ماڭعىستاۋدا «اداي اتا – وتپان تاۋ» تاريحي ەتنو-مادەني كەشەنىندە انالار كۇنىنە ارنالعان «اناشىم – جاناشىرىم» اتتى مەرەكەلىك شارا بولىپ ءوتتى. بۇل تۋرالى اتالعان كەشەن قىزمەتكەرلەرى حابارلادى.
شاراعا شەتپە كەنتىنىڭ ارداقتى انالارى الدانبەرگەنوۆا ورىنشا, قيلىباەۆا مەرۋەرت ەگدىربايقىزى, سايا كامەشقىزى مەن جىڭعىلدى اۋىلى ە.ايشۋاق ۇلى اتىنداعى ورتا مەكتەپ وقۋشىلارى قاتىستى. شارانى كەشەن قىزمەتكەرى ەڭسەگەنوۆا زينە جۇرگىزىپ, انالاردىڭ قىسقاشا ومىرباياندارىمەن تانىستىرىپ ءوتىپ, انالاردىڭ وزدەرىنە ءسوز كەزەگىن بەردى.
ال وقۋشىلار انالارعا وزدەرى قىزىقتىرعان ماسەلەلەر بويىنشا سۇراقتارىن قويىپ, ولارعا جاۋاپ بەرىلىپ, تارتىمدى پىكىرتالاس بولدى. مەكتەپتىڭ 8-سىنىپ وقۋشىلارى ناجىمەددين بەكزات, ماعزوم اقبەرەن, ەسەنوۆ شاحىماردان جانە تۇلەيباي ءازيزا انالارعا ارناپ م.ماقاتاەۆ پەن قادىر مىرزا ءالىنىڭ ولەڭدەرىن وقىسا, ابدۋللاەۆ ەرماحان «تالكەمە» ءانىن ورىندادى.
انالار شارانى ۇيىمداستىرعان كەشەن قىزمەتكەرلەرى مەن ەسىر مەكتەبىنىڭ وقۋشىلارىنا شىن جۇرەكتەن انالىق العىستارىن ارنادى.