ماڭعىستاۋ وبلىسى كوپبەيىندى بالالار اۋرۋحاناسىنىڭ دارىگەرلەرى تاعى ءبىر قيىن وتا جاسادى. بۇل جولى مەديتسينالىق كومەك 3 ايلىق قىز بالاعا قاجەت بولدى. اناسىنىڭ ايتۋىنشا, تاڭعى 6 شاماسىندا كىشكەنتاي ءسابي مازاسىزدانعان جانە دەنەسى كوگەرىپ باستاعان. سول بويى اناسى «103» قىزمەتىنە حابارلاسىپ, ءسابي جەدەل جاردەم بريگاداسىنىڭ كومەگىمەن شۇعىل اۋرۋحاناعا جەتكىزگەن. بۇل تۋرالى ماڭعىستاۋ وبلىستىق دەنساۋلىق ساقتاۋ باسقارماسى ءباسپاسوز قىزمەتى حابارلادى.
سابيگە قويىلعان دياگنوز اۋىر ساناتىنا جاتادى. اتاپ ايتقاندا, جالپى جاعدايى باس مي قان اينالىسىنىڭ بۇزىلىسى, باس ميىنىڭ ءىسىنۋى, تامىر ىشىندەگى تارالعان قان ۇيۋ سيندرومى, پوستەگورراگيالىق انەميا, وتادان كەيىنگى ەرتە كەزەڭگە بايلانىستى وتە اۋىر, تۇراقسىز بولعاندىقتان اق حالاتتى ابزال جاندار شۇعىل تۇردە وتا جاساۋ تۋرالى شەشىم قابىلداعان.
انەستەزيولوگيا, رەانيماتسيا جانە قارقىندى تەراپيا بولىمشەسىنىڭ مەڭگەرۋشىسى مەرەكە بەكباەۆتىڭ ايتۋىنشا, ءسابيدىڭ ساناسى ميلىق كوما, بەت ءپىشىنى جانە كوز ساڭىلاۋى سيممەتريالى بولعان. سونىمەن قاتار مەنينگەالدىق سيمپتومدارى كۇماندى جانە ميكروتسيركۋلياتسيالىق بۇزىلىستار بايقالعان. تەرى جامىلعىسى وتە بوزعىلت, سارعىش بولعان. ال وتانى بالالار نەيروحيرۋرگى ەربول كەنجەۆالوۆ جاساعان.
- نارەستە كۇندىزگى 12:30 شاماسىندا جەدەل جاردەم بريگاداسىمەن بالالار اۋرۋحاناسىنا جەتكىزىلدى. بالانىڭ جالپى جاعدايىنىڭ اۋىرلىعىنا .بايلانىستى باس ميىنىڭ كومپيۋتەرلىك توموگرافياسى جاسالىپ, جان ساقتاۋ بولىمشەسىنە اۋىستىرىلدى. تولىق تەكسەرىلگەن سوڭ وتاالدى دايىندىقتان كەيىن 6 ساعاتتاڭ سوڭ وپەراتسيا جاسالدى. باس ميىنىڭ اشىلۋى ترەپاناتسياسى جاسالىپ, گەماتوماسى الىندى. وتا 1,5 ساعاتقا جالعاستى. قازىرگى تاڭدا ءسابي جاساندى تىنىس الۋ اپپاراتىنا قوسىلعان. وسىلايشا كونسەرۆاتيۆتى ەمىن جالعاستىرۋدا, دەيدى ول.
ءسابي ازىرگە دارىگەرلەردىڭ باقىلاۋىندا بولادى, اۋرۋحانادا قانشا كۇن جاتىپ ەم الاتىنىن ءدوپ باسىپ ايتۋ قيىن. وعان بولاشاقتا دا مەديتسينالىق كومەكتىڭ قاجەت بولۋى مۇمكىن. جاعدايى جاقسارعان سوڭ ۇيىنە جىبەرىلەدى. اق حالاتتى ابزال جاندار سابيگە مۇقيات كۇتىم جاسالسا, جاعدايى جاقسارىپ بۇل دياگنوزدى تولىققاندى جەڭۋگە بولاتىنىن ايتادى.