اقتاۋ گارنيزونىنىڭ اسكەريلەرى ماڭعىستاۋ تەمىر جول ۆوكزالىندا اتاقتى 74-ءشى جەكە تەڭىز اتقىشتار بريگاداسىنىڭ جەڭىس تۋى كوشىرمەسىن سالتاناتتى تۇردە قارسى الدى. اقتاۋلىقتارعا بۇل تاريحي جادىگەر «جەڭىسكە 75 كۇن» رەسپۋبليكالىق اسكەري-پاتريوتتىق ەستافەتاسى اياسىندا جىبەرىلدى. بۇل تۋرالى «باتىس» وڭىرلىك قولباسشىلىعى ءباسپاسوز قىزمەتى حابارلادى.
سالتاناتتى راسىمگە اقتاۋ گارنيزونىنىڭ اسكەري قىزمەتشىلەرى, «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى جانە قالا باسشىلىعى قاتىستى. پويىز ەلوردادان كەلگەن سوڭ, جاۋىنگەرلىك تۋدىڭ كوشىرمەسى گارنيزون باستىعى پولكوۆنيك مۇرات اراپباەۆقا تاپسىرىلدى.
- بۇگىن, بىزگە قارۋلى كۇشتەردەگى جالعىز تەڭىز جاياۋ اسكەرى بريگاداسى رەتىندە 74-ءشى جەكە تەڭىز اتقىشتار بريگاداسىنىڭ جاۋىنگەرلىك تۋى سەنىپ تاپسىرىلدى. بۇل اسكەري قۇىرىمنىڭ ءناتسيزمدى جەڭۋ جولىنداعى ۇلەسى ماڭىزدى بولعانىڭ بىلەمىز. سوندىقتان وتانىمىزدىڭ پاتريوتتارى رەتىندە, سول كۇندەردىڭ ەستەلىكتەرىن ساقتاۋعا, نەمەرەلەرىمىزگە اكەلەرىمىز بەن اتالارىمىزدىڭ جاساعان ەڭبەكتەرى مەن سوعىس ۋاقىتىندا جاساعان ىستەرىن ايتىپ وتىرۋعا مىندەتتىمىز, دەدى گارنيزون باستىعى.
ايگىلى بريگادا 1941 جىلدىڭ قازان ايىندا اقتوبەدە قۇرىلدى. بۇل بولىمشەنىڭ نەگىزىن استراحان قالاسىنداعى سوعىستىڭ باسىندا ەۆاكۋاتسيالانعان فرۋنزە اتىنداعى كرونشتادت جوعارى اسكەري-تەڭىز مەكتەبىنىڭ تۇلەكتەرى قۇرادى. سونىمەن قاتار, كاسپي فلوتيلياسىنىڭ 1000-عا جۋىق ماتروستارى كەلدى, ولارعا قوسىمشا كۇش رەتىندە 2000-عا جۋىق قازاقستاندىق ەرىكتىلەر قوسىلدى. 1941 جىلدىڭ قازان ايىنىڭ سوڭىندا 74-ءشى جەكە تەڭىز اتقىشتار بريگاداسى ماسكەۋگە جاقىن جەردە بەلىي راست پوسەلكەسىنە كەلدى. ماسكەۋ تۇبىندەگى شايقاستاردا بريگادا ماسكەۋ قورعانىس ايماعىنىڭ اسكەرلەرىنە كىردى. ماسكەۋ تۇبىندەگى ۆولوكولامسك تاس جولىنداعى وبەليسكتە, ماسكەۋ ءۇشىن سوعىسقان اسكەري-بريگادالاردىڭ اراسىندا 74-ءشى جەكە تەڭىز اتقىشتار بريگاداسى دا كورسەتىلگەن. 74-ءشى جەكە تەڭىز اتقىشتار بريگاداسىنىڭ جاۋىنگەرلەرىنىڭ ولمەس ەرلىگى ءۇشىن ەسكە الۋ تاقتاسى اقتوبە قالاسىنىڭ № 14 ورتا مەكتەبىنىڭ عيماراتىنا ورناتىلدى.
الداعى ۋاقىتتا وسىنداي ءىس-شارالار قازاقستان رەسپۋبليكاسىنىڭ قورعانىس مينيسترلىگىنىڭ باستاماسىمەن «جەڭىسكە 75 كۇن» رەسپۋبليكالىق پاتريوتتىق اكتسياسى اياسىندا وتكىزىلىپ تۇرادى.
ماڭعىستاۋ وبلىسى