مۇنداي شەكتەۋلەر بارلىق وبلىستا ەنگىزىلگەن. سەبەبى, مۇنداي چەمپيوناتتارعا حالىق كوپ شوعىرلانادى.
ال ماڭعىستاۋ وبلىسى دەنە شىنىقتىرۋ جانە سپورت باسقارماسىنىڭ باسشىسى نۇربەك قارابالاەۆتىڭ بەرگەن مالىمەتىنە سۇيەنسەك, ايماقتاعى جاتتىعۋ زالدارى مەن فيتنەس-ورتالىقتار ادەتتەگىدەي جۇمىستارىن جالعاستىرا بەرەتىن بولادى.
ماڭعىستاۋ وبلىسى